1MO vola vua talega nai talatala ni vavakoso lewe ni soro mai Sariti: Sa tukuna na veika o qo ko koya sa taura na yalo ni Kalou e lewe vitu, kei na kalokalo e vitu: Au sa kila na nomu cakacaka, ni sa yacamu walega na bula, o sa mate ga.
2Mo vakatawa, ka vakaukauwataka na ka sa vo vei iko, o qori sa voleka ni mate; niʼu sa sega ni kunea na nomu cakacaka me vinaka sara e na mata ni Kalou.
3Vakananuma na nomu vakabauta kei na nomu rogoca, ka taura matua, ka veivutuni. Ia kevaka ko na sega ni vakatawa, au na lako mai vei iko me vaka na daubutako, ia ko na sega ni kila na tiki-ni-siga kaʼu na lako mai kina vei iko.
4Sa tu ga vei iko mai Sariti e lewe vica ga era sa sega ni vakadukadukalitaka na nodrai sulu; a ra na lako voli kei au e nai sulu vulavula: ni ra sa yaga.
5O koya sa gumatua, ena vakaisulu e nai sulu vulavula; au na sega ni bokoca na yacana mai nai vola ni bula, ia kaʼu na vakatusa na yacana e na mata i Tamaqu, e na matadra talega na nona agilose.
6O koya sa vakadaligana, me mani rogoca sara na ka sa tukuna na Yalo vei ira na veivavakoso lewe ni soro.
7MO vola vua talega nai talatala ni vavakoso lewe ni soro mai Filatelifia: Sa tukuna na veika o qo ko koya sa yalosavasava, o koya sa dina, o koya sa taura nai dola i Tavita, o koya sa dolava, ka sega na tamata me sogota; ka sogota, ka sega na tamata me dolava:
8Au sa kila na nomu cakacaka: raica, au sa tura e matamu na katuba sa dola tu, ka sega na tamata sa sogota rawa: ni sa tu ga vakalailai vei iko na kaukauwa, ia ko sa taura tikoga na noqu vosa, ka sa sega ni cakitaka na yacaqu.
9Raica, kaʼu na qisi ira mai na vale ni lotu i Satani, era sa kaya era sa Jiu, ia ka ra segai, era sa bau lasu ga; raica, kaʼu na qisi ira me ra lako mai me ra cuva e ruku ni yavamu, me ra kila ni kaʼu a lomani iko ga.
10E na vuku ni ko sa vakabauta na noqu vosa mo vosota ga, kaʼu na qarauni iko talega mai na tiki-ni-siga ni dauveivakatovolei, ko ya ena lako mai ki vuravura kecega, me vakatovolei ira sa tiko e vuravura.
11Raica, kaʼu na lako vakasauri mai: taura matua na ka sa tu vei iko, me kakua ni kauta na nomui sala vakaturaga na tamata tani.
12Au na qisi koya sa gumatua me duru e na vale ni soro ni noqu Kalou, ia ena sega ni lako tani mai ki tautuba: ia kaʼu na volai koya e na yaca ni noqu Kalou, kei na yaca ni koro ni noqu Kalou, o Jerusalemi vou, o koya sa lako sobu mai lomalagi mai vua na noqu Kalou: ia na yacaqu vou.
13O koya sa vakadaligana, me mani rogoca sara na ka sa tukuna na Yalo vei ira na veivavakoso lewe ni soro.
14MO vola vua talega nai talatala ni vavakoso lewe ni soro mai Leotisea: Sa tukuna na veika o qo na Emeni, o koya sa dautukuna na ka dodonu ka dina, ai vakatekivu ni cakacaka ni Kalou:
15Au sa kila na nomu cakacaka, o sa sega ni batabata se katakata: au sa vinakata mo batabata se katakata.
16Ni ko sa katakata vakalailai ga, ka sega ni batabata se katakata, kaʼu na luaraki iko mai na gusuqu.
17Ni ko sa kaya tiko, Au sa vutuniyau, ka levu tu na noqui yau, ka sega na ka kaʼu sa dravudravua kina; ia ko sa sega ni kila ni ko sa ca ga, ka rarawa, ka dravudravua, ka mataboko, ka luvawale:
18au sa vakavulici iko mo volia maivei au na koula sa vakatovolei e na buka-waqa, mo vutuniyau kina; kei nai sulu vulavula, mo vakaisulu kina, me kakua ni rairai na nomu luvawale e veivakamaduataki; mo tauca talega na matamu e nai tau ni mata, mo rai rawa.
19O ira kecega kaʼu sa lomana, kaʼu sa vunauca ka yavita: mo gumatua kina, ka veivutuni.
20Raica, kaʼu sa tu e na mata ni katuba, ka tukituki: kevaka sa rogoca na domoqu e dua na tamata, ka dolava na katuba, au na curu vua, ka vakayakavi vata kaya, o koya vata talega kei au.
21Au na solia vua sa gumatua sara me tiko vata kei au e na noqui tikotiko-vakaturaga, me vaka kaʼu sa gumatua, ka tiko sobu e nai tikotiko-vakaturaga nei Tamaqu.
22O koya sa vakadaligana, me mani rogoca sara na ka sa tukuna na Yalo vei ira na veivavakoso lewe ni soro.
Who We AreWhat We EelieveWhat We Do
2025 by iamachristian.org,Inc All rights reserved.
