2 Aj Corint 13 - Mam Comitancillo NT

Jun yol te xobꞌtzbꞌil tuꞌn Pabl

1Atziꞌn tox majin luꞌn tuꞌn nxiꞌy lol kyeꞌy. Ex chin ponbꞌila tukꞌa kawbꞌil tzeꞌnku ntqꞌmaꞌn toj Tuꞌjil Tyol Dios: Aj tkubꞌ kawit jun il, il tiꞌj kabꞌe mo oxe tstiyil, a otaq kyli il anetziꞌnch.

2Tej ntenkuxixa kyukꞌiy te tkabꞌ majin, xi nqꞌmaꞌn kye nchi bꞌaj bꞌinchintaq il ex kye kykyaqilx; me quꞌn tuꞌn najchaq intiniꞌy jaꞌlin, noq kxel nnaꞌn kyeꞌy, qa aj nkaniꞌn jun majla kyukꞌiy, ma chinka tuꞌn nkawiꞌn kujxix wen, ex ntiꞌ tumil tuꞌn kytzaqpaja.

3Quꞌn ayexa nchi qaninte jun yekꞌbꞌil weꞌy, qa twutzxix jun yolil Tyol Cristqiꞌn, quꞌn nyapen noq alkyeku te Crist aj tkawin kyiꞌja; qalaꞌ okpin kꞌwel tyekꞌin tipintz kyxola.

4Twutzx teꞌ, tej tjaw qꞌoꞌn Crist twutz cruz tuꞌn tkyim, nyakuj ntiꞌtaq tipin. Me atzin jaꞌlin, itzꞌ te jun majx, tuꞌn tipin qMan Dios. Ex ikyxjo qeꞌ jaꞌlin; exla qa ntiꞌ qipiꞌn tuꞌnx qibꞌxa, me noq tuꞌn qmujbꞌil qibꞌa tukꞌa Dios, loqoꞌy itzꞌqo tuꞌn tipin, tuꞌn qajbꞌiꞌn kyxola tukꞌa jun kawbꞌil kujxix.

5-6Chi bꞌisiꞌn kyiꞌjxa qa twutzx qa nimilqexixa. Tuꞌn ikyjo, k-elil nnikyꞌtzajila qa jun twutzxix tsanjil Jesúsqiꞌn, quꞌn xi kynimiꞌn tuꞌn nyola. ¿Ma nyapela ojtzqiꞌn kyuꞌn qa itzꞌ Crist toj kyanmiꞌn? Quꞌn qa ntiꞌ Crist toj kyanmiꞌn, nya twutzxix nimilqiꞌy. Ikytziꞌn, qꞌuqle nkꞌuꞌja tuꞌn tel kynikyꞌa te, qa twutzxix tsanjil Jesúsqoꞌy.

7Nqo naꞌn Dios, tuꞌntzin mi kubꞌ kybꞌinchinjiꞌy nya wen, nya noq tuꞌn tyekꞌin qa wenqoꞌy kywutza; qalaꞌ tuꞌn kyel wena twutz Dios, exla qa nyakuj nya wenqoꞌy.

8Quꞌn qa ma kubꞌ kybꞌinchinjiꞌy wen, nyale qo kawiljiꞌy kyiꞌja, quꞌn ntiꞌ jun tiꞌ aku kubꞌ bꞌinchit tiꞌjjo a wen.

9Nqo tzalaja tuꞌn at kyipiꞌn tuꞌn kybꞌinchiꞌn tzeꞌnku taj Dios. Ex nyatla il tiꞌj tuꞌn tyekꞌin Dios tipin tukꞌa tkawbꞌil kyiꞌja kujxix wen, quꞌn qa otaq kubꞌ kybꞌinchin kyibꞌa, aj npoꞌn, noq tukꞌa jun yol bꞌunin kchin yoliliꞌy kyukꞌiy, nyakutlaj ntiꞌ qipiꞌn. Tuꞌnpetziꞌn, kukx nqo kubꞌsin qwutzjiꞌy te Dios, tuꞌn kyoka tzꞌaqle toj kynimbꞌila.

10Ex tuꞌnpetziꞌn, nxi ntzꞌibꞌinjiꞌy uꞌj luꞌn naꞌmxtaq nxiꞌy lol kyeꞌy, quꞌn tuꞌntzintla aj nkaniꞌn, nyatla il tiꞌj tuꞌn nkawiꞌn kujxix kyiꞌja. Quꞌn a nkawbꞌila tzaj tqꞌoꞌn Dios tuꞌn kychꞌiya toj kynimbꞌila, ex nya tuꞌn kykubꞌ numje.

Jun qꞌolbꞌil tuꞌn Pabl tuꞌn tjapin bꞌaj tyol

11Atzin jaꞌlin erman, oꞌkx nyoljiꞌy. Noqit chi tzalajxa. Tzꞌokx tilil kyuꞌn, tuꞌn kyoka tzꞌaqle toj kynimbꞌila. Kyqꞌuqbꞌink kykꞌuꞌja kyxola, ex junxit kynabꞌla tukꞌa nukꞌbꞌil. Ex Dios, a Tajaw tkyaqil kꞌuꞌjbꞌil ex nukꞌbꞌil ktenbꞌil kyukꞌiy.

12Kyqꞌolbꞌink kyibꞌa kyxolxa tukꞌa tkyaqil kykꞌuꞌja.

13Ex tkyaqil erman tzaluꞌn junx wukꞌiꞌy nxi kysmaꞌn qꞌolbꞌil kyeꞌy.

14Noqit a t-xtalbꞌil qAjaw Jesucrist ten kyukꞌiy, junx tukꞌa tqꞌaqꞌbꞌil tkꞌuꞌj qMan Dios, ex tukꞌa kymujbꞌil kyibꞌa tuꞌn Xewbꞌaj Xjan. Ikyxitjo.