Ai Vakatakila 16 - AI VOLA TABU（FIJ1864）

Sa sovaraka na nodratou veibilo ko iratou na agilose, a sa vuqa ua mate ca sa yaco kina, a sa lako mai ko Jisu me vaka na butako, 1-16. E so tale na ka sa tukuni, 17-21.

1IA kaʼu a rogoca e dua na domo levu mai na vale, sa kaya vei iratou na agilose e vitu, Dou lako, ka sovaraka yani na bilo e vitu ni cudru ni Kalou ki vuravura.

2A SA lako na kenai matai, a sa sovaraka na nona bilo ki vuravura; a sa tauvi ira na tamata na vidikoso ca e rarawa sara, o ira sa tu kina nai vakatakilakila ni manumanu, kei ira sa soro ki na nona matakau.

3IA nai karua ni agilose sa sovaraka na nona bilo ki na waitui; a sa yaco kina me vaka na dra ni mate: ia sa mate na ka kecega sa bula voli e waitui.

4IA nai katolu ni agilose sa sovaraka na nona bilo ki na veiuciwai kei na veivure-vure-ni-wai; a ra sa yaco kina me dra.

5Ia kaʼu a rogoca na agilose ni veiwai, o koya sa kaya, O iko, Turaga, o sa bula edaidai, o a bula eliu, o na bula tiko maimuri, o sa dodonu ga, ni ko sa lewa vakaoqo.

6Ni sa vakadavea na nodra dra na tamata lotu kei ira na parofita ko ira o qo, ko sa qai solia vei ira na dra me ra gunuva; ni sa dodonu o qo me vakakina vei ira.

7Ia sa dua tani tale kaʼu a rogoca mai nai cabocabo-ni-soro, sa kaya, E vaka ga o qo, Turaga na Kalou Kaukauwa, sa dina ka dodonu na nomu lewa.

8IA nai kava ni agilose sa sovaraka na nona bilo e na mata-ni-siga; a sa soli vua na kaukauwa me vakamaqesataki ira na tamata e na buka-waqa.

9A ra sa qesa na tamata ni sa makausu vakalevu, a ra sa rukaka na Kalou, o koya sa veitaliataka na veimate ca o qo: a ra sa sega ni veivutuni me ra vakarokorokotaki koya.

10IA nai kalima ni agilose sa sovaraka na nona bilo ki nai tikotiko ni manumanu; a sa sinai na nona matanitu e na butobuto; a ra sa mama yamedra e na vuku ni rarawa,

11ka rukaka na Kalou ni lomalagi e na vuku ni nodra rarawa kei na nodra vidikoso, a ra sa sega ni veivutunitaka na nodrai valavala.

12IA nai kaono ni agilose sa sovaraka na nona bilo ki na uciwai levu ko Uferetisi; a sa di kina na kena wai, me caramaki kina na nodra sala na tui mai na tu-i-cake.

13Ia kaʼu a raica na yalo tawa-savasava e le tolu eratou sa vaka na boto, eratou sa mai na gusu ni gata levu, mai na gusuna talega na manumanu, mai na gusuna talega na parofita lasu.

14Ni ratou sa yalo ni veitevoro ko iratou, eratou sa kitaka na caka-mana, a ratou sa lako yani vei ira na tui ni veivanua kei vuravura taucoko, me vakasoqoni ira vata ki nai valu ni siga levu ko ya ni Kalou Kaukauwa.

15Raica, au sa lako mai me vaka na butabutako. Sa kalougata ko ko-yo sa vakatawa, a sa maroroya na nonai sulu, de lako voli ka luvawale, ia ka ra raica na nona luvawale.

16A sa vakasoqoni ira vata ko koya e na vanua na yacana e na vosa vaka-Iperiu ko Arimaketone.

17IA nai kavitu ni agilose sa sovaraka na nona bilo ki na macawa; a sa lako mai na domo levu mai na vale mai lomalagi, mai nai tikotiko-vakaturaga, a sa kaya, Sa caka oti.

18A sa so na domo ni vosa, kei na kurukuru, kei na livaliva; a sa vuki vakalevu na vanua, sa sega ni vakakina mai nai vakatekivu ni ra tiko e vuravura na tamata, me vuki vakaukauwa, ka vakalevu vakakina.

19A sa tawase vakatikitolu na koro levu, ia sa bale na veikoro e na veivanua: a sa mai vakananumi ko Papiloni na koro levu e na mata ni Kalou, me soli kina na bilo ni waini ni nona cudru waqawaqa.

20A sa dro tani yani na veiyanuyanu kecega, ia na veiulu-ni-vanua sa sega ni kune.

21A sa lutuki ira na tamata na uca-cevata levu mai lomalagi, a kena bibi e dua na taledi: a ra sa rukaka na Kalou ko ira na tamata e na vuku ni mate ca ni uca-cevata; ni sa ka levu sara na mate ca o qo.