2 Timoci 1 - AI VOLA TABU（FIJ1864）

A WASE I. —Sa loloma yani vei Timoci ko Paula, a sa tukuni koya kei na tinana kei na buno, 1-7. Sa qai vakarota vua na ka e so, 8-14. Sa tukuni ira e so eratou a biuti koya; kei Onisiforo, ni ka lomani koya dina sara, 15-18.

1O PAULA, nai apositolo i Jisu Karisito e na veitalia ni Kalou, e na vuku ni bula ka yalataki, sa tu vei Karisito Jisu,

2vei Timoci, na gone ni toko: Me sa mai vua na Kalou ko Tamada kei Karisito Jisu na noda Turaga, na loloma, na yalololoma, na vakacegu.

3Au sa vakavinavinaka vua na Kalou, o koya kaʼu sa qarava e na yaloqu dina me vaka na nodrai valavala na qase eliu, niʼu sa tawa mudu ni vakananumi iko e na noqu masu e na bogi kei na siga;

4niʼu sa gadreva vakalevu me raici iko, (niʼu sa nanuma na wai ni matamu,) meʼu vakasinaiti kina e na marau;

5niʼu sa nanuma na vakabauta tawa dauveivakaisini sa tu vei iko, ka tu eliu vei Loi na bumu, vei Unisi talega na tinamu, au sa dinata ni sa tu vei iko talega.

6O koya o qo kaʼu sa vakasa kina na lomamu mo vakatakatataka nai solisoli ni Kalou, a ya sa yaco vei iko e na virikotora na ligaqu.

7Ni sa sega ni solia mai vei keda na Kalou na yalo ni rere: a yalo ni kaukauwa ga, kei na yalololoma, kei na yalomatua.

8O koya mo qai kakua ni maduataka na keuai tukutuku na noda Turaga, sei au na nona tamata sa vesu tu: ia mo vosota na vakararawataki e na vuku ni tukutuku-vinaka me vaka na kaukauwa, ni Kalou;

9o koya sa vakabulai keda, ka sa kacivi keda me da yalosavasava, a sa sega ga e navuku ni noda cakacaka, e na vuku ni nona veitalia ga kei na loloma walega ka soli vei keda eliu, e na vuku i Karisito Jisu, sa qai vakatekivu emuri ko vuravura;

10ia ka sa qai vakaraitaki mai ni sa rairai mai na nodai Vakabula ko Jisu Karisito, o koya sa vakaotia na mate, ka vakavotuya na bula kei na tawa mate rawa e nai tukutuku-vinaka:

11au a lesi kina meʼu vunau, meʼu apositolo talega, kei na nodrai vakavuvuli na veimatanitu.

12E na vuku ni ka o qo talega kaʼu sa vosota kina na veika o qo: ia kaʼu sa sega ni madua kina: niʼu sa kilai koya kaʼu a vakararavi kina, ia kaʼu sa dinata ni sa rawata ko koya me maroroya na ka kaʼu sa solia vua ka yacova mada na siga ko ya.

13Mo taura matua nai vakarau ni vosa dina ko a rogoca maivei au, e na vakabauti Karisito Jisu kei na loloma.

14A ka vinaka sa tauri mo taura matua, ni sa vukei iko na Yalo Tabu sa tu vei keda.

15A ka ga o qo ko sa kila, ni sa lesu tani vei au ko ira kecega na kai Esia; sa vakakina ko Fijelo kei Erimojeni.

16Me yalololoma mada na Turaga kivei ira na mataqali i Onisiforo; ni sa vakacegui au wasoma, a sa sega ni maduataka na noqui vesu:

17ia ni sa tiko mai Roma, sa vakasaqarai au matua, a sa kunei au.

18Me solia mada vei koya ko na Turaga me kune loloma mai vua na Turaga e na siga ko ya: ia na kena vuqa ni ka sa qaravi au kina mai Efeso, o sa kila vinaka sara.