Ai Vakatakila 7 - AI VOLA TABU（FIJ1864）

Sa volai ko ira e so e na veiyavusa i Isireli, kei ira era lewe vuqa mai na veivanua: sa tukuni ira ko koya era sa tu e na mata ni tikotiko ni Kalou, 1-17.

1IA ni sa oti na veika o qo kaʼu a raica na agilose e le va eratou sa tu e na tutu i vuravura e va, ka taura na cagi e va kei vuravura, me kakua ni liwa ki vuravura na cagi, se ki na Wasawasa, se ki na dua na kau.

2Ia kaʼu a raica e dua tani tale na agilose sa lako mai na tu-i-cake, a sa tu vua na nona vatu ni drega na Kalou bula; a sa kaci vakadomoilevu ko koya vei iratou na agilose e va, o iratou sa soli kina me ratou vakacacani vuravura kei na wasawasa,

3ka kaya, Tei kakua ni vakacacani vuravura, se na wasawasa, se na kau, ka malua me keitou vola mada na yadredra na tamata ni noda Kalou.

4Au a rogoca na kedrai wiliwili era sa volai: sa udolu vakadrau ka vasagavulu ka va talega na udolu, vei ira kecega na nodra veiyavusa na luve i Isireli.

5Vei ira na yavusa i Juta sa volai e udolu vakatinikarua. Vei ira na yavusa i Rupeni sa volai e udolu vakatinikarua. Vei ira na yavusa i Kata sa volai e udolu vakatinikarua.

6Vei ira na yavusa i Aseri sa volai e udolu vakatinikarua. Vei ira na yavusa i Nafitali sa volai e udolu vakatinikarua. Vei ira na yavusa i Manase sa volai e udolu vakatinikarua.

7Vei ira na yavusa i Simioni sa volai e udolu vakatinikarua. Vei ira na yavusa i Levi sa volai e udolu vakatinikarua. Vei ira na yavusa i Isakari sa volai e udolu vakatinikarua.

8Vei ira na yavusa i Sepuloni sa volai e udolu vakatinikarua. Vei ira na yavusa i Josefa sa volai e udolu vakatinikarua. Vei ira na yavusa i Penijamini sa volai e udolu vakatinikarua.

9Sa oti o qo kaʼu sa vakaraica, ka raica, sa dua nai soqosoqo levu sara, e sega e dua na tamata e wilika rawa, mai na veivanua kece, kei na veimataqali, kei na veimatanitu, kei na duivosavosa, era sa tu e na mata ni tikotiko-vakaturaga, kei na mata ni Lami, era vakaisulu e nai sulu vulavula, ka taura nai viu na ligadra;

10a ra sa kaci vakadomoilevu cake, ka kaya, A vu ni bula na noda Kalou, o koya sa tiko e nai tikotiko-vakaturaga, ko na Lami talega.

11O ira kecega na agilose era sa tu ka vakavolivolita nai tikotiko-vakaturaga, kei iratou na qase kei na ka bula e va, ka cuva vakatobocu e na mata ni tikotiko-vakaturaga, ka soro ki na Kalou,

12ka kaya, Emeni: Na vakamolimoli, kei nai ukuuku, kei na vuku, kei na vakamalua, kei na vakarokoroko, kei na kaukauwa, kei na qaqa, me nona ga na noda Kalou ka tawa mudu. Emeni.

13A sa qai vosa e dua na qase, ka tarogi au, O cei beka ko ira o qo sa vakaisulu e nai sulu vulavula? ka ra lako beka maivei?

14Au sa qai kaya vua, O iko, saka, ko sa kila. A sa kaya ko koya vei au, O ira o qo era sa lako mai na veivakararawataki levu, ia era sa sava nodrai sulu, ka vakavulavulataka e na dra ni Lami.

15O koya era sa tu kina e na mata ni tikotiko ni Kalou, a ra sa qaravi koya e na Siga kei na bogi e nona vale-ni-soro; ia ena tiko vata kei ira ko koya sa tiko enai tikotiko-vakaturaga.

16Era na sega ni viakana tale, se viagunu tale; ena sega ni cilavi ira na siga, se dua na ka e makausu.

17Ni na vakani ira ko na Lami sa tiko e na loma ni tikotiko-vakaturaga, ka na tuberi ira ki na vurevure ni wai bula: ia ena tavoya kecega ko na Kalou na wai ni mata mai na matadra.