Ai Vakatakila 19 - AI VOLA TABU（FIJ1864）

Era sa vakavinavinaka na kai lomalagi ni sa ca ko Papiloni, ni sa vakarau vinaka talega na wati ni Lami, 1-10. Era sa kacivi na manumanu vuka me ra kani ira na meca ni Kalou, 11-21.

1IA ni sa oti na veika o qo, kaʼu a rogoca na domodra na lewe vuqa mai lomalagi, era sa kaya, Aliluya: A bula, kei na vakavinavinaka, kei na vakarokoroko, kei na kaukauwa, me ia vua na Turaga na noda Kalou:

2ni sa dina ka dodonu na nona lewa: ni sa lewai koya na yalewa dautagane vakalevu, o koya sa vakadukadukalitaki vuravura e na nona dautagane, a sa sauma vei koya na kedra dra na nona tamata.

3A ra sa qai kaya tale, Aliluya. A sa kuvu cake na nona kubou me sega ni mudu.

4A sa cuva sobu na qase e ruasagavulu ka va, kei na ka bula e va, a ratou sa masu vua na Kalou sa tiko e nai tikotiko-vakaturaga, ka kaya, Emeni; Aliluya.

5A sa dua na vosa sa lako mai nai tikotiko-vakaturaga, sa kaya, Vakavinavinaka ki na noda Kalou, oi kemudou kecega na nona tamata, kei kemudou sa rerevaki koya, se dou kaisi se dou turaga.

6Au sa rogoca na ka e vaka na domo ni lewe vuqa, e vaka na domo ni wai e vuqa, e vaka na domo ni kurukuru levu, sa kaya, Aliluya: ni sa lewa na Turaga na Kalou Kaukauwa sara.

7Tou marau ka reki, ka ia na vakarokoroko vei koya; ni sa yaco na vakawati ni Lami, a sa vakarautaki koya vakai koya ko na watina-yalewa.

8A sa soli vua me vakaisulu e na malo matailalai, sa savasava ka lumilumisa: (ia na malo matailalai na nodra yalododonu na tamata yalosavasava.)

9A sa kaya vei au ko koya, Mo vola, Era sa kalougata era sa kacivi ki nai vakayakavi ni vakawati ni Lami. A sa kaya vei au ko koya,

0qo gona na vosa dina ni Kalou.

10Ia kaʼu a cuva ki yavana me masu vei koya. A sa kaya vei au ko koya, Raica, mo kakua: oi au na nomui tokani, ka dua vei ira na wekamu era sa taura tiko nai tukutuku kei Jisu; masu vua na Kalou: (ia nai tukutuku kei Jisu na yalo ni parofisai.)

11Ia kaʼu a raici lomalagi ni sa dola tu, ka raica sa dua na ose vulavula; o koya sa tiko kina sa vakatokai ko Dodonu ka Dina, a sa lewa dodonu ko koya ka kitaka nai valu.

12A matana e vaka na yameyame ni buka, sa toka e na uluna nai sala-vakaturaga e vuqa; a sa volai na yacana, ia sa sega na tamata e kila, o koya duaduaga.

13A sa vakaisulu e nai sulu sa lomoci e na dra; a sa vakatokai na yacana Na Vosa ni Kalou.

14Ia ko ira na matai valu mai lomalagi era sa muri koya, ni ra sa vodo e na veiose vulavula, a ra sa vakaisulu e na malo matailalai, e vulavula ka savasava.

15A sa dara mai na gusuna e dua nai seleiwau gata, me vei-ravuyaka kina ko koya na veimatanitu: ia ena lewai ira e nai titoko kaukamea: a sa silaraka ko koya na keli-ni-waini ni cudru waqawaqa ni Kalou Kaukauwa.

16Ia na yacana sa volai e na nonai sulu kei na sagana talega, A NODRA TUI NA TUI, KEI NA NODRA TURAGA NA TURAGA.

17Ia kaʼu a raica e dua na agilose sa tu e na mata-ni-siga; a sa kaci vakadomoilevu ko koya, ka kaya vei ira kecega na manumanu era vuka e na maliwa kei lomalagi, Dou vakasoqoni kemudou vata mai ki nai vakayakavi ni Kalou levu:

18mo dou kania na lewedra na tui, kei na lewedra na turaga ni valu, kei na lewedra na tamata qaqa, kei na lewedra na ose, kei ira era sa vodo kina, kei na lewedra kecega, se rai taukei se ra bobula, se ra kaisi se ra turaga.

19Ia kaʼu a raica na manumanu, kei ira na tui kei vuravura, kei na nodrai valu, era sa soqoni vata mai me ra veivala kaya sa dabe e na ose, kei ira na nonai valu.

20A sa vavau na manumanu, a sa vau vata kaya na parofita lasu, o koya sa kitaka na cakamana e matana, o koya sa daulari ira kina era sa volai e nai vakatakilakila ni manumanu, kei ira sa soro ki na nona matakau. Oi rau ruarua o qo erau sa biu bula ki na drano buka-waqa sa caudre e na sulifure.

21Ia ko ira na kena vo era sa vakamatei e nai seleiwau i koya sa dabe e na ose, o koya sa dara mai na gusuna: ia ko ira kecega na manumanu era sa mamau e na lewedra.