1TA kaʼu a vakaraica, ka raica, e dua na Lami sa tu e na ulu-ni-vanua ko Saioni, a sa tu vata kaya e dua na drau ka vasagavulu ka va na udolu, sa vola e na yadredra na yaca i Tamana.
2Ia kaʼu a rogoca e dua na domo mai lomalagi, e vaka na domo ni wai e vuqa, ia sa vaka na domo ni kurukuru levu: au a rogoca talega na domodra era qiria na nodra api:
3a ra sa meketaka na meke vou e na mata ni tikotiko-vakaturaga, kei na matadratou na ka bula e va, kei na matadratou na qase: a sa sega e dua sa kila rawa na meke ko ya, o ira ga na le dua na drau ka vasagavulu ka va na udolu, era sa vakabulai tu mai vuravura.
4O ira o qo era sa sega ni veikilai kei na yalewa; ni ra sa tawa vakawati. O ira o qo era sa muria na Lami e na veiyasana sa lako kina ko koya. O ira o qo era sa vakabulai maivei ira na tamata, me rai sevu ki na Kalou kei na Lami.
5A sa sega ni kune e gusudra na lasu: ni ra sa tu e na mata ni tikotiko-vakaturaga ni Kalou, ka ra sa sega ni cala.
6IA kaʼu a raica e dua tani tale na agilose sa vuka e na maliwa kei lomalagi kei vuravura, a sa taura nai tukutuku-vinaka e sega ni oti rawa, me vunautaka vei ira era sa tiko e vuravura, vei ira kece talega na veimatanitu, kei na veimataqali, kei na dui vosa vosa, kei ira na tamata,
7a sa vosa vakadomoilevu cake, ka kaya, Dou rerevaka na Kalou, ka vakarokoroko vei koya; ni sa yaco na nona gauna me lewa: ia dou soro vei koya ka buli lomalagi, kei vuravura, kei na waitui, kei na veivurevure-ni-wai.
8A sa dua tani tale na agilose sa muri, ka kaya, Sa bale, sa bale ko Papiloni, na koro levu, e na vuku ni sa vagunuvi ira kecega na veimatanitu e na waini ni cudru ni nona dautagane.
9A sa muri rau nai katolu ni agilose, a sa kaya e na domo levu, Kevaka sa soro e dua na tamata vua na manumanu kei na nona matakau, ka rawata na nonai vakatakilakila e na yadrena, se na ligana,
10ena gunuva ko koya na waini ni cudru ni Kalou, o koya sa sovaraki ka sega ni vakawai ki na bilo ni nona cudru; ena vakararawataki vakalevu talega e na buka-waqa kei na sulifure e na matadra na agilose yalosavasava, kei na mata ni Lami:
11a sa kuvu cake na kubou ni nodra yaluma ka sega ni mudu: a ra sa sega ni cegu e na siga se na bogi, ko ira sa soro vua na manumanu kei na nona matakau, kei ira era sa vakatakilakilataki e nai vakatakilakila ni yacana.
12O qo gona na nodra vosota na tamata yalododonu: sa tu eke ko ira era sa vakabauta na vosa ni Kalou, ka taura tikoga na vakabauti Jisu.
13Ia kaʼu a rogoca e dua na vosa mai lomalagi, sa kaya mai vei au, Vola, Sa kalougata mai na gauna o qo ko ira na mate era sa mate ni ra sa tu vata kei na Turaga: sa kaya na Yalo, Io, me ra vakacegu mai na nodra cakacaka; ia ena muri ira na nodrai valavala.
14Ia kaʼu a vakaraica, ka raica, sa dua na o vulavula, ia ka sa dua sa tokara na o e vaka na Luve ni tamata, a sa dua nai sala koula vakaturaga sa toka e uluna, a sa taura e dua nai sele-takelo gata na ligana.
15A sa dua tani tale na agilose sa lako mai na vale ni soro, a sa kaci vakadomoilevu vei koya sa tokara na o, Vakacuruma na nomui sele takelo, ka ia na tamusuki: ni sa yaco na gauna ni tamusuki; ni sa matua dreu na sila kei vuravura.
16A sa vakacuruma na nonai sele-takelo ki vuravura ko koya sa tiko e na o; a sa tamusuki kina na vua ni vuravura.
17A sa dua tani tale na agilose sa lako mai na vale sa tu mai lomalagi, a sa taura ko koya talega e dua nai sele-takelo gata.
18A sa duatani tale na agilose sa lako mai nai cabocabo-ni-soro, sa rawarawa vua me kitaka na buka-waqa; a sa kaci e na kacikaci levu vei koya sa taura nai sele-takelo gata, ka kaya, Vakacuruma na nomui sele-takelo gata, ka tulia nai kau vaini kei vuravura; ni sa matua dreu sara na vua ni vaini.
19A sa vakacuruma na agilose na nonai sele-takelo ki vuravura, ka tulia na vaini kei vuravura, ka biuta ki na keli-ni-waini levu ni cudru ni Kalou.
20A sa butuki na keli-ni-waini e nai bili ni koro, a sa lako mai na keli-ni-waini na dra, a sa yala ki na wa-tarovi ni ose, me rua na drau na maili.
Who We AreWhat We EelieveWhat We Do
2025 by iamachristian.org,Inc All rights reserved.
