Ai Vakatakila 5 - AI VOLA TABU（FIJ1864）

Sa raica ko Joni e dua nai vola sa dregati tu, a sa sega e dua e tevuka rawa, sa qai cecega ka tevuka ko na Lami, a ra sa vakavinavinaka vua na kai lomalagi, 1-14.

1AU a qai raici koya sa tiko e nai tikotiko-vakaturaga ka taura nai vola na ligana i matau, ko ya sa vola eloma kei na dakuna talega, sa dregati tu e na drega e vitu.

2Au a raica na agilose kaukauwa talega, o koya sa kacikaci vakadomoilevu, ka kaya, O cei sa yaga me tevuka nai vola, ka cecega na kena drega?

3A sa sega e dua mai lomalagi, se vuravura, se ruku i vuravura, sa rawata me tevuka nai vola, se raica rawa kina.

4Ia kaʼu a tagi vakalevu, ni sa sega ni kune e dua e yaga me tevuka nai vola, ka wilika, se raica ki lomana.

5Sa qai kaya vei au e dua na qase, Mo kakua ni tagi: raica, sa gumatua na Laioni ni yavusa i Juta, na waka i Tavita, me tevuka nai vola, me cecega talega na kena drega e vitu.

6Au a qai raica, ka raica, sa dua na Lami sa tu e loma ni tikotiko-vakaturaga kei na kedratou maliwa na ka bula e lewe va, kei na kedratou maliwa na qase, o koya sa vakataka na Lami sa qai vakamatei, e vitu na nona kaukamea e uluna, ka vitu na matana, o iratou ga o qo na yalo ni Kalou e lewe vitu eratou sa talai ki vuravura taucoko.

7A sa lako mai ko koya ka kauta nai vola mai na ligana i matau sa tiko e nai tikotiko-vakaturaga.

8Ni sa kauta nai vola ko koya, sa cuva sobu e na mata ni Lami ko iratou na ka bula e le va, kei iratou na qase e le ruasagavulu ka va eratou tauyadua na api, kei na bilo koula sa sinai e na ka boivinaka, o qori na nodra masu na tamata yalosavasava.

9Eratou sa meketaka na meke vou, ka kaya, O iko ko sa yaga me kauta nai vola, me cecega talega na kena drega: ni ko a vakamatei, ka voli keimami e na nomu dra maivei ira kecega na veimataqali, kei na duivo-savosa, kei na veimatanitu, kei na veivanua, me keimami nona na Kalou:

10ia ko sa qisi keimami me keimami tui, me keimani bete talega, vua na neimami Kalou; ia keimami na lewa tiko e vuravura.

11Au a qai raica, ia kaʼu a rogoca na domo ni agilose e lewe vuqa, o ira era sa vakavolivolita nai tikotiko-vakaturaga, kei iratou na ka bula kei iratou na qase: ia na kedrai wiliwili sa oba vakatini na udolu, ka vuqa tale yani na udolu;

12era sa kaya e na domo levu, Sa yaga na Lami ka vakamatei, me soli vua na kaukauwa, kei nai yau, kei na vuku, kei na qaqa, kei na veidokadokai, kei na vakarokoroko, kei na vakavinavinaka.

13Ia na ka kece mai lomalagi, kei vuravura, ka e ruku i vuravura, ka e na wrai-tui, kei na ka kecega sa tu kina, au a rogoca ni ra kaya, Me ia vua sa tiko e nai tikotiko-vakaturaga, vei koya talega na Lami, na vakavinavinaka, kei na vakarokoroko, kei nai ukuuku, kei na kaukauwa, ka tawa mudu.

14Eratou sa vakaemeni ko iratou na ka bula e le va. A ratou sa cuva sobu ko iratou na qase e ruasagavulu ka va, ka soro vei koya sa bula tikoga ka tawa mudu.