II. Ai Vola I Petero. 3 - AI VOLA TABU（FIJ1864）

Sa tukuna ko koya ni na yaco ga na siga ni lewa; ena oti talega ko vuravura kei lomalagi, 1-10. Sa tukuna nai valavala e kilikili kei ira ni ra sa qai kila na veika o qo, 11-18.

1AI karua ni vola o qo, oi kemudou sa lomani, au sa qai vola vei kemudou; au sa vakayavalata kina na yalomudou e savasava mo dou nanuma kina:

2mo dou vakananuma na vosa era sa vosataka eliu na parofita yalosavasava, kei na neitou vunau nai apositolo ni Turaga nai Vakabula:

3ni dou sa kila mada o qo, ni na lako mai e na gauna emuri sara e so na dauveivakasewasewani, era na dauvakadamuri muria na nodra gadreva ca,

4ka kaya, Evei na vosa ni yalayala ni na lako tale mai ko koya? ni ra sa moce ga na qase, a sa tu dei tiko vakakina na ka kecega me vaka ni ka buli e nai vakatekivu.

5Ia na ka o qo era sa vinakata me ra lecava, ni sa vosa ni Kalou ka tu kina na lomalagi eliu, kei na vuravura sa wase mai na wai, a sa tu e na vuku ni wai;

6a sa vakarusai kina na vuravura sa tu e na gauna ko ya, ni sa waluvu:

7ia na lomalagi kei na vuravura sa tu edaidai, sa maroroi ga e na vosa talega ko ya, sa maroroi ki na bukawaqa me yaco mada na siga ni lewa kei na veivakarusai ni tamata tawa-lotu.

8Ia koi kemudou sa lomani, e dua na ka o qo mo dou kakua ni lecava, ni sa tautauvata vua na Turaga e dua na siga kei na yabaki e dua na udolu, kei na yabaki e dua na udolu kei na siga e dua.

9Sa sega ni berabera na Turaga e na nona vosa ni yalayala, me vaka sa vakasama na tamata e so ni sa berabera: a sa vosoti keda vakadede, ni sa sega ni vinakata me rusa e dua, me yacova ga na veivutuni ko ira kecega na tamata.

10Ia na siga ni Turaga ena lako ga mai me vaka na daubutako e na bogi, ena lako tani kina ko lomalagi e na rorogo tatamosamosa, ena waicala talega na veivu ni ka ni sa vakamai, ena visai talega ko vuravura kei na cakacaka sa tu kina.

11Ia ni na takali yani na ka kecega o qo, a cava nai valavala sa kilikili kei kemudou, e nai valavala savasava kei na daulotu,

12ni dou sa dauvakaraica ka dauku-sarawa yani ki na kena lako mai na siga ni Kalou, ena takali kina ko lomalagi ni sa visa, ena waicala talega na veivu ni ka ni sa vakamai?

13Ia koi keda, me vaka na nona vosa ni yalayala, eda sa namaka na lomalagi vou kei na vuravura vou, sa tiko kina nai valavala dodonu.

14O koya o qo, kemudou sa lomani, ni dou sa namaka na veika vakaoqo, dou gumatua kina me kunei kemudou ko koya e na vakacegu, ni dou sa tawa tauvi-duka, ka tawa cala.

15Ia dou vakasama na vosota dede ni noda Turaga na ka me da bula kina; me vaka sa vola talega vei kemudou na wekada lomani ko Paula me vaka na vuku sa soli vua;

16me vaka talega e na nonai vola kecega, ni sa tukuna na veika o qo; a sa tu kina na ka e so e dredre mo kilai, ia ko ira era sa tawa vuku ka tawa lomadei, era sa kauta vakatani, sa vaka talega nai Vola kece, me ra rusa kina.

17Ia koi kemudou sa lomani, ni dou sa kila eliu, dou vakaraici kemudou talega, de dou kau vakatani e na nodra dauveivakacalai na tamatai valavala ca, dou na qai bale kina mai na nomudou tu dei.

18Ia dou tubu cake e na loloma, kei na kila na noda Turaga ko Jisu Karisito nai Vakabula. Me ia vua na vakarokoroko e ua gauna o qo ka tawa mudu. Emeni.