Ai Vola I Jemesi 1 - AI VOLA TABU（FIJ1864）

A WASE I. —Sa vakarota ko Jemesi me ra reki na tamata lotu ni ra sa vakararawataki, 1-12. Oi keda ga eda sa vakatekivuna na ca, ia sa vu ni ka vinaka ko na Kalou, 13-18. Me da daurogoca, ka vakananuma ka muria na vosa ni Kalou; kevaka eda sega ni vakakina eda lotu lasu ga, 19-27.

1O JEMESI, nai talatala ni Kalou kei na Turaga ko Jisu Karisito, sa loloma yani vei ira na yavusa e tinikarua era sa duiveiseyaki.

2Oi kemudou na wekaqu, dou nanuma me ka ni reki sara, ni dou sa lutu ki na ka e vuqa sa dauveivakatovolei;

3ni dou sa kila ni sa vakatubura na dauvosota na vakatovolei ni nomudou vakabauta.

4Ia me tini vinaka na cakacaka ni dauvosota, mo dou qisi taucoko sara kina, me kakua na ka e yali.

5Ia kevaka e dua vei kemudou sa lailai na vuku vei koya, me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini; ena soli ga vua.

6Ia me kerekere e na vakabauta, me kakua ni vakatitiqa. Io, ko koya sa vakatitiqa, sa vaka na ua ni waitui, sa cagina e na cagi ka veitubuyaki.

7Ia me kakua ni vakasama na tamata ko ya ni na rawata e dua na ka mai vua na Turaga:

8a tamata sa lomalomarua, sa yameke-meke e na nonai valavala kecega.

9Ia me reki na tamata dravudravua e na nona laveti cake:

10kei koya e vutuniyau, e na nona vakalolovirataki: ni na takali ga me vaka na se ni co.

11Ni sa cabe cake na siga ka todramakausu na kena buno, a sa vakamalaitaka sara na co, a sa mira na sena, a sa rusa na kena rairai vinaka ni yagona: ena malai yani vakakina na tamata vutuniyau e na nonai valavala.

12Sa kalougata na tamata sa vakatovolei ka vosota ga; io, ni sa vakatovolei oti, ena rawata nai sala ni bula o koya sa yalataka ko na Turaga kivei ira sa lomani koya.

13Ni sa dauveretaki e dua, me kakua ni kaya, Sa dauveretaki au ko na Kalou: ni sa sega ni dauveretaki rawa na Kalou me valavala ca, a sa sega ni dauveretaka e dua na tamata ko koya:

14ia ka sa dauveretaki na tamata yadua, ni sa vecei koya na nona garova ca ka bacani koya.

15Ni sa qai kunekune na garova ca, sa vakasucuma kina nai valavala ca: a sa oti nai valavala ca, sa qai vakasucuma na mate.

16Dou kakua ni cala, oi kemudou na wekaqu lomani.

17Sa maicake nai solisoli vinaka kecega kei nai solisoli kecega e yaga sara, a sa lako sobu mai vua na Tama ni rarama, a sa sega vua na veivukiyaki, se veigoleyaki ni yaloyalona.

18Sa vakasikavi keda ko koya e na nona veitalia ga e na vosa ni dina, me da vaka nai sevu ni veika sa bulia ko koya.

19O koya o qo, oi kemudou na wekaqu lomani, mo dou kusarawa yadua me vakarorogo, mo dou berabera ga ni vosa, mo dou berabera ni cudru:

20ni sa sega ni vakatubura na ka e dodonu vua na Kalou na cudru ni tamata.

21O koya o qo mo dou qai biuta tani na dukadukali kei na ka ca e vuabale tu, ka vakabauta e na yalomalua na vosa sa tei e na lomamudou, ko ya sa vakabula rawa na yalomudou.

22Ta dou muria na vosa ka kakua ni rogoca walega, ka vakaisini kemudou kina vakai kemudou.

23Ia kevaka e dua sa rogoca walega na vosa, ka sega ni muria, sa tautauvata kei na tamata sa laʼki ilova na mata ni yagona e nai iloilo:

24ni sa laʼki ilovi koya, a sa qai lako tani yani, a sa guilecava vakasauri se sa vakaevei nai valavala ni yagona.

25Ia ko koya sa vakaraica matua ki na vunau vinaka sara ni lalaga, ka tu dei, sa sega ni daurogoca ka guilecava ko koya o qo, a sa kitaka talega na cakacaka ena kalougata kina ko koya o qo e na nona cakacaka.

26Kevaka e dua vei kemudou sa nanuma ni sa lotu, ia ka sega ni tarova na yamena, a sa dauvakaisina talega na yalona, sa ka walega na nona lotu na tamata o qo.

27Na lotu savasava ka tawa cala e mata ni Kalou ko Tamada sa vakaoqo, Me sa dauraici ira na luveniyali kei ira na yada, ni ra sa rarawa, me sa qarauni koya talega me kakua ni tauvi-duka e na ka vakavuravura.