I. Ai Vola I Joni 4 - AI VOLA TABU（FIJ1864）

Sa vakavulici ira ko koya me ra kakua ni vakabauta nai vakavuvuli kecega era sa rogoca, me muri ira ga era sa tukuni Jisu, 1-6. Sa vakarota vei ira me ra veilomani, 7-21.

1OI kemudou sa lomani, kakua ni vakadinata na yalo kecega, ia dou vakatovolei ira na yalo se ra sa mai vua na Kalou, se segai: ni ra sa lewe vuqa na parofita vakailasu era sa lako voli yani e vuni vura.

2O koya o qo dou sa kila kina na yalo sa mai vua na Kalou: a yalo kecega sa vakatusa ni sa liatamata mai ko Jisu Karisito, sa mai vua na Kalou:

3ia na yalo kecega sa sega ni vakatusa ni sa liatamata mai ko Jisu Karisito, sa sega ni mai vua na Kalou: ia o qo sai koya na meca i Karisito, o qori dou a rogoca ni ua lako mai, a sa tu e vuravura edaidai.

4Oi kemudou na luvequ lomani, dou sa mai vua na Kalou, ia dou sa rawai ira: ni sa levu ko koya sa tiko e na lomamudou, ka lailai ko koya sa tiko e vuravura.

5O ira era sa tamata ni vuravura: a ra sa vosataka kina na ka ni vuravura, a sa vakarogoci ira ko ira na kai vuravura.

6Oi keda, eda sa mai vua na Kalou: sa vakorogoci keda ko koya sa kila na Kalou; sa sega ni vakarogoci keda ko koya sa sega ni luve ni Kalou. E na ka o qo eda sa kila kina na yalo sa dina, kei na yalo sa dauveivakacalai.

7OI kemudou sa lomani, me da veilomani; ni sa mai vua na Kalou na loloma; ia ko koya yadua sa dauloloma, sa vakasucumi koya ko na Kalou, a sa kila na Kalou ko koya.

8O koya sa sega ni dauloloma sa sega ni kila na Kalou; ni sa loloma na Kalou.

9E na ka o qo sa vakaraitaki kina na loloma ni Kalou vei keda, ni sa tala ki vuravura na Luvena e dua bauga ko na Kalou, o koya ka vakasikava ko koya, me da bula e na vukuna.

10E na ka o qo sa rairai kina na loloma, sa sega ni da a lomani koya na Kalou, o qori ga ni ka lomani keda ko koya, a sa tala na Luvena mei bulubulu ni nodai valavala ca.

11Oi kemudou sa lomani, kevaka sa lomani keda vakaoqo ko na Kalou, sa dodonu me da veilomani vakai keda.

12Sa sega na tamata sa raica na Kalou e na gauna e dua. Kevaka eda sa veilomani, sa tiko e na lomada na Kalou, a sa levu sara na loloma vua e na lomada.

13E na ka ga o qo eda sa kila ni da sa tiko sara vua, ia ko koya e na lomada, e na vuku ni ka solia vei keda ko koya mai vua na Yalona.

14Ia eda sa raica ka tukuna tiko ni ka tala na Luvena ko Tamada mei Vakabula kei vuravura.

15O koya yadua ena vakatusa ni sa Luve ni Kalou ko Jisu, sa tiko sara na Kalou vei koya, ia ko koya vua na Kalou.

16Ia eda sa kila ka vakadinata na loloma ni Kalou vei keda. Sa loloma na Kalou; ia ko koya sa dautiko kei na loloma, sa dautiko vata kei na Kalou, ia ko na Kalou e lomana.

17E na ka o qo sa yaco kina me levu sara na loloma vei keda, ni da sa tautauvata kaya, ni da sa tiko e vuravura o qo, me da doudou kina e na siga ni lewa.

18Sa sega ni tu vata na rere kei na loloma; ia ka sa biuta tani na rere na loloma levu sara; ni sa tiko vata na rere kei na yaluma. Ia ko koya sa rere, sa sega ni levu sara na nona loloma.

19Eda sa lomani koya, e na vuku ni sa taumada na nona loloma vei keda.

20Kevaka e dua sa kaya, Au sa lomana na Kalou, a sa cata na wekana, sa daulasu ko koya; kevaka sa tawa lomana na wekana sa raica tiko ko koya, ena lomana na Kalou vakaevei ni sa tawa raica?

21Ia na vunau o qo eda sa rawata maivei koya, Me lomana na wekana talega ko koya sa lomana na Kalou.