1MO vola vua nai talatala ni vavakoso lewe ni soro mai Efeso; Sa tukuna na veika o qo ko koya sa taura na kalokalo e vitu na ligana i matau, o koya sa lako voli e na kedra maliwa nai tutu-ni-cina koula e vitu:
2Au sa kila na nomui valavala, kei na nomu oca kei na nomu dauvosota, ni ko sa sega tale ni vosoti ira era sa ca; o sa vakatovolei ira talega era sa kaya era sai apositolo, a ra sa segai, o sa kunei ira ni ra sa daulasu ga:
3ia ko sa lomavinaka ga, ka vosota tiko, ka oca e na vuku ni yacaqu, ka sega ni guca.
4Ia ka so ga na ka ko sa ca kina, e na vuku ni ko sa biuta na nomu loloma ka tu vei iko eliu.
5Mo nanuma ga na ka ko sa lutu tani maikina; ia mo veivutuni, ka cakava na cakacaka taumada; ia kevaka sa segai, kaʼu na lako vakasauri mai vei iko, ka kauta tani na nomui tutu-ni-cina mai na kena tikina, kevaka ko sa tawa veivutuni.
6Ia na ka ga o qo sa tu vei iko, ni ko sa cata na nodrai valavala nai tokani i Nikola, o qori kaʼu sa cata koi au talega.
7O koya sa vakadaligana, me mani rogoca sara na ka sa tukuna na Yalo vei ira na veivavakoso lewe ni soro: Vei koya sa gumatua kaʼu na solia me kania na kau ni bula, ko ya sa tu e loma ni parataisi ni Kalou.
8MO vola vua talega nai talatala ni vavakoso lewe ni soro mai Simurina: Sa tukuna na veika o qo ko koya sa liu sara ka muri sara, o koya ka mate, a sa qai bula tale:
9Au sa kila na nomu cakacaka, kei na nomu dauvakararawataki, kei na nomu dravudravua (ia ko sa vutuniyau ga), kei na nodra vosa ca era kaya era sa Jiu, ka ra sa segai, era vale ni lotu i Satani ga.
10Kakua ni rerevaka e dua na ka ko na vosota: raica, ena biuti kemudou e so ki na vale ni veivesu na tevoro, mo dou vakatovolei kina; ia dou na vakararawataki ka bogi tini: mo gumatua me yacova na mate, au na qai solia vei iko nai sala ni bula.
11O koya sa vakadaligana, me mani rogoca sara na ka sa tukuna na Yalo vei ira na veivavakoso lewe ni soro: O koya sa gumatua sara ena sega ni ca e nai karua ni mate.
12MO vola vua talega nai talatala ni vavakoso lewe ni soro mai Perikamo: Sa tukuna na ka o qo ko koya sa taura nai seleiwau veiyamenayaki:
13Au sa kila na nomu cakacaka, kei na yasana ko sa tiko kina, sa tiko talega kina nai tikotiko i Satani: ia ko sa taura matua na yacaqu, ia ko sa sega ni cakitaka na noqu lotu e na siga sa vakatusai au dina kina ko Anitipa, o koya sa vakamatei e na kemudou maliwa, a yasana sa tiko kina ko Satani.
14Ia ka so ga na ka ko sa ca kina, e na vuku ni sa tiko vei iko ko ira era sa vakabauta nai vakavuvuli i Palami, o koya ka vakavulici Palaki me biuta na veivakacalai e na matadra na luve i Isireli, me ra kania na ka sa vakacabori oti ki na veimatakau, me ra dauyalewa talega.
15Sa tu talega vei iko ko ira sa vakatavulica tiko na nodrai vakavuvuli nai tokani i Nikola, o qori na ka kaʼu sa cata.
16Mo veivutuni mada; kevaka e segai, kaʼu na lako vakasami sara mai vei iko, ka veivala kei ira e nai seleiwau ni gusuqu.
17O koya sa vakadaligana, me mani rogoca sara na ka sa tukuna na Yalo vei ira na veivavakoso lewe ni soro: Au na solia vei koya sa gumatua, me kania na mana vuni, au na solia talega vua na vatu vulavula, a vatu ga ko ya ena volai kina na yaca vou ena sega e dua me kila, o koya ga sa soli kina.
18MO vola talega vua nai talatala ni vavakoso lewe ni soro mai Ciateira: Sa tukuna na veika o qo na Luve ni Kalou, o koya sa vaka na yameyame ni buka na matana, kei na yavana e vaka na parasa matavinaka:
19Au sa kila na nomu cakacaka, kei na dauloloma, kei na dauveiqaravi, kei na vakadinata, kei na nomu dauvosota, kei na nomu daucakacaka; ia o qori emuri sa uasivia o qori sa liu.
20Ia ka sa vica ga na ka ko sa ca kina, e na vuku ni ko sa laiva na yalewa ko ya ko Isepeli, o koya sa vakatokai koya talega me parofita, me vakavulici ira ka vecei ira na noqu tamata me dauyalewa, ka kania na ka sa vakacabori oti ki na veimatakau.
21Ia kaʼu a solia vua na gauna me veivutuni kina e na nona dautagane; a sa sega ni veivutuni.
22Baica, kaʼu na biuti koya ki nai mocemoce, kei ira sa vakadauca ki na rarawa levu, kevaka era sa sega ni veivutuni e na nodrai valavala.
23Ia kaʼu na vakamatei ira na luvena e na mate; ia ena kila kina kecega na veivavakoso lewe ni soro niʼu sa dikeva na ivi kei na uto ni tamata; ia kaʼu na solia yadua talega vei kemudou me vaka na nomudoui valavala.
24Ia kaʼu sa kaya kivei kemudou, kei ira sa vo mai Ciateira, ko ira kece era sa sega ni vakabauta nai vakavuvuli o qo, ko ira era sa sega ni kila na kena titobu kei Satani, me vaka na ka era sa vosataka; au na sega ni biuta vei kemudou na ka tani e bibi.
25Ia na ka sa tu ga vei kemudou, dou taura matua ka malua kaʼu na lako tale mai.
26Ia ko koya sa gumatua sara, ka vakabauta na noqu cakacaka me yaco mada nai otioti, au na solia vua me veitaliataka na veimatanitu:
27ia ena lewai ira ko koya e nai titoko kaukamea: ena vorolaki ira me ra matailalai me vaka na veibilo ni dautuli bilo: io, me vaka na ka kaʼu sa vakarogoca maivei Tamaqu.
28Ia kaʼu na solia talega vua ua kalokalo i vola siga.
29O koya sa vakadaligana, me mani rogoca sara na ka sa tukuna na Yalo kivei ira na veivavakoso lewe ni soro.
Who We AreWhat We EelieveWhat We Do
2025 by iamachristian.org,Inc All rights reserved.
