Ai Vakatakila 8 - AI VOLA TABU（FIJ1864）

E lewe vitu na agilose sa taura na davui, a sa le va sa uvuca, 1-13.

1IA ni sa cecega oti ko koya nai kavitu ni drega, sa vakanomodi ko lomalagi ka oti na veimama ni dua na tiki-ni-siga.

2Au sa raica na agilose e vitu eratou sa tu e na mata ni Kalou; a sa soli vei iratou na davui e vitu.

3A sa dua tani tale na agilose sa lako mai ka laʼki tu e na mata ni cabocabo-ni-soro, a sa taura na miqa koula; a sa soli vakalevu vua na ka-boivinaka, me cabora vata kei na masumasu ni tamata yalosavasava kecega e nai cabocabo-ni-soro koula sa tu e na mata ni tikotiko-vakaturaga.

4Ia sa kuvu cake vata na kubou ni ka-boivinaka, kei na masumasu ni tamata yalosavasava, mai na ligana na agilose ki na mata ni Kalou.

5A sa kauta na miqa na agilose, ka vakasinaita e na buka-waqa ni cabocabo-ni-soro, ka biuta ki vuravura: ia ka sa tubu na makudru ni vosa, kei na kurukuru, kei na livaliva, kei na vuki ni vanua.

6Ia ko iratou na agilose e vitu, eratou sa taura na davui e vitu, eratou sa vakarautaki iratou me ratou uvuca.

7O KOYA na kenai matai sa uvuca, ia ka sa muri mai na uca-cevata sa veiwaki vata kei na buka-waqa kei na dra, a sa biu ki vuravura: a sa vakamai kina nai katolu ni wase ni kau, a sa vakamai kecega na co karakarawa.

8SA qai uvuca nai karua ni agilose, a sa vaka ni sa biu ki waitui e dua na ulu-ni-vanua levu sa caudrevi e na buka-waqa; a sa liadra kina nai katolu ni wase ni waitui;

9a sa mate kina nai katolu ni wase ni ka kecega sa bula voli e na waitui; a sa vakarusai talega nai katolu ni wase ni veiwaqa.

10SA qai uvuca nai katolu ni agilose, a sa dua na kalokalo levu sa lutu mai lomalagi, a sa caudre me vaka na cina, a sa lutu ki nai katolu ni wase ni veiuciwai, kei na veivurevure-ni-wai;

11ia na yaca ni kalokalo na Gagaduvaduva; a sa gaga kina nai katolu ni wase ni wai; a sa vuqa kina na tamata sa mate e na veiwai, ni ra sa gaga.

12A SA uvuca nai kava ni agilose, a sa yaviti kina nai katolu ni tiki ni mata-ni-siga, kei nai katolu ni tiki ni mata-ni-vula, kei nai katolu ni wase ni veikalokalo: a sa butobuto kina vei ira nai katolu vei ira, a sa sega ni rarama nai katolu ni wase ni siga, kei na bogi talega.

13Ia kaʼu a raica, ka rogoca e dua na agilose sa vuka e na maliwa kei lomalagi, a sa kaya e na domo levu, E ca, e ca, e ca, vei ira sa tiko o vuravura, o na vuku ni domo ni nodratou davui na agilose e tolu, o koya sa bera ni uvu!