I. Ai Vola I Petero 4 - AI VOLA TABU（FIJ1864）

Sa vakarota vei ira me ra kakua ni valavala ca, me ra muri Jisu ga, e na vuku ni sa voleka nai vakataotioti, 1-11. Sa vakacegui ira, 12-19.

1IA ni sa vakararawataki ko Karisito e na yagona e na vukuda, dou vakaisulu vakaivalu e na yalo e vakakina: ni sa mudu ni valavala ca ko koya sa vakararawataki e na yagona;

2me kakua kina ni vaka na gadreva ca ni tamata na nona bula e na yagona e na gauna sa vo, me vaka ga na veitalia ni Kalou.

3Ia me kena levu vei keda na gauna ni bula sa oti ni da kitaka kina na ka era vinakata ko ira era sa tawa lotu, ni da sa muria lako na gadreva ca, na domona ca, na daugunu waini, nai soqosoqo lialia, na daumateni, kei na kena ca ni dausoro ki na veimatakau:

4a ra sa kidacala kina ni dou sa sega ni cici vata kei ira ki nai valavala e vuabale, era sa ia kina na veivosavakacacataki,

5a ra na tukuni ira vua sa vakarau me lewai ira era sa bula kei ira talega na mate.

6E na vuku ni ka o qo ka vunautaki kina nai tukutuku-vinaka vei ira talega era sa mate tu, me ra lewai me vaka na tamata me mate na yagodra, ia me ra bula ga vua na Kalou e na yalodra.

7Ia ka sa voleka nai vakataotioti ni ka kecega: dou yalomatua kina, ka dauyadrava na masumasu.

8Ia na ka me liu o qo mo dou dauveilomani vakalevu vakai kemudou; ni na ubia nai valavala ca e vuqa na loloma.

9Dou ia na loloma vakai kemudou ni dou dui vulagi, ia dou kakua ni veididivi.

10Me vaka ni dou sa dui rawata nai solisoli, mo dou dui solia vakakina vakai kemudou, me vaka nai talatala vinaka e na loloma e vakavuqa ni Kalou.

11Kevaka e dua sa vosa, me ia me vaka na vosa ni Kalou: kevaka e dua sa kitaka na cakacaka, me ia ga me vaka na kaukauwa sa solia ko na Kalou: me vakarokorokotaki kina na Kalou e na ka kecega e na vuku i Jisu Karisito, o koya sa nona na vakarokoroko kei na lewa e na gauna kecega ka tawa mudu. Emeni.

12Oi kemudou sa lomani, kakua ni kidacala e na vuku ni rarawa katakata sa yaco me vakatovolei kemudou, me vaka ni sa yacovi kemudou na ka tani:

13ia dou reki ga, ni dou sa veivota e na veivakararawataki i Karisito; mo dou reki talega kina, e na reki vakaidina, ni na vakaraitaki ko koya e nai ukuuku.

14Kevaka dou sa vakasewasewani e na vuku ni yaca i Karisito, dou sa kalougata kina; ni sa qai tu vei kemudou na Yalo sa vakarokorokotaki sa nona na Kalou: sa vosavakacacataki koya ko ira o qori, a sa vakarokorokotaka koi kemudou.

15Ia me kakua e dua vei kemudou me vakararawataki ni sa daulaba, sena daubutako, se na caka ca, se na makutu vakatani:

16ia kevaka ni sai tokani i Karisito, me kakua ni madua kina; me vakarokorokotaka ga na Kalou e na vuku ni ka o qo.

17Ni sa yaco na gauna me vakatekivu na veicudruvi e na mataqali ni Kalou: ia kevaka ena vakatekivu vei keda, a cava ena kenai vakataotioti vei ira era sa tawa talairawarawa ki nai tukutuku-vinaka ni Kalou?

18Ia kevaka sa dredre me bula ko koya sa yalododonu, ena rairai evei ko koya sa tawa lotu kei ira nai valavala ca?

19O koya o qo me ra ia kina ko ira era sa vakararawataki me vaka na veitalia ni Kalou, me ra solia na yalodra e nai valavala vinaka me maroroi, me vaka vua na Vu ni ka kecega, a sa dina talega,