Ai Vola I Juta 1 - AI VOLA TABU（FIJ1864）

Sa vakarota vei ira na tamata lotu ko Juta me ra gumatua, 1, 2. Sa qai tukuni ira na tamatai vakavuvuli ca, kei na ka ca ena yaco vei ira, 3-16. Sa vakavulici ira tale na tamata lotu dina, a sa tinia na nonai vola, 17-25.

1O JUTA, nai talatala i Jisu Karisito, kei na taci i Jemesi, vei ira sa vakasavasavataki ira ko na Kalou na Tamada, a ra sa maroroi ni ra sa tu vata kei Jisu Karisito, era sa kacivi:

2Me vakalevutaki vei kemudou na yalololoma, kei na vakacegu, kei na loloma.

3Oi kemudou sa lomani, niʼu a gumatua me vola vei kemudou e na bula sa noda kecega, sa dodonu vei au meʼu vola vei kemudou, ka vakarota vei kemudou mo dou gumatua sara me maroroya na vakabauta sa soli eliu vei ira era sa lotu.

4Ni sa yaqa lo curu mai na tamata e so, era sa volai eliu me ra cudruvi kina, a tamata tawa-lotu, era sa vakamataliataka na loloma ni Kalou me ka vakasisila, a ra sa cakitaki koya na Turaga na Kalou duaduaga, kei na noda Turaga ko Jisu Karisito.

5O koya o qo kaʼu na vakasa kina na lomamudou, mo dou nanuma, ia dou a kila eliu, ni sa vakabulai ira oti na tamata mai Ijipita na Turaga, sa qai vakarusai ira emuri era sa tawa vakabauta.

6O ira talega na agilose era sa sega ni tu dei ni ra turaga, a ra sa biuta na nodrai tikotiko, a sa maroroi ira ko koya e na sinucodo tawa mudu, e na butobuto, me yaco mada na siga ni lewa.

7Sa vakakina ko Sotoma kei Komora, kei na veikoro e voleka era vakakina, ni ra sa soli ira me ra dauyalewa, a ra sa muria na lewe tani, era sa viritu kina mei vakarau, ni ra sa vakararawataki ni ra sa cudruvi tiko e na buka-waqa tawa mudu.

8Sa vaka talega kina ko ira o qo na dautadra dukadukali era sa vakadukadukalitaka na yagodra, era sa bese ni lewai, a ra sa vosavakacacataki ira na turaga.

9Io, ko Mikaeli na agilose levu, ni sa veileti tiko kei na tevoro, ka veiletitaka na yago i Mosese, sa tawa doudou me vosavakacacataki koya, a sa kaya, Me cudruvi iko ko na Turaga.

10Ia ko ira o qo, era sa vosavakacacataka na ka era sa lecava; ia na ka era sa kila vakai ira, me vaka na manumanu lialia, e na veika o qo era sa vakacacani ira.

11Ena ca ko ira! ni ra sa muria na sala i Keni, a ra sa garova ka ciciva na caka cala i Palami me ra vakaivoli kina, a ra sa rusa e na vosa vakatani i Kori.

12O ira o qo na duka e na nomudou veisolevu ni loloma, ni ra sa cakava vata kei kemudou na solevu, a ra sa vakani ira ka tawa rere: o ira o qo na o sa sega kina na wai, sa veikauyaki e na cagi; a kau sa malai na vuana, sa tawa vua, sa mate vakarua, sa cavu sara na wakadra:

13a na ni waitui sa cudrucudru, sa vusolaka na nodra ka e veivakamaduataki; a kalokalo sa veilakoyaki, sa maroroi me nodra na butobuto loaloa sa tawa mudu.

14Ia ko Inoki talega, nai kavitu sa muri Atama, sa parofisaitaki ira o qo, ka kaya, Raica, sa lako vata mai na Turaga, kei na nona yalosavasava e udolu vakatini:

15me cudruvi ira kecega, ka vunauci ira kecega era sa tawa-lotu, e na vuku ni nodrai valavala ca kecega era sa tawa-lotu kina, kei na nodra qaqa era sa vosavakacacataki koya kina ko ira era sa tawa-lotu.

16O ira o qo na dauvosakudrukudru, na daudidi, era sa muria na nodra gadreva ca; a sa vosataka na vosa levu sara na gusudra, a ra sa daudokai ira na tamata e so mc ra vakaiyau kina vei ira.

17Ia koi kemudou sa lomani, dou nanuma na vosa eratou sa tukuna eliu ko iratou nai apositolo ni noda Turaga ko Jisu Karisito;

18ni ratou sa tukuna vei kemudou ni na so na dauveivakasewasewani e na gauna emuri, era na daumuria ga na nodra gadreva ca era sa tawa-lotu.

19O ira o qo era sai ira sa tawasei ira tani, era sa dau-yalovakalewena, a sa sega ni tu na Yalo vei ira.

20Ia koi kemudou sa lomani, dou veivakatataki kemudou cake vakai kemudou e na nomudou vakabauta savasava sara, dou masu ga e na Yalo Tabu,

21dou maroroi kemudou mo dou tu ga e na loloma ni Kalou, ka namaka na loloma ni noda Turaga ko Jisu Karisito ki na bula tawa mudu.

22Ia dou lomani ira sara e so, kakua ni vakatauvatana:

23ia ko ira e so, vakabulai ira e na rere, ni dou sa kaliraki ira mai na buka-waqa; ni dou sa cata nai sulu sa dukadukali e na yalomakawa.

24Me qai ia vua sa rawata me tauri kemudou mo dou sega ni bale, me vakaraitaki kemudou talega e na matana vakaiukuuku e na marau vakaidina sara ni dou sa tawa cala,

25me ia vua na Kalou na nodai Vakabula sa vuku duaduaga, na vakarokoroko kei na Vakaturaga, na veitalia kei na kaukauwa, edaidai ka tawa mudu. Emeni.