2 Timoci 3 - AI VOLA TABU（FIJ1864）

Sa tukuna ko koya vei Timoci na ka ca ena tubu mai e na gauna emuri, 1-9. Sa kaya me nanuma na nonai valavala, ka muria tiko e na ka ka rogoca maivei koya, 10-17.

1MO kila talega na ka o qo, ni na yaco e so na gauna ni veivakararawataki e na veisiga maimuri:

2ni ra na daulomani ira walega na tamata, era na dauvinakata nai lavo, era na daubole, era na qaciqacia, era na dauvosavakacaca, era na talaidredre kivei ira na nodra qase, era na tawa vakavinavinaka, era na tawa yalosavasava,

3era na tawa veilomani vakatamata, era na dauia na veiyalayalati ka lasu tale, era na dauveibeitaki vakailasu, era na tawa daurawa na yalodra, era na daucudrucudru, era na daucati ira na tamata vinaka,

4era na dauveisoliyaki me mate, era na qaqa sodrosodro, era na yalolevu, era na lomana vakalevu na marau a ra na lomani koya na Kalou vakalailai ga;

5sa na nodra ga na yaloyalo ni lotu, ka sega na kena kaukauwa: ia mo lako tani maivei ira era sa vakaoqo.

6Ni sa vakakina ko ira era sa qasi ki na veivale e so, a ra sa daurawai ira na yalewa sesewa sa bini tu vei ira nai valavala oa, era sa kau e na gadreva ca e vuqa,

7era sa dauvakatavulici tiko, ka sega ni yaco rawa me kila na ka dina.

8Ia ka sa vakataki Yani kei Yabri ko ira o qo ni rau sa qati Mosese, era sa qatia vakakina na ka dina: a tamata loma-qeleqelewa, a sa tawa vinakati na nodra vakabauta.

9Ia era na sega ni tubu cake me levu: ni na vakavotui ga na nodra sesewa vei ira kecega na tamata, me vaka na nodrau o qori.

10Ia ko iko, ko sa kila vinaka na noqui vakavuvuli, na noqui valavala, na noqui naki, na noqu vakabauta, na noqu vosota vakadede, na noqu loloma, na noqu vosota na ca,

11na veivakacacani, na veivakararawataki, sa yaco vei au mai Anitioki, mai Ikoniona, mai Lisitira; na kena levu ni veivakacacani kaʼu a vosota; ia ka sa vakabulai au na Turaga mai na ka kecega o qo.

12Ia, ko ira kecega era na via lotu dina vei Karisito Jisu, era na vakacacataki.

13Ia ko ira na tamata ca kei ira na dauveitemaki, era na tubu cake me ra ca sara, ni ra sa ia na dauveivakacalai, ka sa vakacalai talega ko ira.

14Ia ko iko, mo tu dei e na ka ko a vakatavulici kina, a ka sa vakadinadinataki vei iko, ni ko sa kila se ko cei sa vakatavulici iko;

15ni ko a vakatekivu ni ko a gone me kila nai Vola tabu, o koya sa vakavukui iko rawa mo bula e na vuku ni ko sa vakabauti Karisito Jisu.

16Sai koya na Kalou sa vakavuna nai Vola kecega, a sa yaga o qo mei vakavuvuli, me tukuna na ca, me ia kina na vakadodonutaki, me ia kina na vakatavuvuli e na ka e dodonu:

17me yaco kina na tamata ni Kalou me vakarau tu, ni sa vakarautaki ki nai valavala vinaka kecega.