Ai Vakatakila 18 - AI VOLA TABU（FIJ1864）

Sa bule ko Papiloni, a sa kaya na Kalou me lako tani kina ko ira na nona tamata me ra kakua ni ca vata, 1-8. Sa tagicaki Papiloni ko ira na turaga kei vuravura, kei ira na tamata dauveivoli, 9-19. Sa reki ko ira na tamata ni Kalou ni sa qai qeavu mai o qori, 20-24.

1IA ni sa oti na veika o qo, kaʼu a raica e dua tani tale na agilose sa lako sobu mai lomalagi, sa levu na nona kaukauwa; a sa rarama ko vuravura e na nonai ukuuku.

2A sa kaci vakaukauwa e na domo levu ko koya, ka kaya, Sa bale ko Papiloni e levu, sa bale, a sa yaco me nodrai tikotiko na tevoro, kei na qara ni yalo tawa-savasava kecega, kei na sova ni manumanu kecega sa tawa-savasava ka sevaki.

3Ni ra sa kitaka na veivanua kecega me ra gunuva na waini ni cudru ni nona dautagane, a ra sa veibutakoci kaya na tui kei vuravura, a ra sa vutuniyau na tamata dauveivoli e na vuku ni nona daukana vakalevu.

4Ia kaʼu a rogoca e dua tani tale na vosa mai lomalagi, sa kaya, Dou lako tani mai vua, oi kemudou na noqu tamata, mo dou kakua ni valavala ca vata kaya, ka mo dou kakua ni tauvi e na nona mate ca.

5Ni sa yacovi lomalagi na nonai valavala ca, a sa nanuma na nonai valavala ca ko na Kalou.

6Cudruvi koya me vaka na nona cudruvi kemudou, ka cakava vakarua vua me vakarua me vaka na nonai valavala: ia na bilo sa vakasinaita ko koya, vakasinaita vakarua vua.

7Me vaka na nona dokai koya, kei na nona dalama, solia vakakina vua na yaluma kei na rarawa: ni sa kaya ko koya e lomana, Oi au na marama kaʼu sa tiko o qo, kaʼu sa sega ni yada, kaʼu na sega ni raica na rarawa.

8O koya o qo ena lako vata mai kina na nona mate ca e na siga e dua, a mate, kei na tagi, kei na dausiga; ia ena vakamai e na buka-waqa: ni sa kaukauwa na Turaga na Kalou sa turisautaki koya.

9Ia ko ira na tui kei vuravura, era sa veibutakoci kaya ka daukana vata kaya, era na tagicaka, ka yasovaka, ni ra sa raica na kubou ni nona kama,

10a ra na tu vakayawa ni ra sa rerevaka na nona yaluma, ka kaya, Ai valu, ai valu, na koro levu ko Papiloni, na koro kaukauwa ko ya! e na tiki-ni-siga e dua bauga sa yaco na nomu turisautaki.

11O ira talega na dauveivoli kei vuravura era na tagicaka ka yasovaka: ni sa sega na tamata me volia tale na nodrai yau:

12Ai yau ni veivoli na koula, kei na siliva, kei na vatu dredre, kei na mata-ni-civa, kei na malo matailalai, kei na ka-damudamu, kei na malo i tavoi, kei na malo e rusivakula, kei na kau boivinaka kece, kei na bilo tabua kece, kei na bilo kau dredre sara kece, kei na parasa, kei na aironi, kei na vatu veivolavolai,

13kei na sinamoni, kei nai saluaki, kei nai wali, kei na drega me vakamai, kei na waini, kei na waiwai, kei na madrai droka vinaka, kei na witi, kei ira na manumanu, kei ira na sipi, kei ira na ose, kei na veivale-vodoki, kei ira na bobula, kei na yalodra na tamata.

14Ia na vuata sa garova na yalomu sa lako tani vei iko, kei na ka talei kei na ka vinaka sa lako tani vei iko, ia ko na sega sara ni kunea tale.

15A tamata era dauveivoli e na veika o qo, a ra sa vakavutuniyautaki e na vukuna, era na tu vakayawa ni ra sa rerevaka na nona yaluma, era na tagi ka yaso,

16ka kaya, Ai valu, ai valu, ua koro levu ko ya! ka vakaisulu e na malo matailalai, kei na ka-damudamu, kei na malo e rusivakula, ka vakaiukuuku e na koula, kei na vatu dredre, kei na mata-ni-civa!

17a sa vaqeavutaki na ka kecega o qo e na dua bauga na tiki-ni-siga.

O ira kecega nai taukei ni waqa, kei ira kecega e na waqa, kei ira na lewe ni waqa, ko ira kecega na dauveivoli e loma ni waitui, era sa tu vakayawa,

18ka kaci ni ra sa raica na kubou ni nona kama, ka kaya, A koro cava beka erau tautauvata kei na kena levu o qo?

19A ra sa kabua na uludra e na kuvu ni soso, ka qoqolou, ka tagi, ka yaso, ka kaya, Ai valu, ai valu, na koro levu ko ya! sa vakavutuniyautaki e na vukuna ko ira kecega nai taukei ni waqa e loma ni waitui e na vuku ni nona ka vakaturaga! a sa vaqeavutaki e na dua bauga na tiki-ni-siga.

20Mo vakarekireki e na vukuna, na lomalagi, kei kemudou nai apositolo kei na parofita yalosavasava; ni sa qai cudruvaki kemudou na Kalou ni sa ca ko koya o qo.

21A sa dua na agilose kaukauwa sa laveta cake e dua na vatu e vaka na vatu levu i qaqi, a sa biuta ki loma ni waitui, ka kaya, Ena vakabalei vakaukauwa vakaoqo na koro levu ko ya ko Papiloni, ka na sega sara ni kune tale.

22Ia ena sega sara ni rogoci tale e tikimu na domona sa dauqiria na api, kei na dau-ni-vucu, kei na dauuvu bitu-ni-vakatagi, kei na dauuvu davui; ena sega talega na matai, e mataitaka e dua na ka, me kune tale e tikimu; ena sega talega ni rogo tale e tikimu na rorogo ni vatu i qaqi;

23ena sega talega ni caudre tale e tikimu na rarama ni cina; ena sega talega ni rogo tale e tikimu na domo ni watina-tagane sa qai vakawati, se na domo ni watina-yalewa: o ira na nomu tamata dauveivoli eliu era tamata lelevu kei vuravura; ni sa nomui lawaki sa vakacalai kece kina na veivanua.

24A sa kune e tikina na kedra dra na parofita, kei ira na tamata yalosavasava, kei na kedra kecega era a vakamatei e vuravura.