Nahum 2 - Buk Baibel long Tok Pisin（TPIPNG）

1-2Ol birua i bin bagarapim ol Israel na kisim olgeta gutpela samting bilong ol i go, tasol nau Bikpela i laik mekim biknem bilong Israel i kamap gen, olsem bipo.

Ninive i bagarap

Ol Ninive, ol birua i pait long yupela nau. Man bilong bagarapim yupela i kam pinis. Putim ol soldia bilong was long banis bilong taun. Was gut long ol rot. Yupela i mas sanap strong na redi long pait.

3Ol birua i karim ol retpela hap plang, na ol i putim retpela bilas bilong pait na ol i kam bilong pait long yupela. Ol i ran i kam bilong pait na ol karis bilong ol i lait olsem paia, na ol longpela spia ol i bin wokim long diwai pain, ol i singsing nabaut.

4Ol karis bilong ol i spit nogut long ol rot i kam long taun, na ol i ran i go i kam long ol ples bung. Ol i lait olsem bombom, na ol i sut i go nabaut olsem klaut i lait.

5Ol ofisa i givim tok pinis long ol soldia, na ol i go hariap na ol ston i sutim lek bilong ol. Ol i ran i go klostu long bikpela banis bilong taun na sanapim masin bilong brukim banis.

6Masin i brukim dua i stap klostu long wara na dua i op. Olsem na olgeta manmeri i stap long haus bilong king ol i pret nogut tru.

7Ol birua i mekim king bilong Asiria i sanap i stap. Na ol i rausim klos bilong kwin na karim em i go kalabus. Na ol wokmeri bilong en i bel nogut na i krai. Ol i sori tumas na paitim bros bilong ol.

8Longpela taim tru taun Ninive i bin i stap isi olsem bikpela hul wara. Tasol nau ol manmeri bilong en i ranawe i go ausait long taun, olsem bikpela wara i ran i go taim banis bilong wara i bruk. Sampela bilong ol i singaut strong olsem, “Sanap. Sanap. No ken ranawe.” Tasol i no gat wanpela i sanap na i go bek. Nogat. Olgeta i ranawe tasol.

9Ol birua i tokim ol wanlain bilong ol olsem, “Goan, kisim olgeta silva na olgeta gol. Ol planti naispela samting i pulap long taun bilong ol.”

10Ninive i bagarap tru, na i stap olsem hip pipia nating. Ol manmeri i lusim taun na i ranawe nabaut. Ol i pret nogut, na hanlek bilong ol i guria. Strong bilong ol i pinis olgeta, na ai bilong ol i wait nogut tru.

11-12Pastaim dispela biktaun i strong tru olsem haus bilong ol laion, tasol nau nogat. Bipo Ninive i olsem ples ol yangpela laion i save kaikai long en, na ol laion man na laion meri wantaim ol pikinini bilong ol i save hait long en na ol birua i no inap bagarapim ol. Laion i save kilim abus, na brukim liklik liklik bilong meri na ol pikinini bilong en i ken kaikai. Na em i save pulapim abus long haus. Tasol nau haus bilong en i stap we? Em i bagarap pinis.

13Bikpela I Gat Olgeta Strong i tokim ol Ninive olsem, “Mi yet mi birua bilong yupela. Bai mi kukim olgeta karis bilong yupela. Na ol soldia bilong yupela bai i dai long pait. Na bai mi kisim bek olgeta samting bilong ol arapela pipel em yupela i bin kisim. Bai ol manmeri bilong ol arapela kantri i no inap harim tok bilong ol man yupela i salim i go bilong bringim tok long ol.”