Ai Vakatakila 12 - AI VOLA TABU（FIJ1864）

Sa tukuni na yalewa sa vakasucu gonetagane, a sa vakacacani koya ko na gata, 1-6. Sa veivala kei na gata ko Mikaeli, a sa vukei koya na yalewa ko vuravura, 7-17.

1A SA dua na ka levu e veivakidacalataki sa rairai mai lomalagi; sa dua na yalewa sa vakaisulu e na mata-ni-siga, a sa tu e ruku ni yavana na vula, a sa vakaisala na uluna e na kalokalo e tinikarua:

2ia ni sa bukete sa qoqolou, ni sa taratara me vakasucu.

3A sa dua tale na ka e veivakidacalataki sa rairai mai lomalagi; sa dua na gata levu e damudamu, sa vitu na uluna ka tini na nona kaukamea, ka vitu nai sala-vakaturaga sa toka e uluna.

4A sa yarataka nai katolu ni wase ni kalokalo ni lomalagi na buina, ka biuti ira ki vuravura: a sa tu e na mata ni yalewa na gata levu ni sa lekai sucu, ka me kania sara na luvena ni sa qai sucu.

5A sa vakasucuma ko koya na gonetagane, sa lesi me lewai ira na veimatanitu kecega e nai titoko kaukamea: a sa kau yani na luvena me tu kaya na Kalou, e na nonai tikotiko-vakaturaga talega.

6A sa dro na yalewa ki na veikau, sa nona kina e dua na tikina ka vakarautaka ko na Kalou, me vakani kina ko koya ka siga udolu ka rua na drau ka onosagavulu.

7A sa tubu nai valu mai lomalagi; o Mikaeli kei ira na nona agilose era sa veivala kei na gata levu; a sa ia vata nai valu na gata levu kei ira na nona agilose,

8a ra sa sega ni kaukauwa: a sa sega tale ni kune e dua na nodra tikina mai lomalagi.

9A sa vakasavi tani na gata levu, na gata makawa, a yacana na Tevoro, kei Satani, o koya sa temaki ira kecega na kai vuravura: a sa biu ki vuravura, a ra sa biu vata kaya na nona agilose.

10Au sa rogoca na domo levu mai lomalagi, sa kaya, Sa qai yaco na bula, kei na kaukauwa, kei na matanitu ni noda Kalou, kei na kaukauwa ni nona Karisito: ni sa vakabalei sobu ko koya sa dau-beitaki ira na wekada, o koya o qo sa beitaki ira tikoga e na mata ni Kalou e na siga kei na bogi.

11Era sa rawai koya e na vuku ni dra ni Lami, kei na vuku ni vosa era sa vakatusa; ia era sega ni domobula, era domomate ga.

120 koya o qo mo reki kina na lomalagi, kei kemudou sa tiko kina. Oi kemudou sa tiko e vuravura kei na waitui, dou na ca! ni sa lako sobu vei kemudou na tevoro, a sa cudru vakalevu, ni sa kila ko koya ena sega ni dede na nona gauna.

13Ia ni sa kunea ko na gata ni sa biu ki vuravura, sa qai vakacacana na yalewa sa vakasucuma na gonetagane.

14A sa rua na taba ni ikeli levu sa soli vua na yalewa, me vuka kina ko koya ki na veikau ki na nona tikina, sa laʼki maroroi kina e na gauna e dua, kei na veigauna tale e so, kei na veimama ni gauna, mai na mata ni gata.

15Ia na gata levu sa luaraka na wai mai na gusuna e vaka na dobui me davemuria na yalewa, me vakacirima tani e na waluvu.

16A sa vukei koya na yalewa ko vuravura, ni sa dalaga na gusuna ko vuravura, ka sa tiloma na dobui sa luaraka na gata levu mai na gusuna.

17A sa cudruva na yalewa na gata levu, ka laʼki ia na veivala kei ira na vo ni nona kawa, o ira sa vakabauta na vosa ni Kalou, ka taura tikoga nai tukutuku kei Jisu.