2 Timoci 4 - AI VOLA TABU（FIJ1864）

Sa vakarota tale vua na ka e so, 1-5. Sa tukuna ni sa voleka ni mate, a sa sega ni rere, 6-8. Sa tukuni Alekisadro, kei ira tale e so, a sa qai tinia na nonai vola, 9-22.

1IA kaʼu sa vakarota, e na mata ni Kalou, kei na Turaga ko Jisu Karisito, o koya ena lewai ira na bula kei ira na mate e na nona rairai mai kei na nona matanitu;

2mo vunautaka na Vosa; gumatua e na gauna vinaka, e na gauna ca; mo tukuna na ca, mo vunauci ira sa cala, mo dauvakarota tiko e nai vakavuvuli ka vosota vakalevu sara.

3Ni na yaco na gauna era na tawa vosota kina nai vakavuvuli dodonu; ia ena vaka na nodra gadreva ga, era na vakalewevuqataki ira kina na nodrai vakavuvuli, ni sa qasikanunu na daligadra;

4a ra na saumaka tani na daligadra mai na ka dina, ka lesu ki nai tukutuku wale.

5Ia ko iko, mo yalomatua e na ka kecega, mo vosota na ka rarawa, mo kitaka na cakacaka ni vakavuvuli, vakayacora sara na ka ko sa lesi kina moi talatala.

6Niʼu sa vakarau tu me liviraki, a sa voleka na noqu siga ni lako tani yani.

7Au sa vala oti e nai valu vinaka, au sa ciciva oti na cere, au sa taura matua oti na vakabauta:

8emuri, sa maroroi me noqu nai sala vakaturaga ni valavala dodonu, o koya ena solia mai vei au na Turaga, o koya na dauveilewai dodonu, e na siga ko ya; ia ena sega vei au duaduaga, vei ira kece talega era sa vinakata na nona rairai mai.

9Gumatua mo lako vakasauri mai vei au:

10ni ka biuti au ko Tima, ni ka lomani vuravura o qo, ka sa lako ki Cesalonika; ko Kirisiki ki Kalatia, o Taito ki Talimetia.

11Sa tiko vei au ko Luke duaduaga. Kauti Marika mo drau lako vata kaya mai: ni sa yaga vei au ko koya e na cakacaka.

12Au sa talai Tikiko ki Efeso.

13Ai tutuvi kaʼu a laiva mai Tiroa vei Karipo, ni ko na lako mai, mo kauta mai, kei nai vola, ia mo nanuma sara nai vola kuli-ni-sipi.

14Sa levu na ka ca ka kitaka vei au ko Alekisadro na matai ni parasa; me sauma ko na Turaga vei koya me vaka na nona cakacaka:

15mo vakaraica talega ko iko; ni sa qatia vakalevu na neitou vosa ko koya.

16Niʼu a tukuni au mada eliu, sa sega e dua na tamata keirau sa tu vata kaya, a sa biuti au ko ira kecega: me kakua ni wiliki vei ira.

17Ia ka sa tu vata kei au ko na Turaga, a sa vakaukauwataki au; me kilai sara e na vukuqu na ka sa vunautaki, me ra rogoca talega na veimatanitu kecega; ia kaʼu a vakabulai mai na gusu ni laioni.

18Ia ena vakabulai au ko na Turaga mai na ka ca kecega, ena vakayacori au talega ki na nona matanitu vakalomalagi: me ia vua na vakarokoroko ka tawa mudu. Emeni.

19Me cavu mada na loloma vei Pirisila kei Akuila, vei ira talega na lewe-ni-vale i Onisiforo.

20Sa tiko mai Korinica ko Erasito: ia kaʼu sa laivi Tirofimo mai Milito ni sa tauvi-mate.

21Gumatua mo taumadaka na vula-i-lili-wa e na nomu lako mai. Sa loloma yani vei iko ko Upulo, kei Putena, kei Leino, kei Kilotia, kei ira kecega na veiwekani.

22Me tiko kei na yalomu na Turaga ko Jisu Karisito. Me nomudou na loloma. Emeni.