II. Ai Vola I Petero. 2 - AI VOLA TABU（FIJ1864）

Sa tukuni ira ko koya nai vakaruvuli ca, kei na tamata era sa muri ira, 1-22.

1IA ka sa tiko vei ira na kai noda eliu na parofita vakailasu e so, me vaka ni na tiko talega vei kemudou nai vakavuvuli vakailasu e so, era na kauta vuni mai na veisei e veivakarusai, ni ra sa cakitaka na Turaga sa voli ira, a ra sa vakayacora vakasauri mai na nodra rusa.

2Era na lewe vuqa talega era na muria na nodrai valavala e dauveivakarusai: ena vosavakacacataki talega nai vakavuvuli dina e na vukudra.

3Ia ni ra sa daukocokoco era na vakaiyau voli e na vukumudou e na vosa e dauveivakaisini: ia na lewa me ra ca sa mudu makawa ni berabera, a sa sega ni moce na nodra rusa.

4Io, kevaka sa sega ni lomani ira tiko na agilose ka valavala ca ko na Kalou, a sa biuti ira sobu ki eli, a sa soli ira ki ni sinucodo ni butobuto, me ra vauci mada me yaco mada na siga ni lewa;

5a sa sega ni lomani ira tiko na kai vuravura makawa, a sa vakabulai Noa kei ira e lewe vitu, o koya ka dauvunautaka nai valavala dodonu, a sa kauta mai na waluvu kivei ira na kai vuravura era sa tawa lotu:

6a sa vakamai rau na koro ko Sotoma kei Komora me dravusa, ka sa vaqeavutaka ni sa cudruva, a sa qisia me kedrai vakarau na tawa lotu e na gauna maimuri;

7a sa vakabulai Loti na tamata yalododonu, sa rarawa na lomana e na vuku ni nodra veivosaki dukadukali na tamatai valavala ca; (

8io, ni sa tiko na tamata yalododonu ko ya e na kedra maliwa, ia ni sa raica ka rogoca, sa vakararawataki na yalona e dodonu e na veisiga e nai valavala tawa dodonu;)

9sa kila kina na Turaga me vakabulai ira era sa daulotu mai na veivakatovolei, me maroroi ira talega na tawa yalododonu me yaco mada na siga ni lewa me ra qai cudruvi:

10ia ka sa levu sara vei ira era sa daumuria na yagodra e na gadreva ca e dukadukali, a ra sa beci ira era sa turaga.

Era sa daubole, era sa yalolevu, era sa sega ni rere ni ra vosavakacacataki ira na turaga.

11Ia ko ira na agilose, era sa uasivi cake e na kaukauwa kei na qaqa, era sa sega ni vosavakacacataki ira ka beitaki ira e na mata ni Turaga.

12Ia ko ira o qo, me vaka na manumanu tawa vuku, sa muria na lomadra, sa caka me vesuki ka vakarusai, era sa vosavakacacataka na veika era sa tawa kila; ia era na rusa sara e na nodrai valavala e veivakarusai;

13ka na rawata nai sau ni valavala tawa dodonu: ni ra sa vakasama me ka ni reki nai valavala mamarau e na siga: era sa dukadukali ka velavela! a ra sa daukitaka na ka era marau kina ni ra dauveivakaisini, a ra sa dauia na solevu kei kemudou:

14a sa sinai na matadra e na dauyalewa, ka sa tawa mudu rawa ni valavala ca; a ra sa dauvakacalai ira na tamata era sa yalowai: a yalodra sa dauia na kocokoco: era sa gone e dauveivakarusai:

15era sa lesu tani mai na sala dodonu, a ra sa sese, ni ra sa muria nai valavala i Palami na luve i Posori, o koya sa vinakata nai voli ni valavala tawa dodonu;

16ia ka sa vunauci e ni nonai valavala ca: sa vosa na asa sa galu e na domo ni tamata a sa tarova na lialia ni parofita.

17O qori na mata-ni-wai sa sega ni to, a o sa veikauyaki e na cava; sa maroroi me nodra na butobuto loaloa sa tawa mudu.

18Ni ra sa vosataka na vosa sa tubu cake walega e na lialia, era sa lari ira era a bula sara maivei ira era sa dauia na caka cala, e na vuku ni gadreva ca ni yago, e nai valavala vakasisila.

19Era sa yalata vei ira na lalaga, ia ko ira era sa bobulataki e na ca; ni sa bobulataki na tamata e na ka sa rawai koya.

20Ia kevaka era sa dro tani mada mai na dukadukali ni vuravura o qo ni ra sa kila na Turaga nai Vakabula ko Jisu Karisito, ka sa tao tale kina, ka rawai, era sa mai ca vakalevu e na gauna emuri, era ca vakalailai ga e nai vakatekivu.

21Ni sa vinaka cake vei ira me ra kakua ni kila nai valavala dodonu, ka ca me ra kila mada, ka qai lesu tani mai na vunau tabu sa soli vei ira.

22Ia sa yaco ga vei ira na ka sa vosataka na vosa vakaibalebale dina, Sa lesu tale na koli ki na nona lua, ia na vuaka sa vakasilimi oti ki na lolobo me boroboro.