1A SA uvuca nai kalima ni agilose, ia kaʼu a raica e dua na kalokalo sa lutu mai lomalagi ki vuravura: a sa soli vua nai dola kei bulubulu e sega ni vakabotona.
2A sa dolava ko koya nai bulubulu e sega ni vakabotona; a sa kuvu cake na kubou mai bulu, me vaka na kubou ni lovo levu; a sa butobuto na mata-ni-siga, kei na macawa, e na vuku ni kubou sa kuvu cake mai bulu.
3A sa lako tani mai na kubou na vodre mo tiko o vuravura: a sa soli vei ira na kaukauwa, me vaka na nodra kaukauwa na batibasaga kei vuravura.
4A sa vakaroti vei ira me ra kakua ni vakacacana na co e vuravura, se dua na ka karakarawa, se dua na kau; ia ko ira ga na tamata sa sega ni volai e na yadredra nai vakatakilakila ni Kalou.
5A sa soli vei ira me ra kakua ni vakamatei ira, ka me ra vakararawataki ira ga ka vula lima: ia na nodra rarawa e vaka na rarawa ni sa katia na tamata na batibasaga.
6E na siga o qori era na vakasaqara na mate ko ira na tamata, a ra na sega ni kunea: ia era na gadreva me ra mate, ia ena dro tani vei ira na mate.
7Ia na kedrai tovo na vodre sa vaka na ose sa vakarau me laʼki valu: ia sa toka e uludra na ka sa vaka nai sala koula, ia na matadra sa vaka na mata ni tamata.
8Ia na drau ni uludra sa vaka na drau ni ulu ni yalewa, ia na batidra sa vaka na nodra na laioni.
9Ia nai vakaruru ni lomaseredra, sa vaka na veivakaruru kaukamea ni lomasere; ia na cakucaroba ni tabadra sa vaka na rorogo ni vale-vodoki kei na ose e le vuqa ni ra sa cici ki nai valu.
10Ia na buidra sa vaka na bui ni batibasaga, a sa tiko e buidra na batidra: a ra sa rawata mo vakararawataki ira na tamata ka vula lima.
11Ia sa dua na nodra tui, na agilose ni bulubulu e sega ni vakabotona, a yacana e na vosa vaka-Iperiu ko Apatoni, ia na yacana e na vosa vaka-Kirisi ko Apolioni.
12Sa dua na ka ca sa oti; ia ka raica, sa rua tale na ka ca e sa bera ni lako mai emuri.
13IA sa uvuca nai kaono ni agilose, ia kaʼu sa rogoca e dua na vosa mai na batina e va ni cabocabo-ni-soro koula sa tu e na mata ni Kalou,
14sa kaya vua nai kaono ni agilose sa taura na davui, Sereki iratou na agilose e lewe va, eratou sa vesu tu mai na uciwai levu ko Uferetisi.
15A sa sereki ko iratou na agilose e lewe va, a ratou sa vakarau me dua na nodratou tiki-ni-siga, ka dua na nodratou siga, ka dua na vula, ka dua na yabaki, me ratou vakamatea nai katolu ni wase ni tamata.
16Ia na kedrai wiliwili nai valu sa rua na drau na oba vakaoba era sa vodo e na ose: ia kaʼu a rogoca na nodrai wiliwili.
17Ia kaʼu a raici ira na ose vakaoqo e na raivotu, kei ira sa vodo tiko kina, ai vakaruru ni lomaseredra na buka-waqa, kei na vatu damudamu, kei na sulifure: ia na uludra na ose e vaka na uludra na laioni; a sa lako tani mai na gusudra na buka-waqa kei na kubou kei na sulifure.
18A ra sa vakamatei ko ira nai katolu ni wase ni tamata, e na ka e tolu vakaoqo, e na buka-waqa, kei na kubou, kei na sulifure, sa lako mai na gusudra.
19Ni sa tu na nodra, kaukauwa e na gusudra, kei na buidra: ni samaka na gata na buidra, a ra sa vakaulu, a ra sa kitaka kina na ka ca.
20Ia ko ira na tamata sa vo era sa sega ni vakamatei e na mate ca o qo, era sa sega ni veivutuni e na cakacaka ni ligadra, me ra kakua ni soro ki na tevoro e so, kei na matakau e so sa caka e na koula, kei na siliva, kei na parasa, kei na vatu, kei na kau: o qori sa sega ni rai rawa, se rogoca, se lako voli:
21era sa sega talega ni veivutuni e na nodra daulaba, se na nodra cakacaka vakatevoro, se na nodra dauyalewa, se na nodra daubutako.
Who We AreWhat We EelieveWhat We Do
2025 by iamachristian.org,Inc All rights reserved.
