Ai Vakatakila 20 - AI VOLA TABU（FIJ1864）

Sa vauci ko Satani, 1-3. Sa yaco nai kadua ni tu cake tale mai na mate, 4-6. Sa sere tale ko Satani, a sa levu na ka sa kitaka, a sa qai biu sara ki na buka-waqa, 7-10. Sa tukuni na siga ni lewa, 11-15.

1IA kaʼu a raica e dua na agilose sa lako sobu mai lomalagi, sa taura na ligana nai dola kei bulubulu sa sega ni vakabotona kei na sinucodo levu.

2A sa laʼki taura na gata levu, a gata makawa, o koya o qo na Tevoro, kei Satani, a sa vesuki koya me oti mada e dua na udolu na yabaki,

3a sa biuti koya ki bulubulu sa sega ni vakabotona, a sa sogoti koya kina eloma, a sa dregata nai sogo vei koya, me kakua ni temaki ira tale na veivanua ko koya, ka malua me oti mada na yabaki e dua na udolu: ia ni na oti mada o qo, ena qai sereki vakalailai tale.

4Ia kaʼu a raica e so nai tikotiko-vakaturaga, ka ra tiko kina e so, a sa soli vei ira me ia na veiturisautaki: au a raica na yalodra talega e tamusuki na uludra ni ra sa vakatusai Jisu, e na vuku talega ni vosa ni Kalou, o ira era sa sega ni soro vua na manumanu, se vua na nona matakau, a sa sega talega ni volai nai vakatakilakila e na yadredra, se na ligadra: a ra sa bula ka lewa vata kei Karisito ka yabaki e dua na udolu.

5Ia na kena vo ni mate era sa sega ni bula tale ka malua me oti mada na yabaki e dua na udolu. O qo nai matai ni bula tale mai na mate.

6Sa kalougata ka yalosavasava ko koya sa nonai votavota nai matai ni bula tale mai na mate: ena sega ni kaukauwa vei ira nai karua ni mate, ia era na bete ni Kalou kei Karisito, ka ra na lewa vata kaya ka yabaki e dua na udolu.

7IA ni na oti mada e dua na udolu na yabaki, ena qai sereki tale ko Satani mai na nona vale-ni-veivesu,

8ena qai lako tani yani ko koya me temaki ira na veivanua era; sa tiko e na tiki i vuravura e va, o Koko kei Mekoki, me vakasoqoni ira vata me ra vala: a kedrai wiliwili sa vaka na mata ni nuku ni waitui.

9Ia era a lako cake e na raraba kei vuravura, ka vakavolivolita na nodra koro na tamata yalododonu, kei na koro daulomani, me buku na druadrua: a sa lako sobu mai na Kalou mai lomalagi na buka-waqa, ka kati ira.

10Ia sa biu na tevoro sa temaki ira ki na drano buka-waqa sa vakasulifure, sa tiko kina na manumanu kei na parofita lasu; ia eratou na vakararawataki e na siga kei na bogi ka tawa mudu.

11IA kaʼu a raica e dua nai tikotiko-vakaturaga e levu ka vulavula, kei koya talega sa tiko kina, a sa dro vakatikitiki tani e matana ko vuravura kei lomalagi; a sa sega talega na vanua e kune me nodrau tikina.

12Ia kaʼu a raici ira era a mate, na kaisi kei ua turaga, era sa wavu tu e na mata ni Kalou; a sa tevuki nai vola e so: e dua tani tale nai vola sa tevuki, ko ya ni bula: ia na mate era sa lewai mai na ka sa volai e nai vola, me vaka na nodrai valavala.

13Ia na waitui sa soli ira na mate era sa tiko kina, o mate talega kei bulu erau sa soli ira na mate era sa tiko kina; a sa lewai ko ira na tamata yadua me vaka na nodrai valavala.

14Ia ko mate kei bulu talega erau sa biu ruarua ki na drano buka-waqa. O qo gona nai karua ni mate.

15Ia sa biu ki na drano buka-waqa ko koya yadua sa tawa kune ni sa volai e nai vola ni bula.