I. Ai Vola I Joni 5 - AI VOLA TABU（FIJ1864）

Sa lomani ira na tamata lotu dina ko ira na luve ni Kalou, a ra sa muria na vosa ni Kalou, 1-5. A Luve ni Kalou ko Jisu kei na nodai Vakabula, a sa rogoca ko koya na noda masu, 6-21.

1O KOYA yadua sa vakadinata ni sa Karisito ko Jisu, sa vakasucumi koya oti ko na Kalou: ia ko koya yadua sa lomani koya sa vakasikava, sa lomani koya talega sa vakasikavi.

2E na ka o qo eda sa kila kina ni da sa lomani ira na luve ni Kalou, kevaka eda sa lomana na Kalou, ka muria na nona vunau.

3Ni sai koya o qo na loloma vua na Kalou, me da muria na nona vunau: a sa sega ni ka bibi na nona vunau.

4Ni sa rawai vuravura ko koya yadua sa vakasucumi koya ko na Kalou; ia na qaqa eda sa rawai vuravura kina o qo, a noda vakabauta.

5O cei sa rawai vuravura, o koya duaduaga sa vakadinata ni sa Luve ni Kalou ko Jisu?

6O koya o qo ka lako mai kei na wai kei na dra, o Jisu Karisito; sa sega kei na wai walega, a ya kei na wai kei na dra. Ia sai koya na Yalo sa vakadinadina, e na vuku ni sa dina na Yalo.

7Ni ratou sa lewe tolu sa tukutuku mai lomalagi, a Tamada, kei koya na Vosa, kei koya na Yalo Tabu; ia ka sa dua bauga na lewe tolu o qo.

8A ratou sa lewe tolu sa tukutuku e vuravura, a yalo, kei na wai, kei na dra; a ratou sa tukutuku vata na lewe tolu o qo.

9Kevaka eda sa vakabauta na nodrai tukutuku na tamata, sa uasivi cake kina nai tukutuku ni Kalou; ni sai koya o qo nai tukutuku ni Kalou sa tukuna kina na Luvena ko koya.

10O koya sa vakabauta na Luve ni Kalou sa rawata e lomana nai tukutuku: o koya sa sega ni vakadinata na Kalou sa beitaki koya me lasu; ni sa sega ni vakadinata nai tukutuku ni Kalou ni sa tukuna na Luvena.

11O qo ga nai tukutuku, ni sa solia vei keda ko na Kalou na bula tawa mudu, ia na bula o qo sa tu vua na Luvena.

120 koya sa tu na Luvena vei koya, sa tu na bula vei koya; o koya sa sega ni tu na Luve ni Kalou vei koya, sa sega ni tu na bula vei koya.

13A VEIKA o qo kaʼu sa vola vei kemudou sa vakabauta na yaca ni Luve ni Kalou; mo dou kila kina ni dou sa rawata na bula tawa mudu, mo dou vakabauta talega kina na yaca ni Luve ni Kalou.

14Ia na ka o qo eda sa vakararavi kina vua, kevaka eda sa kerea e dua na ka me vaka na nona veitalia, sa rogoci keda ko koya:

15ia kevaka eda sa kila ni sa rogoci keda ko koya, a ka kecega eda sa kerea, eda sa kila ni da sa rawata na kerekere eda sa kerea vua.

16Kevaka e dua na tamata sa raica na wekana ni sa ia nai valavala ca sa sega ni ka e yaco kina na mate, ena masulaka, ia ena solia vua na bula ko koya me nodra era sa tawa ia nai valavala ca sa yaco kina na mate. Sa tu nai valavala ca sa yaco kina na mate; au sa sega ni kaya me masu e na vuku ni ka ko ya.

17Sai valavala ca na ka kecega e tawa dodonu; a sa dua nai valavala ca sa sega ni yaco kina na mate.

18Eda sa kila, ni sa sega ni valavala ca ko koya yadua sa vakasucumi koya oti ko na Kalou; ia ko koya sa vakasikavi koya oti ko na Kalou sa maroroi koya, a sa sega ni tarai koya na vu-ni-ca ko ya.

19Eda sa kila ni da sa luve ni Kalou, a sa koto ga vua na vu-ni-ca ko ira kecega na kai vuravura.

20Eda sa kila talega ni sa yaco mai na Luve ni Kalou, a sa solia mai vei keda na vuku, me da kilai koya kina sa dina, ia eda sa tu vata kei koya sa dina, vei Jisu Karisito na Luvena. O koya o qo na Kalou dina, kei na vu-ni-bula tawa mudu.

21Oi kemudou na gone lomani, maroroi kemudou mai na veimatakau. Emeni.