Ai Vakatakila 13 - AI VOLA TABU（FIJ1864）

Sa tukuni na manumanu sa tubu cake mai wai, kei koya sa tubu cake mai vanua, 1-18.

1IA kaʼu a tu e na veinukunuku ni waitui, ka raica e dua na manumanu sa lako cake mai na waitui, e vitu na uluna ka tini na nona kaukamea, a sa toka e na nona kaukamea nai sala-vakaturaga e tini, a sa tu ga e na uluna na yaca ni dauvosavakacacataki.

2Ia na manumanu kaʼu a raica sa vaka na leparite, a yavana sa vaka na pera, a gusuna e vaka na gusu ni laioni: a sa solia vua na nona kaukauwa dina na gata levu, kei na nonai tikotiko, me mai turaga levu.

3Ia kaʼu a raica e dua na uluna e vaka ni sa laucoka me mate kina; a sa bula tale mai na nona vue ka kolai mate kina: a ra sa kidacala kecega na kai vuravura e na vuku ni manumanu.

4A ra sa soro vua na gata levu, o koya sa solia na kaukauwa vua na manumanu: a ra sa soro vua na manumanu, ka kaya, O cei sa vaka na manumanu o qo? o cei sa rawata me rau veivala kaya?

5A sa soli vua na gusu me vosataka na ka levu kei na vosa ca sara; a sa soli vua me turaga ka vula vasagavulu ka rua.

6A sa dalaga na gusuna me vosa ca ki na Kalou, me vosavakacacataka na yacana, kei na nona vale, kei ira era sa tiko mai lomalagi.

7A sa soli vua me veivala kei ira na tamata lotu, ka me rawai ira: a sa soli vua me turaga vei ira na veimataqali kece, kei na duivosavosa, kei na veivanua.

8Ia ena soro vua ko ira kecega era sa tiko e vuravura, ko ira sa sega ni volai na yacadra e nai vola ni bula sa nona na Lami sa vakamatei mai nai vakatekivu kei vuravura.

9Kevaka e dua sa vakadaligana, me mani rogoca sara.

10O koya sa dauia na veivakabobulataki ena vakabobulataki; o koya sa ravuravu e nai seleiwau ena mate talega e nai seleiwau. O qo na nodra vosota kei na nodra vakabauta na tamata yalododonu.

11Ia kaʼu a raica e dua tani tale na manumanu sa lako cake mai vuravura; ia sa rua na nona kaukamea me vaka na luve ni sipi, a sa vosa me vaka na gata levu.

12A sa tu vua na kaukauwa kecega ni manumanu sa liu vua, ka vakasaurarataki vuravura kina kei ira sa tiko kina me ra soro vua na manumanu sa liu, o koya ka bula e na nona vue ka kolai mate kina.

13Ia sa kitaka na ka levu e veivakidacalataki ko koya, a sa kauta mai lomalagi ki vuravura na buka-waqa e na matadra na tamata,

14a sa temaki ira era sa tiko e vuravura e na vuku ni veicaka-mana o qori sa rawata ko koya me kitaka e na mata ni manumanu; a sa kaya vei ira era sa tiko e vuravura, me ra cakava na matakau me nona na manumanu sa lausele e nai seleiwau, ka bula tikoga.

15A sa rawata ko koya o qo me solia na bula ki na matakau ni manumanu, me vosa rawa kina na matakau ni manumanu, me kitaka talega me ra vakamatei ko ira era sa sega ni via soro ki na manumanu.

16A sa vakasaurarataki ira kecega, na kaisi kei na turaga, o ira sa vutuniyau kei ira sa dravudravua, ai taukei kei na bobula, me volai e dua nai vakatakilakila e na ligadra i matau, se na yadredra:

17a sa kaya me kakua ni veivoli e dua, o koya ga sa tu vua nai vola, se na yaca ni manumanu, se nai wiliwili ni yacana.

18O qo ga na vuku. O koya sa yalomatua me mani wilika nai wiliwili ni manumanu; ni sai wiliwili ni tamata; ni sai wiliwili e ono na drau ka onosagavulu ka ono.