II. Ai Vola I Petero. 1 - AI VOLA TABU（FIJ1864）

A WASE I. —Sa vakavulici ira ko Petero me kakua ni yali vei ira e dua na ka vinaka; ka me ra gumatua sara me curu ki lomalagi, 1-11. Sa vakarota matua vei ira me ra gumatua sara me ra vakabauti Jisu, 12-21.

1OI au ko Saimoni Petero, ai talatala kei nai apositolo i Jisu Karisito, vei ira era rawata na vakabauta talei e vakarauvata kei na neitou e na yalododonu ni noda Kalou ko Jisu Karisito nai Vakabula:

2Me vakalevutaki vei kemudou na loloma kei na vakacegu ni dou sa qai kila na Kalou, kei Jisu na noda Turaga.

3Ni sa solia mai vei keda ko koya e na nona kaukauwa Vakalou na ka kecega sa yaga e na noda bula kei na lotu talega, ni da kilai koya sa kacivi keda ki na vanua vakaiukuuku kei nai valavala vinaka:

4o koya o qo sa soli kina vei keda na vosa ni yalayala e levu sara ka talei: mo dou rawata kina na ka sa Vakalou, ni dou sa dro tani mai na dukadukali sa tu e vuravura e na vuku ni gadreva ca.

5Ia e na vuku ni ka o qo, dou gumatua vakalevu sara kina, mo dou vakaikuritaka na nomudou vakabauta e nai valavala vinaka; kei nai valavala vinaka e na vuku;

6kei na vuku e nai valavala malua; kei nai valavala malua e na vosota; kei na vosota e na daulotu;

7kei na daulotu e na veilomani vakaveitacini; kei na veilomani vakaveitacini e na yalololoma.

8Ia kevaka sa tu ga na veika o qo e na lomamudou, ka tubu cake me levu, era sa kitaka mo dou kakua ni vucesa se tawa vua e na kila na noda Turaga ko Jisu Karisito.

9Ia ko koya sa sega vua na veika o qo sa mataboko, a sa matabuawa, a sa guilecava ni ka vakasavasavataki tu mai na nonai valavala ca eliu.

10Ia koi kemudou na veiwekani, dou gumatua cake kina, mo dou vakataudeitaka sara na nomudou kacivi kei na nomudou digitaki; ni dou na sega sara ni bale, kevaka dou sa kitaka na veika o qo:

11ni na soli vakayauyau vakakina me rawarawa vei kemudou me curu ki na matanitu tawa mudu ni noda Turaga kei nai Vakabula ko Jisu Karisito.

12O koya o qo kaʼu na sega ni guca kina niʼu sa vakasa tiko na lomamudou me nanuma na veika o qo, ia sa dina ya ni dou sa kila, ka sa vakataudeitaki e nai vakavuvuli dina o qo.

13Ia kaʼu sa vakasama, ni sa dodonu, e na veisiga kaʼu sa tiko kina e na vale vakacevaceva o qo, meʼu vakayavalata na lomamudou me nanuma;

14niʼu sa kila niʼu sa voleka ni biuta tani na noqu vale vakacevaceva, me vaka ni sa tukuna mai vei au na noda Turaga ko Jisu Karisito.

15Ia kaʼu na gumatua mada mo dou nanuma tikoga na veika o qo, niʼu sa mate oti.

16Ni keitou a sega ni muria na talanoa sa caka vakavuku, ni keitou a tukuna vei kemudou na nona kaukauwa kei na nona lako mai na noda Turaga ko Jisu Karisito, ia keitou a raica dina ga na nonai valavala vakaturaga.

17Ni sa yaco vei koya mai vua na Kalou ko Tamana na vakarokoroko kei na vakadokadokai, ni sa yaco na domo vei koya mai nai ukuuku dina sara vakaoqo, O koya o qo na noqu Gone ni toko, au sa dauvinakata vakalevu.

18Ia na domo o qo mai lomalagi keitou sa rogoca, ni keitou a tiko kaya e na ulu-ni-vanua tabu.

19A sa tu vei keda talega na vosa sa vakadinadinataki vakalevu cake, a parofisai; ia dou na caka vinaka, kevaka dou sa vakananuma kina, me vaka ki na cina sa serau e na vanua sa butobuto, ka malua me kida mai na mataka, ka cabe mai ki na lomamudou na kalokalo i vola siga;

20ni dou sa kila taumada na ka o qo, ni sa sega na parofisai e nai Vola, sa tubu mai na kila na kenai balebale;

21ni sa sega ni lako mai na parofisai e na gauna eliu e na veitalia ni tamata: a ra sa vosa ga na tamata yalosavasava ni Kalou me vaka sa kauti ira na Yalo Tabu.