2 Timoci 2 - AI VOLA TABU（FIJ1864）

Sa vakarota ko koya vei Timoci na ka e so, 1-15. Sa tukuna e so nai vakavuvuli ca, 16-18; a sa tukuna nai vavakoso lewe ni soro, 19-21. Sa vakavulici koya e nai valavala e kilikili kei koya, 22-26.

1O KOYA o qo, na luvequ, mo qai vakaukauwataki iko e na loloma sa tu vei Karisito Jisu.

2Ia na veika ko a rogoca maivei au e na kedra maliwa na lewe vuqa era dauvakadinadina, mo solia vei ira na tamata yalodina, era na rawata me vakavulici ira na tani.

3O koya o qo mo qai vosota na ca, me vaka na tamatai valu vinaka i Jisu Karisito.

4Sa sega na tamata sa dauia nai valu sa vakaogai koya e na cakacaka ni bula o qo; me vinakati kina vua ka digitaka me tamatai valu.

5Ia ko koya sa gumatua me uasivi, sa sega ni vakaisalataki vakaturaga, kevaka sa sega ni ia me vaka na kenai valavala.

6Nai vakatau-ni-were sa cakacaka, sa taumada e na rawata na vuana.

7Vakananuma na ka kaʼu sa kaya; ia me solia vei iko ko na Turaga na loma e kila rawa na ka kecega.

8Vakananumi koya sa mai na kawa i Tavita, ko Jisu Karisito, o koya sa vakaturi cake mai na mate, me vaka na noqui tukutuku-vinaka:

9o koya kaʼu sa vosota kina na ca, me vaka na tamata caka ca, ia kaʼu sa vesuki kina; ia na vosa ni Kalou sa sega ni vesuki.

100 koya o qo kaʼu sa vosota kina na ka kecega e na vukudra na digitaki, me ra rawata talega na bula sa yaco vei Karisito Jisu, kei na kalougata tawa mudu.

11Sa dina na vosa: Kevaka eda sa mate kaya, eda na bula vata talega:

12kevaka eda sa vosota na ca, eda na lewa vata kaya: kevaka eda sa cakitaka, ena cakitaki keda talega ko koya:

13kevaka eda sa tawa vakadinata, sa yalodina tikoga ko koya: sa sega ni cakitaki koya rawa vakai koya.

14Vakasa na lomadra me ra nanuma na veika o qo, ia mo vakarota e na mata ni Turaga me ra kakua ni veiletitaka na vosa, a ka sa tawa yaga ka sa vakacalai ira era sa rogoca.

15Gumatua sara mo vakaraitaki iko mo vinaka e na mata ni Kalou, a tamata daucakacaka sa sega e dua na ka me madua kina, mo wasea vakadodonu nai vakavuvuli dina.

16Ia na dautalanoa vakasisila e tawa yaga mo drotaka: ni na tubu cake kina nai valavala sa tawa vakalotu:

17ia na nodra vosa ena kakana tiko me vaka na vidikoso ca: sa vakakina ko Imeneo kei Filito;

18erau sa cala mai nai vakavuvuli dina; ni rau sa kaya sa oti na tu cake tale mai na mate; a rau sa vukica sara kina na nodra vakabauta e so.

19Ia na yavu ni Kalou sa tu dei ga, ia sa vakaoqo na vosa sa volai kina, Sa kilai ira na nona tamata ko na Turaga: ia, Me ra lako tani mai nai valavala ca ko ira yadua era sa cavuta na yaca i Karisito.

20Ia e na vale levu sa sega ni tu na veibilo sa caka e na koula kei na siliva ga, ko ya talega e na kau kei na qele; ia e so me dokai, e so me tawa dokai.

21Ia kevaka e dua na tamata sa vakasavasavataki koya mai na veika o qo, ena yaco kina me bilo dokai, sa vakasavasavataki, ka yaga sara vua na Turaga, ni sa vakarau tu ki na cakacaka vinaka kecega.

22Ia mo dro tani mai na gadreva ca vaka-cauravou; ia mo muria na yalododonu, na vakabauta, na loloma, na veivinakati kei ira era sa masuta na Turaga e na yalosavasava.

23Ia mo dro tani mai na veileti lialia eda tawa vakatavulici kina, ni ko sa kila era sa vakatekivuna ga na veivala.

24Ia sa tabu ni veivala nai talatala ni Turaga; ia me yalomalumalumu vei ira kecega na tamata, me vakavuvuli vakavuku, me dauvosota,

25me vakatavulici ira e na yalomalumalumu era sa dauveivorati; de solia beka vei ira ko na Kalou na veivutuni me ra kila kina na ka dina,

26ka me ra yadra tale mai nai cori ni tevoro, ni sa vakabobulataki ira ko koya me vaka na veitalia i koya.