Ai Vakatakila 15 - AI VOLA TABU（FIJ1864）

E lewe vitu na agilose sa tu vei iratou na mate ca e vitu; era sa reki ko ira sa sega ni rawai ira na manumanu, 1-4. Sa soli vei iratou na agilose na bilo e vitu, 5-8.

1IA kaʼu a raica e dua tani tale nai vakatakilakila mai lomalagi, na ka levu e veivakidacalataki, e vitu na agilose sa taura e vitu na mate ca e na kena muri sara; ni sa vakayacori sara vei ira na cudru ni Kalou.

2Ia kaʼu a raica na ka e vaka na wasawasa iloilo sa veiwaki vata kei na bukawaqa; ia ko ira era sa rawa na manumanu, kei na nona matakau, na nonai vakatakilakila, kei nai wiliwili ni yacana, era sa tu e na wasawasa iloilo, a ra sa taura na veiapi ni Kalou.

3A ra sa meketaka na meke i Mosese nai talatala ni Kalou, kei na meke ni Lami, ka kaya, A ka levu kei na ka e veivakidacalataki na nomu cakacaka, Turaga na Kalou Kaukauwa; sa dodonu ka dina na nomui valavala, o iko na nodra Tui na tamata yalosavasava.

4O cei me sega ni rerevaki iko, Turaga, ka vakarokorokotaka na yacamu? ni sai iko ga sa yalosavasava: o ira kecega na veivanua era na lako mai ka soro e matamu; ni sa vakatakilai mai na nomu lewa.

5Ia ka oti kaʼu sa vakaraica, ka raica, sa dola tu na vale ni tikina tabu ni veiyalayalati mai lomalagi:

6ia ko iratou na agilose e vitu eratou sa lako mai na vale, eratou sa taura na mate ca e vitu, eratou vakaisulu e na malo savasava sara ka vulavula, a sa vau na lomaseredratou e na veiwa koula.

7A sa dua vei iratou na ka bula e va sa solia vei iratou na agilose e le vitu na bilo koula e vitu sa sinai e na cudru ni Kalou, o koya sa bula ga ka tawa mudu.

8A sa sinai na vale e na kubou mai nai ukuuku ni Kalou, mai na nona kaukauwa talega; a sa sega na tamata sa curu rawa ki na vale ni soro, ena vakayacori mada eliu na mate ca e vitu sa taura ko iratou na agilose e vitu.