Vei Ira Na Iperiu 13 - AI VOLA TABU（FIJ1864）

Sa vakavulici ira ko koya e na ka e so, a sa tinia na nonai vola, 1-25.

1ME tiko ga na veilomani vakaveitacini.

2Kakua ni guilecava na vakani ira na vulagi: ni sa so era a vakania na agilose e so ka lecava ga.

3Me vaka dou sa vesu vata, mo dou nanumi ira era sa vesu tu; kei ira talega na dravudravua, me vaka dou sa vakayago talega.

4Sa kilikili kei ira na tamata kece na vakawati, kei nai mocemoce e sega ni veibutakoci: ia ko ira na daudara kei na dauyalewa ena lewai ira ko na Kalou.

5Me takali na daukocokoco e na ka e caka: ia dou lomavinaka e na ka sa tu ga; ni sa kaya ko koya, Au na sega sara ni biuti iko, se vakalaivi iko.

6E na vuku ni ka o qo eda sa doudou kina me kaya, A noqui vukevuke ko Jiova, ia kaʼu na sega ni rerevaka na ka sa kitaka vei au na tamata.

7Dou nanumi ira sa liutaki kemudou, era a tukuna vei kemudou na vosa ni Kalou; vakadamurimuria na nodra vakabauta, ka nanuma nai otioti ni nodrai valavala.

8Sai koyakoya tikoga ko Jisu Karisito, e na siga sa oti, kei na siga edaidai, kei na veisiga maimuri.

9Dou kakua ni veikauyaki e nai vakavuvuli e vuqa sa lako vakatani. Ni sa yaga me vakataudeitaki na yalo e na loloma sa soli, ia me kakua ga e na kakana, sa sega ni yaga vei ira era sa oga kina.

10Sa dua na nodai cabocabo-ni-soro, sa tawa dodonu me kana kina ko ira sa qarava na vale tabu.

11Ni sa vakamai e nai bili ni koro na yago ni manumanu o qori, sa kauta na nodra, dra ki na loqi tabu ko koya na bete levu mei soro ni valavala ca.

12O koya ga o qo sa mate kina ko Jisu e taudaku ni matamata-ni-koro, me vakasavasavataki ira na tamata e na nona dra.

13E na vuku ni ka o qo me da lako kina kivei koya ki nai bili, ka vosota vata kaya na veivakalialiai.

14Ni sa sega na noda koro eke me da tiko vakadua kina, ia eda sa vakasaqara ga e dua ena muri mai.

15Ia ko koya o qo me da qai vakacabora tikoga nai madrali ni vakavinavinaka vua na Kalou e na vukuna, o qori na vua ni tebenigusuda, ni da tusanaka na yacana.

16Kakua talega ni guilecava na caka vinaka kei na dauia nai solisoli: ni sa vinakata sara ko na Kalou nai madrali vakaoqo.

17Dou talairawarawa vei ira sa liutaki kemudou, ka mo dou vakamalumalumutaki kemudou: ni ra sa yadrava na yalomudou, me vakai ira era na tukuni ira kina, me ra kitaka kina e na marau, ka sega e na vutugu: ni sa tawa yaga vei kemudou me vakaoqori.

18Dou masulaki keitou: ni keitou sa dinata ni sa vinaka na neitou lewa-eloma, ka keitou sa vinakata me valavala dodonu e na ka kecega.

19Ia kaʼu sa vakamamasu me caka ga na ka o qo, meʼu talaki yani kusarawa kina vei kemudou.

20Ia na Kalou ni veivakacegui, o koya ka kauta tale mai na mate na noda Turaga ko Jisu, na nodrai Vakatawa levu na sipi, e na vuku ni dra sa ia kina na veiyalayalati tawa mudu,

21me vakavinakataki kemudou mada ko koya e nai valavala vinaka kecega mo dou cakava na nona veitalia, ka me cakava ko koya e na lomamudou na ka sa vinaka e matana, e na vuku i Jisu Karisito; me ia vei koya na vakarokoroko ka tawa mudu. Emeni.

22Ia kaʼu sa masuti kemudou, na veiwekani, mo dou vosota na vosa ni veivakadreti: niʼu sa vola vei kemudou nai vola, e na vosa e vica walega.

23Dou kila, sa sereki tale na wekada ko Timoci; kevaka sa tadu kusarawa mai ko koya, keirau na raici kemudou vata kaya.

24Me cavu mada yani na loloma vei ira kece sa liutaki kemudou, kei ira kecega era sa lotu. Sa loloma yani vei kemudou ko ira mai Itali.

25Me tiko vei kemudou kecega na loloma. Emeni.