Vei Taito 3 - AI VOLA TABU（FIJ1864）

Sa tukuna tale vei Taito ko koya nai vakavuvuli e yaya, kei na ka e tawa yaga, 1-11. Sa kaya me laʼki raici koya, a sa qai tinia na nonai vola, 12-15.

1VAKASA na lomadra me ra dautalairawarawa vei ira sa liu kei ira sa kaukauwa, me talairawarawa vei ira na turaga ni lewa, me ra vakarau tu me ia nai valavala kecega e vinaka,

2me ra kakua ni vosavakacacataka e dua na tamata, me ra kakua ni veiba, me ra yalomalua, me ra vakatakila ni ra sa yalolokomi sara vei ira kecega na tamata.

3Ni da a lialia eliu koi keda talega, eda a talaidredre, eda a vakacalai, eda a dauqarava na gadreva ca kei na mamarau e vuqa, eda a lomaca ka vuvu, eda a vakasisila, eda a dauveicati vakai keda.

4Ia ni sa rairai mai na yalovinaka kei na yalololoma ni Kalou na nodai Vakabula,

5sa qai vakabulai keda ko koya, sa sega ga e na vuku ni cakacaka dodonu eda sa kitaka, e na vuku ga ni nona loloma, e nai silisili ni sucu tale, kei na vakavoui ni Yalo Tabu;

6o koya sa sovaraka vakalevu vei keda ko koya e na vuku i Jisu Karisito na nodai Vakabula;

7me da vakadonui kina e na nona loloma walega, ka yaco me dai taukei ni bula tawa mudu sa vakanuinuitaki.

8Sa dina na vosa, ia kaʼu sa vinakata mo vakadinadinataka na ka o qo, Me ra gumatua me kitaka tiko nai valavala vinaka ko ira era sa vakabauta na Kalou. Sa vinaka na veika o qo, ka yaga vei ira na tamata.

9Ia na ka sesewa sa dauveibitaki mo biuta ga, kei nai vola ni kawa, kei na veiba, kei na dauveiletitaka na vunau; ni sa tawa yaga o qo, ka ka wale sara.

10A tamata sa dau-vakavuvuli vakatani mo biuta, ni sa vunauci mada vakadua ka vakarua;

11ni ko sa kila ni sa vakacalai ka sa valavala ca ko koya sa vakakina, ni sa beitaki ko koya vakai koya.

12NIʼU na talai Aritema vei iko, se Tikiko, mo gumatua me lako mai kivei au ki Nikopoli: niʼu sa nanuma me tiko ga kina e na vula-i-liliwa.

13Gumatua me kauti Sina na vu-ni-vunau, kei Apolosi, e na nodraui lakolako, me kakua na ka e yali vei rau.

14Ia ko ira talega na noda me ra vakatavulici, me ra daukitaka nai valavala vinaka me vaka na ka sa yaga, me ra kakua ni tawa vua kina.

15O ira kecega sa tiko vei au era sa loloma yani vei iko. Mo cavuta na loloma vei ira era sa lomani keitou e na vuku ni vakabauta. Me nomudou kecega na loloma. Emeni.