Aj Colosa 2 - Mam Comitancillo NT

1Wajbꞌila tuꞌn kybꞌintiꞌy, qa tok tilil wuꞌn kujxix wen, tuꞌn kyel wena toj kynimbꞌila, ex ikyxjo kyeꞌ aj tnam Laodicey,

9Me ate Jesucrist, ax Diosjo, quꞌn tiꞌjxjo Crist, a ichin skꞌoꞌnxix tuꞌn Dios, yekꞌineꞌ tkyaqiljo t-xilin qMan.

10Ex ayetzin kyeꞌ tzꞌaqleqexixa tuꞌn kymujbꞌil kyibꞌa tukꞌa Jesucrist, ex tuꞌn najle Crist toj kyanmiꞌn. Ex ax Jesús at nimxixtl toklin tibꞌaj tkyaqil nmaq nejinel ex jniꞌ kawbꞌil.

11Ex noq tuꞌn kymujbꞌil kyibꞌa tukꞌa Crist, ma chi oka nyakuj at kyechila. Me nyateljo tzeꞌnku kyij ttzꞌibꞌin Moisés, tuꞌn tok qitittaq tiꞌj kytzꞌumil xjal ojtxe, ex tuꞌn tel paꞌyit chꞌin kytzꞌumil kyiꞌj, ex tuꞌn ikyjo, tuꞌn kykyijxjal toj wen tukꞌa Dios; quꞌn at juntl wiql paꞌbꞌl te qe jaꞌlin: Noq tuꞌn ma tzꞌel qpaꞌn qibꞌ tiꞌj ojtxe qten, ajo tkyaqil il, ex tiꞌjjo jniꞌ nya wen tokxtaq toj qanmin, aku bꞌant tuꞌn qkyij toj wen tukꞌa Dios. Atziꞌn tkabꞌ paꞌbꞌl lo, axixsinte akꞌaj techiljo toj qanmin, a tzajnin tiꞌj Crist.

12Tuꞌnpetziꞌn, tej qkuꞌx toj aꞌ te jawsbꞌil aꞌ, nyakuj o qo kyim tojjo ojtxe qten, ex nyakuj o qo kux muqet junx tukꞌa Crist, tej tkuꞌx toj txꞌotxꞌ. Ex tej qjatz toj aꞌ, jun techil qa ma qo jaw itzꞌje tukꞌa jun akꞌaj qchwinqil, ikyxjo tzeꞌnku jaw itzꞌje te Jesús juntl majl kyxol kyimnin. Ex a teꞌ akꞌaj qchwinqil ma tzaj qkꞌmoꞌn noq tuꞌn qnimbꞌil tiꞌj tipin Dios, a jatz anqꞌin Jesús tuꞌn.

13Tej naꞌmtaq tel kypaꞌn kyibꞌa tiꞌjjo ojtxe kyteꞌn, kyimninqetaqa twutz Dios, ex otaq chi naja toj kyila. Me atziꞌn jaꞌlin, ma tzaj tqꞌoꞌn qMan Dios akꞌaj kychwinqila junx tukꞌa Jesucrist; ex noq tuꞌn Jesús, o najsit tkyaqil kyila.

15Tej tkyim Jesús twutz cruz, ex tej tjaw anqꞌin juntl majl kyxol kyimnin, kubꞌ tyekꞌin kywutz kykyaqilxjal, qa at nimxixtl tipin tibꞌaj tkyaqil nmaq nejinel ex tibꞌaj tajaw kyimin, ex tibꞌaj tkyaqil kawbꞌil toj tchꞌiysbꞌin Dios, ex kubꞌ tchikyꞌbꞌinxix wen qa o kanbꞌin tibꞌaj tkyaqiljo luꞌn.

Il tiꞌj tuꞌn tkubꞌ qnimin Tyol Dios, a twutzxix

16Tuꞌnpetziꞌn, mi txi kyqꞌoꞌn ambꞌil kyexjal tuꞌn kyyolbꞌin kyiꞌja noq tuꞌn tpaj ojtxe kawbꞌil, tzeꞌnku tiꞌ tuꞌn t-xi kywaꞌn, ex tiꞌ tuꞌn kyxi kykꞌwaꞌn; ex tuꞌn tpajjo nintz qꞌij nchi ikyꞌsit, mo kyiꞌjjo xim tiꞌj neꞌẍ yaye, mo tuꞌn tpajjo tuꞌn tbꞌant jun tiꞌla kyuꞌn toj qꞌij te ajlabꞌl.Ro. 14:1-6.

17Quꞌn kykyaqiljo luꞌn n-ajbꞌintaq ojtxe noq te jun techil tiꞌjjo akꞌaj tumil, a iltaq tiꞌj tuꞌn tul, tuꞌn kykyijxjal toj wen tukꞌa Dios. Quꞌn tkyaqiljo luꞌn, a tzajnin toj ojtxe kawbꞌil, ikytziꞌn tzeꞌnku jun t-xlekemil, a jun paqx n-ikyꞌ. Me atziꞌn jaꞌlin, ate Crist, a twutzxix, o tzul te jun majx, ex tkyaqiljo txqantl, nlay chi mojin qukꞌa toj qnimbꞌil.

18Quꞌn tkyaqiljo luꞌn noqx jun kyximxjal, ex ntiꞌ tumil. Aye xjal luꞌn noq n-ok kyqꞌoꞌn kyibꞌ te wenxix, me oꞌkx nchi xnaqꞌtzin tiꞌjjo a kyaj, ex kyiꞌjjo kywutzikyꞌ, ex qa il tiꞌj tuꞌn qkꞌulin kywutz angel. Me ayeꞌ xjal lo, noq nkynimsin kyibꞌ kywutzxjal, me ntiꞌ tumil tuꞌn qxi lipe kyiꞌj. Quꞌn qa ma kyij qtzaqpiꞌnqe Tbꞌanil Tqanil tiꞌj Jesús, okla qo najil, ex ntiꞌla jun oyaj te qe toj kyaꞌj.

19Aye xnaqꞌtzil lo, ntiꞌ kymujbꞌil kyibꞌ tukꞌa Jesucrist, a wibꞌaj tibꞌaj tkyaqil Ttanim Dios, a axjo t-xmilil Crist.Ef. 1:22; 4:15-16. Atziꞌn Crist tok te wiꞌbꞌaj, atzin nchꞌiysin teꞌ t-xmilil, a Ttanim Dios: Nqo tzaj tkꞌaꞌchin, ex nqo ok tmujbꞌin toj tumil tuꞌntzin qchꞌiy, tzeꞌnkuxjo tajbꞌil qMan Dios.

20Ayetzin kyeꞌ, o chi kyim kyeꞌ tukꞌa Crist, tej ttzaj tqꞌoꞌn akꞌaj kychwinqila.Ro. 6:6-11; Gal. 2:19-20. Tuꞌn ikyjo, o chi tzaqpaja tjaqꞌ jniꞌ nmaq kawbꞌil ex tkyaqil xnaqꞌtzbꞌil kyuꞌnxjal, a nya tzꞌaqleqe. Qatzin qa ikyjo, ¿Titzin quꞌntz tzunx nchi anqꞌiꞌn nyakuj jun nya nimil, ex nkubꞌ kyniminjiꞌy a kyxnaqꞌtzbꞌilxjal, a nya toj tumil nqꞌumle,

21aj ttzaj kyqꞌmaꞌn kyjaluꞌn: Mi tzaj kytzyuꞌnjiꞌy luꞌn, ex mi txi kywaꞌnjiꞌy luꞌn, ex mi tzꞌok kymekoꞌnjiꞌy luꞌn? chi chiꞌ.

22Quꞌn tkyaqiljo xnaqꞌtzbꞌil luꞌn, ok kbꞌajil liwey, quꞌn noq xnaqꞌtzbꞌilku ex noq kyximxjal.

23Tkyaqiljo xnaqꞌtzbꞌil lo nyakuj at tumil, quꞌn tuꞌn nkubꞌ kymutxsin kyibꞌ tuꞌn, ex nkubꞌ kykyꞌixbꞌin kyxmilil tuꞌn, ex kujxixjo lo tuꞌn tjapin. Me tkyaqiljo luꞌn ntiꞌ tumil tuꞌn ttxꞌixpit qanmin tuꞌn, tiꞌj tkyaqiljo nya wen, a ntqanin ojtxe qten.