Ai Vakatakila 1 - AI VOLA TABU（FIJ1864）

A WASE I. —Sa tukuna ko Joni ni sa rairai mai vei koya ko Jisu, ka kaya vua me vola nai vola o qo, 1-20.

1AI Vakatakila kei Jisu Karisito, o koya sa solia ko na Kalou vei koya, me vakaraitaka vei ira na nonai talatala na ka sa voleka ni yaco mai; a sa tala ko koya na nona agilose me tukuna vei Joni na nonai talatala:

2o koya ka tukuna na vosa ni Kalou, kei nai tukutuku kei Jisu Karisito, kei na ka kece sara sa raica ko koya.

3Sa kalougata ko koya sa wilika, kei ira era sa rogoca na vosa ni parofisai o qo, ka vakabauta na ka sa volai kina; ni sa voleka na kena gauna.

4O JONI vei ira nai vavakoso lewe ni soro e vitu mai Esia: Me nomudou na loloma, kei na vakacegu, maivei koya sa bula edaidai, ka bula eliu, ena bula talega maimuri; maivei iratou talega na yalo e vitu eratou sa tiko e na mata ni nonai tikotiko-vakaturaga;

5maivei Jisu Karisito talega, na dautukutuku yalodina, na ulumatua vei ira era sa tu cake tale mai na mate, kei na nodra Turaga levu na tui e vuravura. Vei koya sa lomani keda, ka savai keda mai ua nodai valavala ca e na nona dra dina,

6a sa qisi keda me da tui ka bete vua na Kalou kei Tamana; me sa ia vei koya na vakarokoroko kei na lewa ka tawa mudu. Emeni.

7Raica, e lako mai ko koya e na o: ka na raici koya na matada kecega, ko ira talega era a cokai koya: ena tagi sara e na vukuna ua veimataqali kecega e vuravura. Me vaka ga o qo. Emeni.

8Sa kaya na Turaga na Kalou, Oi au ga na Alifa kei na Omeka, ai vakatekivu kei nai vakataotioti, o koya sa bula edaidai, ka bula eliu, ena bula talega maimuri, na Kaukauwa.

9Oi au ko Joni, oi au na wekamudou talega, kei nai tokani e na veivakacacani, kei na matanitu kei na vosota nei Jisu Karisito, au a tiko e na yanuyanu ko Patimo, e na vuku ni vosa ni Kalou, kei nai tukutuku i Jisu Karisito.

10Keirau a tiko kei ua Yalo e na siga ni Turaga, ia kaʼu a rogoca e dakuqu na domo levu, e vaka ua davui,

11ni sa kaya, Oi au na Alifa kei na Omeka, ko koya sa liu sara, ko koya ena muri sara talega: ia, Na ka ko sa raica, mo vola e nai vola, ka talaki ki nai vavakoso lewe ni soro e vitu mai Esia: ki Efeso, kei Simurina, kei Perikamo, kei Ciateira, kei Sariti, kei Filatelifia, kei Leotisea.

12Au a qai rai vuki me raica na domona sa vosa vei au. Ia niʼu sa rai vuki oti, sa vitu nai tutu-ni-cina koula kaʼu sa raica;

13ia sa tu e dua e na kedra maliwa nai tutu-ni-cina e vitu, e vakataki koya na Luve ni tamata, sa vakaisulu e nai sulu sa yaco sara ki na yavana, ka vauci na lomaserena e nai vau koula.

14Sa vulavula na uluna kei na drau ni uluna me vaka na vutika ni sipi, me vaka na vulavula ni uca-vulavula; ka vaka na yameyame ni buka na matana;

15kei na yavana sa vaka na parasa matavinaka, me vaka ni sa vakaririgi e na kuro; a sa vaka na domo ni veiwai e vuqa na domona.

16E vitu na kalokalo sa taura na ligana i matau: ia ka sa lako mai na gusuna nai seleiwau gata veiyamenayaki; ia na matana sa vaka na mata-ni-siga ni sa cila vakaukauwa.

17Ia niʼu sa raici koya, kaʼu sa bale sara ki yavana me vaka e dua sa ciba. A sa tabaki au e na ligana i matau, ka kaya vei au, Kakua ni rere; oi au ko koya sa liu sara, ko koya ena muri sara talega:

18o koya sa qai bula, kaʼu a mate eliu; ka raica, au sa bula ka tawa mudu, Emeni; au sa taura talega nai dola kei etesi kei na mate.

19Ia na veika ko sa raica oti mo vola, kei na veika sa tu, kei na veika ena yaco maimuri;

20na ka vuni ni kalokalo e; vitu, o koya ko a raica e na ligaqu i matau, kei nai tutu-ni-cina koula e vitu: A kalokalo e vitu sa nodrai talatala nai vavakoso lewe ni soro e vitu: ia nai tutu-ni-cina e vitu ko a raica, na veivavakoso lewe ni soro e vitu.