I. Ai Vola I Joni 2 - AI VOLA TABU（FIJ1864）

Ai bulubulu ni valavala ca ko Jisu, 1-2. Sa qai tukuni ko ira era sa kila na Kalou, 3-17. Me da qarauni keda mai nai vakavuvuli ca, ni da sa gumatua e na vakabauti Jisu, kei nai valavala vinaka, 18-29.

1NA luvequ lomani, au sa vola yani vei keli mudou na veika o qo, mo dou kakua kina ni valavala ca. Ia kevaka sa valavala ca e dua, sa dua na noda Dautataro vei Tamada, ko Jisu Karisito, na yalododonu:

2ia sai bulubulu ni nodai valavala ca ko koya; a sa sega e na noda walega, o koya talega e na nodra na kai vuravura taucoko.

3Ia na ka o qo eda sa kila kina ni da sa kilai koya, kevaka eda sa muria na nona vunau.

4O koya sa kaya, Au sa kilai koya, ia ka sega ni muria na nona vunau, sa vosa lasu, a sa sega ni tu na dina vei koya.

5Ia ko koya yadua sa muria na nona vosa, sa dina ni sa qai levu sara na nona loloma vua na Kalou: e na ka ga o qo eda sa kila ni da sa tu vata kaya.

6O koya sa kaya erau sa tu vata kaya, e kilikili kaya me ia nai valavala sa vaka na nonai valavala.

7Oi kemudou na veiwekani, sa sega ni vunau vou kaʼu sa vola vei kemudou, koya ga na vunau makawa ka tu vei kemudou mai nai vakatekivu. A vunau makawa na vosa dou a rogoca, mai nai vakatekivu.

8E dua tale, sa vunau vou kaʼu sa vola vei kemudou, ia na ka o qo sa dina vua, vei kemudou talega: ni sa qai takali na butobuto, a sa cila mai na rarama dina.

9O koya sa kaya ni sa tu e na rarama, ka sa cata ga na wekana, sa tu ga e na butobuto ka yacova na siga o qo.

10Sa tu e na rarama ko koya sa lomana na wekana, a sa sega vua na ka e dua me tarabe kina.

11Ia sa tu e na butobuto ko koya sa cata na wekana, a sa lako voli e na butobuto, a sa sega ni kila na vanua sa lako kina, ni sa vakabutobutotaka na matana na butobuto.

12Au sa vola vei kemudou, na luvequ lomani, ni sa bokoci na nomudoui valavala ca e na vuku ni yacana.

13Au sa vola vei kemudou, na qase, ni dou sa kilai koya sa mai nai vakatekivu. Au sa vola vei kemudou, na cauravou, ni dou a rawai koya na vu-ni-ca. Au sa vola vei kemudou, na gone lomani, ni dou sa kilai koya na Tamada.

14Au a vola vei kemudou, na qase, ni dou a kilai koya sa mai nai vakatekivu. Au a vola vei kemudou, na cauravou, ni dou sa kaukauwa, a sa tu vei kemudou na vosa ni Kalou, ia dou a rawai koya ua vu-ni-ca.

15Dou kakua ni lomani vuravura, se na veika sa vakavuravura. Kevaka sa dua sa lomani vuravura, sa sega e na lomana na loloma vua na Tamada.

16Io, na ka kecega sa tu e vuravura, na gadreva ni yago, na gadreva ni mata, kei na qaciqacia ni bula, sa sega ni tubu maivei Tamada, mai vuravura ga.

17Ia ko vuravura sa lako tani yani, kei na kena gadreva talega; ia ko koya sa cakava na ka sa vinakata ko na Kalou, sa tu dei ga ka tawa mudu.

18Oi kemudou na luvequ lomani, sa gauna emuri sara o qo: ia me vaka dou a rogoca, ni na lako mai ko koya na meca i Karisito, sa lewe vuqa na meca i Karisito edaidai; sa vakakina eda sa kila kina ni sa gauna emuri sara o qo.

19Era a lako tani vei keda ko ira o qori, ia era a sega ga ni nodai tokani; ke ra sa nodai tokani, ke ra sa tiko ga kei keda: ia sa ka ga me ra vakaraitaki ni ra a sega ni nodai tokani ko ira kecega o qori.

20Ia ka sa tu vei kemudou nai lumu mai vua na Yalosavasava, ia dou sa kila kina na ka kecega.

21Au sa tawa vola vei kemudou ni dou sa lecava nai vakavuvuli dina, o koya ga ni dou sa kila, ia ka sa sega sara ni tubu mai nai vakavuvuli dina na lasulasu.

22O cei na daulasu, o koya ga sa cakitaka ni sa Karisito ko Jisu? Sai koya na meca i Karisito, o koya sa cakitaka na Tamada kei na Luvena.

23O koya yadua sa cakitaka na Luvena, sa sega ni tu vua ko Tamada; ko koya sa vakatusa na Luvena sa tu talega vua ko Tamana.

24O koya o qo me qai tu dei, e na lomamudou, na ka dou a rogoca mai nai vakatekivu. Kevaka sa tu ga vei kemudou na ka dou a rogoca mai nai vakatekivu, dou na tu ga vua na Luvena, vua talega na Tamada.

25Ia o qo na ka ni yalayala sa yalata vei keda ko koya, na bula tawa mudu.

26A veika o qo kaʼu sa vola kina vei kemudou e na vukudra era sa vakacalai kemudou.

27Ia sa tu vei kemudou nai lumu dou a rawata maivei koya, a sa sega ni yaga vei kemudou me vakavulici kemudou e dua: me vaka ga ni sa vakavulici kemudou e na ka kecega nai lumu ko ya, a sa dina ga, ka sa sega ni lasu, ia me vaka sa vakatavulici kemudou ko ya, dou na tu dei vakakina vei koya.

28IA o qo, na luvequ lomani, mo dou tu dei vua; me da doudou kina, ni na rairai mai ko koya, ka me da kakua ni madua e matana e na nona lako mai.

29Kevaka dou sa kila ni sa yalododonu ko koya, dou sa kila ni sa sucu vei koya ko koya yadua sa caka dodonu.