Buk Song 105 - Buk Baibel long Tok Pisin（TPIPNG）

Song bilong God wantaim ol manmeri bilong en

1Yumi kolim

nem bilong Bikpela

na singaut long em

na tok tenkyu long em.

Na yumi mas tokaut

long olgeta lain manmeri

long ol bikpela wok

em i bin mekim.

2Yumi singim ol song

bilong amamas long em

na bilong litimapim

nem bilong em.

Na yumi tokaut

long ol gutpela gutpela samting

em i bin mekim.

3Yumi amamas

na givim biknem long em.

Ol man i save go klostu

long Bikpela,

ol i ken amamas tru.

4Oltaim yumi mas i go klostu

long Bikpela

na askim em long helpim

na strongim yumi.

5-6Yupela ol tumbuna pikinini

bilong Abraham,

em wokman bilong Bikpela,

yupela lain bilong Jekop,

yupela ol manmeri

Bikpela i bin makim

bilong em yet,

yupela i mas tingim gen

ol strongpela wok bilong Bikpela

na ol mirakel em i bin wokim.

Na yupela i mas tingim

ol samting em i bin mekim

bilong mekim save

long ol man nogut.

7Bikpela em i God bilong yumi.

Em i save bosim olgeta manmeri

bilong dispela graun.

8Bikpela i bin mekim

wanpela kontrak

wantaim yumi

na dispela kontrak

bai i stap oltaim.

Na oltaim em bai i tingim yet

tok bilong dispela kontrak.

9Bikpela Stt 12.7, 17.8, 26.3 i bin mekim dispela kontrak

wantaim Abraham.

Na em i bin mekim

strongpela promis long Aisak

long bihainim tok

bilong dispela kontrak.

10Em Stt 28.13 i bin tok gen long Jekop,

em tumbuna bilong ol Israel,

na em i bin strongim

dispela kontrak

bilong i stap oltaim.

11Bikpela i bin tok olsem,

“Mi bai givim graun Kenan

long yu,

na dispela graun bai i stap graun

bilong ol lain tumbuna pikinini

bilong yu.”

12Bipo ol Israel i liklik lain tru

na ol i olsem ol tripman.

Tru, ol i bin i stap long graun Kenan,

tasol ol i no gat graun

bilong ol yet.

13Ol i save raun nabaut long graun

bilong ol arapela lain pipel.

14Tasol Stt 20.3-7 Bikpela i no larim

ol sampela lain i daunim ol.

Nogat.

Em i helpim ol

na em i krosim ol king

i laik mekim nogut long ol.

15Em i tokim ol dispela king olsem,

“Mi makim ol dispela manmeri

bilong mekim wok bilong mi

na yupela i no ken mekim

pasin nogut long ol.

Yupela i no ken mekim nogut

long ol profet bilong mi.”

16Bikpela Stt 41.53-57 i mekim bikpela hangre

i kamap long graun bilong ol,

na em i pinisim

olgeta kaikai bilong ol.

17Tasol Stt 37.28, 45.5 em i salim Josep

i go paslain long ol

na em i stap long kantri Isip.

Ol i larim ol man i baim Josep

na em i kamap

wokboi nating bilong ol.

18Ol Stt 39.20—40.23 i pasim strong ol sen

long lek bilong en

na lek i pen.

Na ol i pasim bikpela ring ain

long nek bilong en.

19Em i stap olsem

inap long taim ol samting i kamap

olsem em i bin tokaut long en.

Tok bilong Bikpela i soim ol olsem,

tok bilong Josep i tru.

20Orait Stt 41.14 nau king bilong Isip

i salim wanpela man

i go lusim Josep long kalabus.

Dispela king bilong ol arapela lain

em i pinisim kalabus bilong Josep.

21Na Stt 41.39-41 king i putim Josep i stap hetman

bilong gavman bilong en.

Olsem na Josep i stap

namba wan gavman bilong Isip.

22Em i gat wok bilong bosim

ol ofisa bilong king,

na em i gat pawa

bilong skulim gut ol man

i save givim tingting long king.

23Bihain Stt 46.6, 47.11 Jekop i go i stap long Isip.

24Na Kis 1.7-14 bihain Bikpela i helpim

ol lain manmeri bilong en

na ol i gat planti pikinini.

Na em i mekim strong bilong ol

i winim strong

bilong ol birua bilong ol.

25Em i mekim ol Isip i birua

long ol manmeri bilong en,

na ol Isip i painim rot

bilong mekim nogut

long ol wokman bilong en.

26Bihain Kis 3.1—4.17 Bikpela i makim

Moses, wokman bilong en,

na Aron,

na i salim tupela i go long Isip.

27Tupela i mekim

strongpela wok bilong God

na i wokim ol mirakel long Isip.

28God Kis 10.21-23 i mekim tudak

i karamapim graun bilong ol,

tasol ol Isip i sakim tok bilong en.

29Em Kis 7.17-21 i tanim olgeta wara bilong ol

i kamap blut

na i kilim i dai olgeta pis.

30Ol Kis 8.1-6 rokrok i kamap planti moa

na pulapim graun bilong ol,

na bikpela haus bilong king tu.

31God Kis 8.16-17, 8.20-24 i tok, na ol lang na natnat

i kamap planti tumas

na pulapim

olgeta hap graun na ples.

32Em Kis 9.22-25 i no salim ren tru i kam daun

long graun bilong ol.

Em i mekim ren ais

na paia bilong klaut i kam daun.

33Em i bagarapim ol diwai wain

na ol diwai fik bilong ol,

na em i brukim ol diwai nabaut.

34Em Kis 10.12-15 i tok tasol,

na ol grasopa i kamap.

Namba bilong ol i moa yet,

na ol man i no inap kaunim.

35Ol grasopa i kaikai

olgeta samting i gat lip,

na olgeta lip bilong kaikai

ol Isip i bin planim.

36Na Kis 12.29 God i kilim i dai

ol nambawan pikinini man

bilong olgeta famili bilong Isip.

37Bihain Kis 12.33-36 em i bringim ol Israel i go

na ol i lusim Isip.

Ol i karim silva na gol wantaim

na ol i go.

Olgeta Israel i stap gut.

I no gat wanpela i bagarap.

38Ol Isip i pret long ol Israel.

Olsem na ol Isip i lukim ol i go pinis

na ol i amamas tru.

39God Kis 13.21-22 i putim wanpela klaut

i stap antap

na karamapim

ol manmeri bilong en.

Na long nait

em i putim bikpela paia i stap

na ol i gat lait.

40Ol Kis 16.2-15 i askim em long sampela kaikai,

na em i salim ol pisin i kam

na ol i kaikai.

Em i givim bret bilong heven

long ol,

na ol i kaikai na pulap tru.

41Em Kis 17.1-7, Nam 20.2-13 i mekim wara i kamap

long wanpela bikpela ston.

Bikpela wara i kapsait

na i ran i go long ples drai

i gat wesan,

olsem wanpela bikpela wara

bilong bus.

42Em i tingting yet

long dispela strongpela promis

bipo em i mekim long Abraham,

wokman bilong em.

43Olsem na em i bringim

ol manmeri bilong en i go.

Na ol i singsing na amamas i go.

Dispela ol manmeri

em i makim pinis bilong em yet,

ol i singaut na amamas

na wokabaut i go.

44Graun Jos 11.16-23

bilong ol arapela lain manmeri,

em i givim long ol.

Na em i larim ol i kisim

ol gaden bilong ol dispela lain.

45Em i mekim olsem bai ol Israel

i ken bihainim olgeta tok

na olgeta lo bilong em.

Litimapim nem bilong Bikpela!