Vei Ira Na Iperiu 1 - AI VOLA TABU（FIJ1864）

A WASE I. —Sa tukuna ko Paula ni sa uasivi cake ko Jisu vei ira kecega na parofita kei na agilose, ni sa Luve ni Kalou, 1-14.

1SAI ira na parofita ka vosa kina eliu ko na Kalou vei ira na qase, e na gauna e vuqa, kei nai valavala e vuqa:

2ia sai koya na Luvena sa vosa kina ko koya vei keda, e na gauna mai kimuri o qo; o koya sa lesia ko koya mei taukei ni ka kecega, o koya sa bulia talega kina na vuravura kecega;

3o koya sa ka sa cila kina na nona serau kei na yaloyalo ni nonai tovo, a sa tokona na ka kecega e na nona vosa kaukauwa, a sa tiko sobu e na liga i matau i Koya sa levu sara maicake, ni sa vuya laivi oti vakai koya na nodai valavala ca;

4ni sa yaco me uasivi cake vei ira na agilose, me vaka sa taukena na yaca sa uasivia na nodra.

5Se ko cei vei ira na agilose sa kaya kina ko koya e na dua na siga, A Luvequ ko iko, au sa vakasikavi iko e na siga o qo? sa kuri talega, Ena Tamana koi au, ia ena Luvequ ko koya?

6Ia ni sa kauta mai ko koya na Ulumatua ki vuravura, sa kaya, Me cuva vei koya ko ira kecega na agilose ni Kalou.

7Ia e na vukudra na agilose sa kaya ko koya, O koya sa cakavi ira na nona agilose me cagi, kei ira na nonai talatala me yameyame ni buka.

8Ia e na vuku ni Luvena ga, Ena sega ni mudu na nomui tikotiko-vakaturaga, o iko na Kalou: sai titoko ni caka dodonu nai titoko ni nomu matanitu:

9e na vuku ni ko sa vinakata nai valavala dodonu, ka cata nai valavala ca, sa lumuti iko kina ko na Kalou, a nomu Kalou, e na waiwai ni reki mo uasivi cake kina vei ira na nomui tokani.

10Ia, O iko Turaga, ko a tauyavutaki vuravura e nai vakatekivu; ia na cakacaka ni ligamu ko lomalagi:

11ena rusa o qori; ia ko iko, ko na tiko ga: ia ena madra mai o qori kecega me vaka nai sulu;

12o na lobia talega me vaka nai tutuvi, ka na vakaisosomi: ia ko iko ko sai iko tikoga, ia ena sega ni bau mudu na nomu veiyabaki.

13Ia se ko cei vei ira na agilose sa kaya kina ko koya e na dua na siga, Mo tiko e na ligaqu i matau, ka meʼu qisi ira oti mada na nomu meca mei tutu-ni-yavamu?

14Era sa sega li ni yalo dauveiqaravi ko ira kecega, sa talai yani me qaravi ira era na yaco emuri mei taukei ni bula?