Vei Filimoni 1 - AI VOLA TABU（FIJ1864）

Sa reki ko Paula ni sa lotu dina ko Filimoni, 1-7. Sa masuti koya me lomani Onisimo tale e na vukuna, ni sa qai lotu dina, 8-21. Sa kaya ni na laʼki raici koya ko Paula, a sa tinia na nonai vola, 22-25.

1O PAULA, sa vesu tu e na vuku i Karisito Jisu, kei Timoci na wekaqu, vei Filimoni o koya keirau sa daulomana, kei na neiraui tokani,

2vei Afia talega o koya keirau sa daulomana, vei Arikipo talega na neiraui tokani e nai valu o qo, vei ira talega nai vavakoso lewe ni soro era sa tiko e na nomu vale:

3Me nomudou na loloma, kei na vakacegu, mai vua na Kalou ko Tamada, kei na Turaga ko Jisu Karisito.

4Au sa vakavinavinaka vua na noqu Kalou, niʼu sa cavuti iko e na veisiga e na noqu masu;

5niʼu sa rogoca na nomu loloma kei na vakabauta sa nomu, ki na Turaga ko Jisu, kivei ira kece talega era sa lotu;

6me mai kaukauwa na vakabauta sa tu vei iko, me vakatakilai kina na ka kecega e vinaka sa tu vei kemudou, e na vuku i Karisito Jisu.

7Ni sa levu na neitou reki kei na vakacegu e na vuku ni nomu loloma, na wekaqu, ni ko sa vakalecataka na lomadra era sa lotu.

8Ia o qo, e dina ya ni sa rawa meʼu doudou vakalevu e na vuku i Karisito meʼu vakarota vei iko na ka e kilikili;

9ia e na vuku ni veilomani ga kaʼu sa vinakata cake kina me vakamamasu, niʼu sa vakaoqo ko Paula na qase, ia kaʼu sa qai vesu talega edaidai e na vuku i Jisu Karisito.

10Au sa vakamasuti iko e na vuku ni luvequ ko Onisimo, o koya kaʼu sa vakasikava niʼu sa vesu tu: (

11o koya sa tawa yaga eliu vei iko, a sa qai yaga vei iko, vei au talega:)

12au sa qai tala tale: o koya o qo mo qai vinakati koya, ni sa vaka na lewequ dina sara:

13au sa via taura ga me tiko vei au, me kemui sosomi ni sa qaravi au niʼu sa vesu tu e na vuku ni tukutuku-vinaka:

14ia niʼu sa tawa kila na yalomu, au sa sega ni via cakava e dua na ka: me kakua ni vaka na ka sa vakasaurarataki na nomu loloma, ni sa lomamu ga kina.

15Ni sai koya beka o qo sa lako tani vakalekaleka kina, mo rawai koya tale ka tawa mudu;

16me kakua ni vaka na tamata walega, a sa uasivi cake e na tamata walega, a wekamu lomani, e vakalevu vei au, ia ka vakaevei vei iko, e na ka vakavuravura, kei na ka ni Turaga talega?

17Ia o qo, kevaka ko sa vakasami au niʼu sai tokani, mo vinakati koya me vakai au.

18Kevaka sa vakacacani iko ko koya e na dua na ka, se sa dua na ka sa tawa vakaivolitaka, okata o qori vei au;

19oi au ko Paula, au sa vola e na ligaqu dina, au na vakaivolitaka: ia kaʼu sa sega ni kaya vei iko ni sa dodonu ga me noqu ko iko talega.

20Io, na wekaqu, meʼu rekitaki iko mada e na Turaga: vakalecataka na lomaqu e na Turaga.

21Ni kaʼu sa vakadinata ni ko na talairawarawa, kaʼu sa vola kina vei iko, niʼu sa kila ko na kitaka na ka kaʼu sa kaya ka uasivi cake kina.

22Mo vakarautaka talega e dua na vale meʼu moce kina: niʼu sa dinata kaʼu na soli vei kemudou e na vuku ni nomudou masu.

23Eratou sa loloma yani vei iko ko Epafira, keirau sa vesuki kaya e na vuku i Karisito Jisu;

24ko iratou na noqui tokani, ko Marika, ko Arisitariko, ko Tima, ko Luke.

25Me tiko kei na yalomudou na loloma ni noda Turaga ko Jisu Karisito. Emeni.