Vei Taito 1 - AI VOLA TABU（FIJ1864）

A WASE I. —Sa tukuni koya ko Paula vei Taito, 1-4. Sa qai tukuna na ka sa laivi koya kina mai Kiriti, a sa tukuna nai valavala e kilikili kei ira era sa lesi mei talatala kai vakavuvuli, 5-16.

1O PAULA, nai talatala ni Kalou, kei nai apositolo i Jisu Karisito, e na vuku ni nodra vakabauta sa digitaki ira ko na Kalou, kei na vakatusa nai vakavuvuli dina sa vaka na lotu;

2me vakanuinuitaka na bula tawa mudu, o koya sa yalata eliu ko na Kalou, sa sega ni lasu, a sa qai vakatekivu emuri ko vuravura;

3a sa qai vakaraitaka na nona vosa e na kena gauna ni sa vunautaki, kaʼu sa lesi kina meʼu ia me vaka na nona vosa na Kalou na nodai Vakabula;

4vei Taito na luvequ dina me vaka na vakabauta sa tu vei keda kecega: Me sa mai vua na Kalou ko Tamada kei na Turaga ko Jisu Karisito na nodai Vakabula, na loloma, na yalololoma, na vakacegu.

5E na vuku ni ka o qo kaʼu a laivi iko kina mai Kiriti, mo vakadodonutaka na veika sa vo, ka lesia yadua nai talatala qase ki na veikoro, me vaka kaʼu a vakaroti iko kina:

6kevaka e dua sa tawa cala, sa wati ni yalewa e dua bauga, a ra sa vakabauta ko ira na luvena, a sa tawa beitaki vei ira nai valavala vakatani, se na talaidredre.

7Ni sa dodonu me tawa cala nai talatala qase, me vaka sai talatala ni Kalou; me kakua ni domoqa, me kakua ni daucudrucudru, me kakua ni daugunu waini, me kakua ni dauveiba, me kakua ni daugarova nai yau vakasisila;

8me daulomani ira na vulagi, me daulomani ira na tamata vinaka, me yalomatua, me yalododonu, me yalosavasava, me daurawa na yalona;

9me taura matua nai vakavuvuli dina sa vakatavulici kina, me rawata kina e nai vakavuvuli e vinaka me vakarota, ka vunauci ira talega era sa vosa vakatani.

10Ni ra sa lewe vuqa era sa valavala vakatani, era sa dautalanoa walega ka dauveivakaisini, era sa vakakina vakalevu ko ira na cili;

11ia ka sa dodonu me vagalui na gusudra, ni ra sa vakacalai ira kece na lewe-ni-vale e so, ni ra sa vakatavulica na ka sa tawa kilikili, e na vuku ni yau vakasisila.

12E dua vei ira, a nodra parofita, sa kaya, A nodrai tovo ga na kai Kiriti me ra daulasu, era manumanu ca, era sa daukana ka vucesa.

13Sa dina nai tukutuku o qo. O koya o qo mo qai vunauci ira vakararawa, me vinaka kina na nodra vakabauta;

14me ra kakua ni nanuma nai tukutuku walega sa vaka-Jiu, se na nodra veivakaro na tamata, era sa lesu tani mai nai vakavuvuli dina.

15Sa savasava na ka kecega vei ira era sa yalosavasava: ia kivei ira era sa dukadukali ka tawa vakabauta sa sega na ka sa savasava; ia sa dukadukali na nodra lewa-eloma kei na yalodra.

16Era sa kaya era sa kila na Kalou: ia e na nodrai valavala era sa cakitaka, ni ra sa dauvakasisilataki, ka talaidredre, ka tawa yaga ki na dua na cakacaka vinaka.