Gutpela Stretpela Tingting 17 - Buk Baibel long Tok Pisin（TPIPNG）

Narakain tudak i kamap long ol Isip na ol i pret moa yet

1Ol kot bilong yu i stretpela tru, tasol i no isi long mekim klia ol tingting bilong yu. Olsem na ol man i no save gut long ol tingting bilong yu, ol dispela man i go paul nabaut.

2Ol manmeri nogut i ting ol i kalabusim pinis ol manmeri bilong yu, tasol ol yet i kalabus pinis, long wanem, tudak bilong longpela nait i holimpasim ol. Na God i save was oltaim long olgeta samting, em i no wari long ol dispela manmeri i stap kalabus insait long haus bilong ol yet.

3Ol man nogut i ting ol sin bilong ol bai i stap hait na i no gat man inap painimaut. Long wanem, olgeta man i lusim pinis tingting long ol rong bilong ol. Tasol nau ol i guria nogut na ol i longlong nabaut. Na ol i pret nogut tru taim ol i lukim ol kain kain samting i kamap long nait.

4Maski ol i hait i stap long ol kona i tudak moa, ol i pret moa yet. Na olkain nois i kamap na i mekim ol i pret nogut tru. Olkain tambaran na masalai i gat kain kain pes nogut i ranim ol.

5I no gat wanpela paia i gat inap strong na bai em i givim lait long ol. Na ol sta i gat bikpela lait ol tu i no inap mekim dispela nait nogut i tulait liklik.

6Ol i lukim tasol wanpela paia i narakain tru. Na i no gat wanpela man i bin kirapim dispela paia. Na ol i ting ol samting ol i lukim long driman o long tingting bilong ol, ol i samting nogut tru. Na ol samting ol i lukim tru long ai bilong ol, ol i ting ol dispela samting i nogut olgeta, na ol i guria nogut tru.

7Olkain trik ol posinman i save wokim bilong paulim ai bilong ol man, ol dispela trik i lus olgeta. Bipo ol i bin mauswara long ol kain kain save bilong ol, tasol nau dispela save bilong ol i kamap olsem samting nating na ol i sem tru.

8Bipo ol i tok ol inap long rausim olgeta pret na longlong tingting bilong ol man. Tasol nau ol yet i longlong nabaut na ol i pret nogut tru.

9Maski i no gat wanpela samting i stap bilong mekim ol i pret, ol i lukim ol kain kain samting na ol i kirap nogut. Ol i lukim ol animal i wokabaut nabaut na ol i kirap nogut. Ol i harim nois ol snek i mekim na ol i guria nogut tru.

10Ol i dai tru long pret. Maski i no gat wanpela samting i stap bilong mekim ol i pret, ol i pret nogut tru na ol i no laik opim ai bilong ol.

11Ol manmeri i pret nogut, long wanem, ol samting nogut ol yet i bin mekim bai i kotim ol. Man i bel hevi long rong bilong em, em i ting samting nogut tru bai i kamap long em.

12Man i pret, em i paul olgeta, na em i no inap bihainim tingting i stret.

13Sapos ol manmeri i gat tupela tingting na ol i no inap helpim ol yet, orait ol bai i pret moa moa yet, long wanem, ol i save olsem, ol i no inap painimaut wanem samting i mekim ol i pret.

14Olsem na long dispela nait nogut, olgeta manmeri i pret tru long tudak na i no slip gut. Tasol tudak bilong dispela nait i no gat pawa bilong em yet bilong mekim nogut long ol. Dispela tudak i kam long ples bilong ol man i dai pinis, na dispela ples i no gat pawa bilong em yet.

15Olkain tambaran na masalai nogut i ranim ol nabaut. Ol i pret tru na ol i slip nabaut olsem ol man i dai pinis. Long wanem, wantu tasol traipela pret tru i kisim ol.

16Na ol manmeri i pundaun na i slip i stap nabaut long graun, na pret bilong ol yet i kalabusim ol.

17Maski ol i papa bilong gaden o wasman bilong ol sipsip, na maski ol i man bilong mekim wok long ol gaden, pret i holim tru olgeta manmeri na i no lusim ol. Long wanem, kalabus bilong tudak i pasim ol.

18-19Ol manmeri i dai stret long pret. Taim ol i harim win i mekim nois o ol pisin i mekim naispela singsing antap long ol bikpela diwai, o ol i harim ol wara i ran i go na i mekim bikpela nois, o ol i harim ol ston i pundaun na i pairap nabaut, orait ol i pret moa yet. Ol i pret nogut tru long ol kain kain animal i stap hait na i mekim nois nabaut, na ol wel animal i singaut strong na ol kain kain krai i kam bek long ol hul bilong maunten.

20Bikpela lait i stap long olgeta hap bilong graun, na olgeta manmeri i go het tasol long mekim ol wok bilong ol.

21Tasol bikpela tudak i karamapim dispela lain manmeri nogut. Dispela tudak em i piksa bilong tudak bilong i dai i wetim ol. Tudak i olsem hevi i slip antap long ol, tasol ol bikpela wari long ol pasin nogut bilong ol i winim hevi bilong dispela tudak.