Vei Taito 2 - AI VOLA TABU（FIJ1864）

Sa vakavulici Taito ko koya e nai vakavuvuli kei nai valavala e dodonu, 1-8. Sa qai tukuna nai valavala e kilikili kei ira kecega era sa tamata lotu, 9-15.

1IA ko iko, mo tukuna tiko na veika sa kilikili kei nai vakavuvuli dina:

2me yalomamakutu ko ira na qase, me ra yaloqaseqase, me ra yalomatua, me vinaka na nodra vakabauta, me ra lomasoli, me ra dauvosota.

3O ira talega na yalewa qase, me ra dauia nai valavala sa kilikili kei ira era sa yalosavasava, me ra kakua ni dauveibeitaki vakailasu, me kakua ni vakabobulataki ira na waini levu, me ra dauvakatavulica na ka vinaka;

4me ra vakayalomatuataki ira na yalewa sa vakavoki, me ra lomani ira na watidra, me ra lomani ira na luvedra,

5me ra lomavuku, me ra lomasavasava, me ra dui tiko mai nodratou, me ra valavala vinaka, me ra dautalairawarawa vei ira na watidra, me kakua kina ni vosavakacacataki na vosa ni Kalou.

6Vakarota vei ira talega na cauravou me ra yalomatua.

7Vakatakilai iko e na ka kecega moi vakarau e na cakacaka vinaka: me kakua ni cala na nomui vakavuvuli, mo yaloqaseqase, mo yalosavasava;

8mo ia tiko na vosa e dodonu o koya ena sega ni lewai me ca; me madua kina ko koya sa totaki ira na tani, ni sa sega na ka ca me beitaki vei kemudou.

9Me ra talairawarawa vei ira na nodra turaga ko ira nai talatala, me ra cakava kecega na ka sa vinakati; me ra kakua ni dauvosa tale:

10ka me ra kakua sara ni butako, me ra vakatakila vakalevu na loma e dina, ka vinaka; me ra vakarogorogovina-kataka kina e na ka kecega nai vakavuvuli ni Kalou na nodai Vakabula.

11Ni sa rairai na loloma ni Kalou, a ya sa vu ni bula vei ira kecega na tamata;

12a sa vakavulici keda, me da biuta nai valavala sa tawa vakalotu, kei na gadreva ca vakavuravura, me da ia nai valavala yalomatua, ka yalododonu, ka vakalotu, e vuravura o qo;

13ni da namaka na ka ni veivakalougatataki eda sa vakanuinuitaka, kei na nona rairai vakaiukuuku na Kalou levu na nodai Vakabula ko Jisu Karisito;

14o koya ka soli koya e na vukuda, me voli keda mai nai valavala ca kecega, me vakasavasavataka vua na nona tamata talei, me ra lomakatakata e na cakacaka vinaka.

15A veika o qo mo vosataka, ka vakarota, ka veivunauci vakaukauwa sara. Me kakua e dua me beci iko.