I. Ai Vola I Petero 5 - AI VOLA TABU（FIJ1864）

Sa ia ko koya nai vakaro vei ira nai talatala qase, kei ira nai talatala cauravou, kei ira na tamata kece, a sa tinia na nonai vola, 1-14.

1AU sa vakarota vei ira nai talatala qase era tiko vei kemudou, niʼu sa qase koi au talega, ka sa dautukutuku e na ka ka vosota ko Karisito, ka sai taukei talega ni ukuuku ena vakaraitaki mai e na gauna maimuri:

2dou vakania na qele-ni-sipi ni Kalou era sa tiko vei kemudou, ka dou ia na vakatawa, kakua ga e na loma e vosota, ka e na loma ga e vinakata; kakua ga e na vuku ni yau vakasisila, e na loma ga e rekitaka;

3ia dou kakua ni vaka dou sa veitaliataka na veivotavota, ka mo dou nodrai vakarau ga na qele ni sipi.

4Ia ni na rairai mai nai Vakatawa levu, dou na rawata kina nai sala vakaiukuuku ena sega ni malai rawa.

5Oi kemudou talega na cauravou, dou vakamalumalumutaki kemudou vei ira na qase. Io, dou dui vakamalumalumutaki kemudou vakai kemudou, ka dou vakaisulu e na yalomalumalumu: ni sa vorati ira na qaciqacia na Kalou, a sa solia nai solisoli loloma vei ira na yalomalumalumu.

6O koya o qo mo dou qai vakamalumalumutaki kemudou e ruku ni liga kaukauwa ni Kalou, me laveti kemudou cake ko koya e na gauna sa lokuci:

7ka dou biuta vei koya na nomudou lomaocaoca kecega, ni sa daunanumi kemudou ko koya.

8Dou yalomatua, dou vakatawa: e na vuku ni sa veilakoyaki na nomudou meca ua tevoro, me vaka na laioni sa tagi, a sa vakasaqara e so me tiloma:

9dou vorati koya ni dou sa tu dei e na vakabauta, ni dou sa kila sa vakayacori na ka rarawa vakakina vei ira na wekamudou era sa tiko lako e vuravura o qo.

10Ia na Kalou sa dauia na loloma kecega, o koya sa kacivi keda ki na nonai ukuuku taw a mudu e na vuku i Karisito Jisu, ni dou sa vakararawataki mada e na gauna e so, me qai qisi kemudou mo dou vakavinakataki, mo dou vakataudeitaki, mo dou vakaukauwataki, mo dou tauyavutaki.

11Me nona na vakarokoroko kei na lewa e na gauna kece ka tawa mudu. Emeni.

12Au sa vola vakalailai ka ia nai vakaro, a sa kauta vei kemudou ko Silivenu, o koya kaʼu sa vakasama e wekada dina, ia kaʼu sa vakadinadina ni sa loloma dina ni Kalou dou sa tu dei kina.

13Sa loloma yani vei kemudou nai vavakoso lewe ni soro mai Papiloni, era sa digitaki tu vata kei kemudou; sa vakakina ko Marika na luvequ.

14Dou veicavuti loloma, ka ia na veiregu ni loloma. Me tu ga na vakacegu vei kemudou kecega sa tu vata kei Karisito Jisu. Emeni.