Ai Vakatakila 11 - AI VOLA TABU（FIJ1864）

Sa tukuni rau na dautukutuku erau lewe rua, 1-13. Sa oti nai kania ni ka ca, a sa uvuca nai kavitu ni agilose, 14-19.

1A SA dua na gasau sa soli vei au e vaka nai titoko; a sa tu na agilose, ka kaya, Tu cake, ka vakarautaka na vale ni Kalou, kei nai cabocabo-ni-soro, kei ira era sa soro kina.

2Ia na loma-ni-bai e taudaku ni vale, kakua ni vakarautaka: ni sa soli o qori kivei ira na veimatanitu kisau: ia era na butuka na koro tabu ka vula vasagavulu ka rua.

3Ia kaʼu na solia vei rau na noqui tala tala e lewe rua, me rau vunau rawa ka siga e dua na udolu ka rua na drau ka onosagavulu, erau na vakaisulu e na ka taqarotu.

4Oi rau o qo na kau e rua na yacana na olive, kei nai tutu-ni-cina e rua sa tu e na mata ni Kalou kei vuravura.

5Ia kevaka e dua na tamata sa via vakacacani rau, sa lako mai na gusudrau na buka-waqa, ka katia sara na nodrau meca: ia kevaka e dua na tamata sa via vakararawataki rau, ena vakamatei ga vakaoqo.

6Erau sa rawata me sogoti lomalagi, me kakua ni tau kina na uca e na gauna erau sa vunau kina: erau sa rawata talega na wai kece me vakamataliataka me dra, me rau yaviti vuravura talega e na mate ca kece, me vaka na nodrau veitalia.

7Ia ni rau sa vakaotia na nodrau vunau, ena veivala kei rau na manumanu sa lako mai bulubulu sa sega ni vakabotona, ena kaukauwa vei rau ko koya, ka vakamatei rau.

8Ia ena biu na yagodrau sa mate e na sala e na saqata ni koro levu, sa vakatokai vakaibalebale ko Sotoma kei Ijipita, sa lauvako talega kina e na kauveilatai na noda Turaga.

9Ia ko ira na veimatanitu kei na veimataqali kei na duivosavosa kei na veivanua, era na raica na yagodrau sa mate ka siga tolu kei na veimama tale ni siga e dua, a ra na sega ni vakalaiva me buluti na yagodrau e nai bulubulu.

10O ira talega era tiko e vuravura era na rekitaki rau ni rau sa mate, ka ia na veimarautaki, a ra na veiyalayalati; ni rau sa vakararawataki ira era sa tiko e vuravura koi rau na parofita o qo.

11A sa oti na siga e tolu kei na veimama tale ni siga e dua, sa qai curumi rau na Yalo ni bula mai vua na Kalou, a rau sa tu cake kina e na yavadrau; a sa lutu vakalevu na rere vei ira era sa raici rau.

12A rau sa rogoca na vosa vakadomoilevu cake mai lomalagi sa kaya vei rau, Drau lako cake mai kike. A rau sa lako cake ki lomalagi e na o; a sa raici rau ko ira na nodrau meca.

13E na tiki-ni-siga ga ko ya sa vuki vakalevu kina na vanua, a sa bale nai katini ni wase ni koro, a sa le vitu na udolu na tamata sa vakamatei, ni sa vuki na vanua: o ira sa vo era sa rere, ka vakavinavinaka vua na Kalou kei lomalagi.

14Sa qai oti nai karua ni ka ca; ka raica, sa lako vakasauri sara mai nai katolu.

15SA qai uvuca nai kavitu ni agilose; a sa so na vosa vakadomoilevu mai lomalagi, sa kaya, A veimatanitu kei vuravura o qo sa yaco me nona na noda Turaga, kei na nona na nona Karisito; ia ena lewa ko koya ka sega ni mudu.

16O iratou na qase e le ruasagavulu ka va, eratou sa tiko e nodratoui tikotiko e na mata ni Kalou, eratou sa cuva vakatobocu, ka soro ki na Kalou,

17ka kaya, Keitou sa vakavinavinaka vei iko, Turaga na Kalou Kaukauwa, o sa bula edaidai, o a bula eliu, o na bula talega emuri; e na vuku ni ko sa kauta vei iko na nomu kaukauwa levu, ka lewa tiko.

18O ira na veimatanitu era sa cudru, ia ka sa yaco dina mai na nomu cudru, kei na nodra gauna na mate, me ra turisautaki kina, mo solia talega vei ira na nomui talatala na parofita na kedrai sau, vei ira talega na tamata yalosavasava, vei ira talega era rerevaka na yacamu, se ra turaga se ra kaisi; mo vakawabokotaki ira era sa vakawabokotaki vuravura.

19A sa dola na nona vale na Kalou mai lomalagi, a sa rairai e na nona vale na kato ni vola ni veiyalayalati: a sa tubu maikina na livaliva, kei na vosa, kei na kurukuru, kei na vuki na vanua, kei na uca-cevata kaukauwa levu.