Ai Vakatakila 4 - AI VOLA TABU（FIJ1864）

Sa tukuna ko Joni na ka vakalomalagi e so sa raica, 1-11.

1SA oti o qo kaʼu sa qai raica tale, ka raica, sa dola e dua na katuba mai lomalagi: ia nai matai ni vosa kaʼu a rogoca sa vaka sa vosa vei au na davui; ka kaya, Lako cake mai kike, au na vakatakila vei iko na ka ena yaco mai e na gauna maimuri.

2Sa qai curumi au vakasami na Yalo: ka raica, sa caka nai tikotiko-vakaturaga mai lomalagi, a sa dua sa tiko kina.

3Ia ko koya sa tiko kina, sa rairai me vaka na jasipa kei na saritonikisa: a sa dua na drodrolagi sa vakavolivolita nai tikotiko-vakaturaga, sa rairai me vaka na emeralita.

4A sa ruasagavulu ka va nai tikotiko sa vakavolivolita nai tikotiko-vakaturaga: ia kaʼu sa raica e ruasagavulu ka va na qase sa tiko e nai tikotiko, era sa vakaisulu e nai sulu vulavula; a sa vakaisala na uludra e nai sala koula.

5A sa lako mai nai tikotiko-vakaturaga na livaliva kei na kurukuru kei na vosa; a sa vitu na cina ni buka sa caudre tiko e na mata ni tikotiko-vakaturaga, o ira ga o qo na yalo ni Kalou eratou lewe vitu.

6A sa tu e na mata ni tikotiko-vakaturaga na wasa iloilo e vaka na karisitala: a sa tiko e va na ka bula e loma ni tikotiko-vakaturaga, ka vakavolivolita, a sa vakamatana sara na matadra kei na dakudra.

7Ia sa vaka na laioni nai matai ni ka bula, a sa vaka na luve ni karavau nai karua, a sa mata vakatamata nai katolu, a sa vaka na ikeli vakatabana nai kava.

8O iratou o qo na ka bula eratou sa lewe va eratou sa tauyaono na tabadratou; a sa vakamatana sara na lomadratou; ia eratou sa sega ni bau cegu e na siga se na bogi, era kaya tikoga, E dodonu, e dodonu, e dodonu, na Turaga na Kalou Kaukauwa, o koya ka bula eliu, ka sa bula edaidai, ena bula talega maimuri.

9Ia ni ratou sa vakarokoroko ko iratou na ka bula ko ya vei koya sa tiko e nai tikotiko-vakaturaga, o koya sa bula tawa mudu, ka ratou sa dokai koya, ka vakavinavinaka vei koya,

10sa qai cuva sobu ko ira na qase e ruasagavulu ka va e matana sa tiko e nai tikotiko-vakaturaga, ka soro vei koya sa bula ga ka tawa mudu, ka biuta na nodrai sala e na mata ni tikotiko-vakaturaga, ka kaya,

11Turaga, e dodonu me ia vei iko na vakarokoroko kei na veidokadokai, kei na kaukauwa: ni ko a bulia na ka kecega, era sa buli ga ka tu dei talega e na nomu veitalia,