I. Ai Vola I Petero 2 - AI VOLA TABU（FIJ1864）

Sa vakarota vei ira ko koya me ra kakua ni lomaca, me ra gadreva sara na vosa ni Kalou, 1-3. Sa qai tukuna ni sa nodra ka talei ko Jisu, 4-10. Sa qai tukuna nai valavala e kilikili kei ira, 11-24.

1O KOYA o qo ni dou sa biuta tani kina na lomaca kecega, kei na daulawaki kecega, kei na dauveivakaisini kei na dauvuvu, kei na dau-veivosavakacacataki kecega,

2mo dou vaka na gone sa qai sucu, mo dou gadreva nai vakavuvuli sa vaka na wai-ni-sucu tawa ca, mo dou tubu cake kina:

3kevaka e dina ni dou sa tovolea oti ni sa yalololoma na Turaga.

4Ni dou sa lako mai vei koya, me vaka ki na vatu bulabula, ko ya sa biuta ko ira na tamata, ia na Kalou sa digitaka, a sa talei:

5oi kemudou talega, me vaka dou sa veivatu bulabula, dou sa tara cake me vale vakayalo, me matabete yalosavasava, mo dou cabora kina e so nai madrali vakayalo, sa vinaka vua na Kalou e na vuku i Jisu Karisito.

6O koya sa tu kina o qo talega e nai Vola, Raica, au sa viritaka mai Saioni na vatu ni yavu e na tutu-ni-vale, sa digitaki, sa talei; ia ko koya sa vakabauti koya ena sega ni vakamaduataki:

7a sa nomudou kina na kena talei, oi kemudou sa vakabauta: ia kivei ira sa dautalaidredre, sa yaco vei ira na vatu era a biuta ko ira na matai-ni-vale, mei teteki e na tutu-ni-vale,

8kei na vatu era sa tarabe kina, kei na vatu era sa bale kina, vei ira era sa tarabe e na vosa, ni ra sa talaidredre: era sa lesi talega me ra vakakina.

9Ia koi kemudou nai tabatamata digitaki, a matabete vakaturaga, a matanitu yalosavasava, a tamata taukeni; mo dou tukuna kina na nona vinaka sara o koya ka kacivi kemudou mai na butobuto ki nona rarama e veivakidacalataki:

10oi kemudou ka sega ni tamata taukeni eliu, ia dou sa qai tamata ni Kalou: dou a tawa lomani eliu, ia dou sa qai lomani.

11OI kemudou sa lomani, au sa vakamamasu, me vaka dou sa vulagi kei na dauveilakoyaki, mo dou tarovi kemudou mai na gadreva ca ni yago, a ya sa veivala kei na yalo;

12me dodonu na nomudoui valavala e na kedra maliwa era sa tawa lotu: me ka o qori era vakarokorokotaka kina na Kalou e na siga ni veilakovi, e na vuku ni valavala vinaka a ya era na raica, ko ira era sa dauvosavakacacataki kemudou me vaka ni dou sa tamata caka ca.

13Vakamalumalumutaki kemudou ki nai lesilesi kecega ni tamata e na vuku ni Turaga: se vua na tui, ni sa liu sara;

14se vei ira na turaga ni lewa, me vaka vei ira era sa talai mai vua me cudruvi kina ko ira era sa caka ca, ka dokai ko ira sa caka vinaka.

15Ni sa vaka na veitalia ni Kalou, io, mo dou vagalutaka e nai valavala vinaka na nodra sesewa na tamata lialia:

16mo dou vakataki ira era lalaga, ia dou kakua ni cakava na lalaga mei ubi ni lomaca, ia dou vaka ga na tamata ni Kalou.

17Vakarokorokotaka na tamata kecega. Lomani ira na veiwekani. Rerevaka na Kalou. Vakarokorokotaka na tui.

18Oi kemudou nai talatala, dou talairawarawa vei ira na nomudou turaga e na rere kecega; kakua ni ia vei ira duaduaga era sa yalovinaka ka yalomalua, vei ira talega era sa yalovakatani.

19Ni so-ka ni veidokadokai o qo, kevaka e dua sa vosota na rarawa ni sa vakararawataki tawa-dodonu, e na vuku ni sa via vinaka vua na Kalou.

20Ia dou na dokai vakacava, kevaka dou na vosota, ni dou sa valavala ca oti ka yaviti kina? ia kevaka dou sa caka vinaka ga, ka vakararawataki kina, ka dou sa vosota ga, o qori sa ka ni veidokadokai e na mata ni Kalou.

21Ni dou sa kacivi me vakakina: ni sa vosota ko Karisito talega na rarawa e na vukumudou, a sa laiva vei kemudou nai vakarau, mo dou muria na we ni yavana:

22o koya sa sega ni cakava e dua na ka ca, a sa tawa kune e na gusuna na dauveivakaisini;

23ni sa vakasewasewani tiko ko koya, sa sega ni ia tale na veivakasewasewani; ni sa vakararawataki tiko, sa sega ni vosavakacudru-cudru; a sa laivi koya vua sa lewa vakadodonu:

24o koya ga vakai koya ga ka colata na nodai valavala ca e na yagona e na kauveilatai, me da mate tu mai nai valavala ca, ka ia nai valavala dodonu e na noda bula: ia sa we ni kena kuita dou sa vakabulai kina.

25Ni dou a vakataki ira na sipi sa sese: ia dou sa qai saumaki tale vua nai vakatawa o koya sa vakaraica na yalomudou.