I. Ai Vola I Petero 3 - AI VOLA TABU（FIJ1864）

Sa vakarota ko koya vei ira na veiwatini me ra veilomani, 1-7. Me ra veilomani talega na tamata lotu kecega, me ra vosota talega na veivakacacani, 8-17. Sa tukuni Jisu tale, 18-22.

1OI kemudou talega, na yalewa, dou vakamalumalumutaki kemudou vei ira na watimudou; me rawai ira ko ira na watidra-yalewa e na nodrai valavala, ka segai na vunau, kevaka sa so sa talairawarawa ki na vunau;

2ni ra sa raica na nomudoui valavala savasava kei na rere.

3Ia me kakua ni nomudou nai ukuuku etaudaku, na talia na drau ni ulu, kei na tokara na koula, kei na suluma na veisulu;

4na ka vakayalo ga sa vuni e na ka sa tawa vuca rawa, na yalomalumalumu kei na yalomalua, o qori sa ka talei sara e na mata ni Kalou.

5Ni sa vakaoqori talega ko ira na yalewa yalosavasava e na gauna eliu, era sa vakararavi vua na Kalou, ni ra sa vakaiukuukutaki ira, ni ra sa dautalairawarawa vei ira na watidra:

6me vaka sa talairawarawa ko Sera vei Eparaama, ka kacivi koya me turaga; ia dou sa luvena, ni dou sa caka vinaka tiko, ka sega ni rerevaka e dua na dauveivakarerei.

7Oi kemudou talega na tagane, dou tiko vata me vaka na tiko vakavuku, mo dou vakarokorokotaka na yalewa, me vaka sa ka malumalumu, ni dou sai taukei vata e na loloma ni bula; me kakua ni tarovi na nomudrau masu.

8IA meʼu tinia, dou lomavata kecega, dou ia na loloma vakai kemudou, dou veilomani me vaka na veitacini, dou yalololoma, dou lokomi:

9kakua ni veisausaumitaka na ca, se ia tale na veivakasewasewani; ia dou dua tani, dou vosa vakalougatataka ga; ni dou sa kila ni dou sa kacivi me vakakina, mo dou rawata na ka e veivakalougatataki.

10Ia ko koya sa vinakata na bula, ka sa via raica na veisiga vinaka, me tarova na yamena mai na ca, kei na tebenigusuna me kakua ni vosataka na ka lasu:

11me lesu tani mai na ca ko koya, ka kitaka na ka vinaka; me vakasaqara na vakacegu, ka muria sara.

12Ni sa wanonovi ira na tamata yalododonu na mata ni Turaga, ka sa qara tu na daligana ki na nodra masu; ia ka sa dua tani na mata ni Turaga vei ira sa valavala ca.

13Ia ko cei ko koya ena vakacacani kemudou, kevaka dou muria na ka e vinaka?

14Ia kevaka dou sa vakararawataki e na vuku ni valavala dodonu, dou sa kalougata kina; ia dou kakua ni rerevaka na nodra veivakarerei, se kidroa kina;

15ia dou vakarokorokotaka na Turaga na Kalou e na yalomudou: mo dou vakarau talega mo dou tukuna vua na tamata yadua sa tarogi kemudou, na vu ni nuinui sa tu e na lomamudou, e na yalomalumalumu kei na rere:

16me vinaka ga na nomudou lewa-eloma; me yaco kina, ni ra sa vosavakacacataki kemudou, me vaka ni dou sa tamata caka ca, me ra madua ko ira era sa beitaka vakailasu na nomudoui valavala vinaka vei Karisito.

17Ni sa vinaka, kevaka sa nona veitalia na Kalou me vakakina, mo dou vakararawataki e na vuku ni caka vinaka, ka kakua e na vuku ni caka ca.

18Ni sa vakararawataki vakadua ko Karisito talega e na vuku ni valavala ca, o koya na caka dodonu e na vukudra na caka cala, me kauti keda kina vua na Kalou, ni sa vakamatei me vaka na yago, a sa vakabulai me vaka na yalo.

19Ka lako talega kina ko koya ka vunau vei ira na yalo era sa tiko e na vale ni veivesu;

20o ira era a talaidredre eliu, ni sa vosota vakadede na Kalou ni sa dauwawa e na gauna i Noa, ni sa vakarautaki tiko na waqa, a ra le vica ga, era lewe walu walega, sa vakabulai kina e loma ni wai.

21O qori ga nai vakatakarakara ni sa vakabulai keda vakakina e na gauna o qo na papitaiso (e sega ni sa biu walega na dukadukali ni yago, a ya ga ni sa tukuni rawa ni sa vinaka vua na Kalou na noda lewa-eloma,) e na vuku ni sa tu tale mai na mate ko Jisu Karisito:

22o koya sa lako ki lomalagi, e sa tiko e na liga i matau ni Kalou; ia sa vakamalumalumutaki tu vei koya ko ira na agilose, kei ira sa lewa kei ira sa kaukauwa.