Ai Vakatakila 17 - AI VOLA TABU（FIJ1864）

Sa raica e dua na yalewa ko Joni sa dabo e na manumanu, a sa tukuna na kenai balebale e dua na agilose, 1-18.

1A SA lako mai e dua vei iratou na agilose e vitu sa taura na bilo e vitu, ka keirau veivosaki, ka kaya vei au, Lako mai kike; au na vakatakila vei iko na turisautaki ni yalewa o qo sa dautagane vakalevu sa tiko e na bati ni wai levu:

2o koya era sa veibutakoci kaya ko ira na tui kei vuravura, a ra sa vakamatenitaki ko ira na kai vuravura e na waini ni nona dautagane.

3A sa vakakina sa kauta na yaloqu ko koya ki na veikau; ia kaʼu a raica e dua na yalewa sa tiko e na dua na manumanu damudamu, a sa vuqa na yacana sa vosavakacacataki kina na Kalou, a sa vitu na uluna ka tini na nona kaukamea.

4A sa vakaisulu na yalewa o qo e na malo damudamu e rusivakula, sa vakaiukuuku e na koula kei ua vatu dredre talega, kei na mata-ni-civa, a sa taura e na ligana na bilo koula sa sinai e na kena ca kei na kena dukadukali ni nona dautagane:

5a sa volai e na yadrena na yacana vakaoqo, A TAWA KILAI, O PAPILONI NA KA LEVU, A TINADRA NA DAUTAGANE KEI NA VEIKA VAKASISILA KEI VURAVURA.

6Ia kaʼu a raica na yalewa sa mateni e na kedra dra na tamata yalododonu, kei na kedra dra na tamata era sa mate e na vuku i Jisu: ia ni kaʼu a raica, kaʼu a kidacala ka kurabui vakalevu kina.

7A sa kaya vei au na agilose, O sa kidacala e na vuku ni cava? Au na tukuna vei iko na kenai balebale vuni na yalewa o qo, kei na manumanu sa colati koya, o koya sa vitu na uluna ka tini na nona kaukamea.

8A manumanu ko a raica sa bula eliu, a sa qai sega tale; ia ena lako cake mai bulubulu e sega ni vakabotona, ena qai lako ki nai vaka vakarusa: ia era na kidacala kina ko ira sa tiko e vuravura, o ira sa sega ni volai na yacadra e nai vola ni bula eliu e nai vakatekivu kei vuravura, ni ra raica na manumanu sa bula eliu, a sa sega tale, a sa bula ga.

9O qori na loma sa tu kina na vuku. A uluna e vitu na ulu-ni-vanua e vitu, sa tiko kina na yalewa o qo.

10Ia ka vitu na tui: e lima sa bale, e dua sa tiko, e dua tale sa bera ni lako mai: ia ni sa lako mai ko koya, ena tiko vakadede mada vakalailai.

11Ia na manumanu sa bula eliu, a sa qai sega tale, o koya o qo nai kawalu, a sa dua vei ira na lewe vitu ko koya, ka sa lako ki nai vakavakarusa.

12Ia na kaukamea e tini ko a raica eratou sa tui e le tini, a ratou sa sega ga ni vakavanua edaidai, a ratou sa kaukauwa voli ga kei koya na manumanu me vaka na tui e na dua ga na tiki-ni-siga.

13O iratou o qo eratou sa lomavata, ia eratou na solia na nodratou qaqa kei na nodratou kaukauwa vei koya na manumanu.

14O iratou o qo eratou na veivala kei na Lami, ia ena rawai iratou ko na Lami: ni sa nodra Turaga na turaga ko koya, kei na nodra Tui na tui: ia ko ira sa tiko vata kaya era sa kacivi, ka digitaki, ka lomadina.

15A sa kaya vei au ko koya, Na veiwai ko a raica, sa tiko kina na yalewa dautagane, o qori na veivanua kei na mataqali e vuqa, kei na veimatanitu, kei na duivosavosa.

16Ia na kaukamea e tini ko a raica e na manumanu, eratou na cata na yalewa dautagane, a ratou na kitaka me biu ka luvawale; ia eratou na kania na lewena, ka vakamai koya e na buka-waqa.

17Ni sa vakavulica na yalodratou ko na Kalou me ratou vakayacora na nona veitalia, me ratou lomavata, me ratou solia na nodratou matanitu vua na manumanu, me vakayacori mada na vosa ni Kalou.

18Ia na yalewa ko a raica, na koro levu ko ya, sa veitalia vei ira na tui kei vuravura.