I. Ai Vola I Joni 3 - AI VOLA TABU（FIJ1864）

Sa tukuna ko koya na loloma ni Kalou ni sa vakabauti keda tale me da luvena, kei na nodrai valavala na luve ni Kalou, 1-24.

1RAICA na kena levu ni loloma sa ia vei keda na Tamada, me da vakatokai kina me luve ni Kalou: o koya o qo sa sega ni kilai keda kina ko ira na kai vuravura, e na vuku ni ra a sega ni kilai koya.

2Oi kemudou sa lomani, eda sa qai luve ni Kalou, a sa sega ni rairai se da na vakaevei emuri: o qo ga eda sa kila, ni na rairai mai ko koya, eda na tautauvata kaya; ni da na raica na matana dina.

3Ia na tamata yadua sa tu nai nuinui o qo vei koya, sa vakasavasavataki koya, me vaka sa savasava ko koya.

4O koya yadua sa valavala ca sa talaidredre ki na vunau: ia sai valavala ca o qo me talaidredre ki na vunau.

5Ia dou sa kila ni ka vakaraitaki ko koya me kauta tani na nodai valavala ca; a sa sega na nonai valavala ca.

60 koya sa tu dei vata kaya sa sega ni valavala ca; o koya sa valavala ca lako sa sega ni raici koya, se kilai koya.

7Oi kemudou na luvequ lomani, me kakua ni vakacalai kemudou e dua: o koya sa valavala dodonu sa dodonu ga, me vaka sa dodonu ko koya.

8A luve ni tevoro ko koya sa valavala ca tiko; ni sa valavala ca na tevoro mai nai vakatekivu. E na vuku ni ka o qo sa vakaraitaki kina na Luve ni Kalou, me vaqeavutaka na cakacaka ni tevoro.

9Sa sega ni valavala ca ko koya yadua sa vakasucumi koya ko na Kalou; ni sa tu e lomana na sorena: a sa sega ni ia rawa nai valavala ca ko koya, e na vuku ni ka vakasucumi koya ko na Kalou.

10E na ka o qo sa rairai kina ko ira na luvena na Kalou, kei ira na luvena na tevoro: sa sega ni luve ni Kalou ko koya yadua sa sega ni ia tiko nai valavala dodonu, sei koya sa sega ni lomana na wekana.

11Ni sai koya ga o qo nai vakaro dou a rogoca mai nai vakatekivu, me da veilomani:

12me kakua ni vakataki Keni, a luvena na vu-ni-ca, o koya sa vakamatea na tacina. A sa vakamatei koya e na vuku ni cava? E na vuku ni sa ca na nonai valavala, a sa dodonu na nei tacina.

13Kakua ni kidacala, oi kemudou na wekaqu, kevaka sa cati kemudou ko ira na kai vuravura.

14Eda sa kila ni da sa lako tani mai na mate ki na bula, ni da sa lomani ira na veiwekani. O koya sa sega ni lomana na wekana sa tiko ga e na mate.

15Na daulaba ko koya yadua sa cata na wekana: ia dou sa kila ni sa sega sara na daulaba sa tiko e na lomana na bula tawa mudu.

16E na ka o qo eda sa kunea kina na loloma, ni sa virino ko koya na nona bula e na vukuda: e dodonu me da virino na bula koi keda talega e na vukudra na veiwekani.

17Ia ko koya sa nona nai yau ni vuravura o qo, a sa raica na wekana ni sa dravudravua, a sa sogota na lomana vua, sa tiko vakacava e na lomana na loloma vua na Kalou?

18Oi kemudou na luvequ lomani, me da kakua ni loloma e na vosa, se e na yameda; e na cakacaka ga kei na lomadina.

19Ia na ka o qo eda sa kila kina ni da sa mai na dina; eda na vakadinadinataka talega kina na yaloda e matana.

20Io, kevaka sa beitaka vei keda na ca na yaloda, sa uasivi cake e na yaloda na Kalou, a sa kila na ka kecega.

21Oi kemudou sa lomani, kevaka sa sega ni beitaka vei keda na ca na yaloda, eda sa qai vosa doudou rawa vua na Kalou.

22Ia na ka kecega eda sa kerea, eda sa rawata maivei koya, ni da sa muria na nona vunau, ka kitaka na veika sa vinaka e matana.

23Ia na nona vunau o qo, Me da vakabauta na yaca ni Luvena ko Jisu Karisito, ka veilomani, me vaka sa vakarota vei keda ko koya.

24Ia ka sa tu dei vei koya ko koya sa muria na nona vunau, a sa tu sara vua ko koya. Ia na ka o qo eda sa kila kina ni sa tiko e na lomada ko koya, e na vuku ga ni Yalo sa solia mai vei keda ko koya.