1 Timoci 6 - AI VOLA TABU（FIJ1864）

Sa tukuna ho koya me dauvakarokoroko ve ira na turaga ko irana nodra lewe-ni-vale, 1, 2. Sa qai tukuna nai vakavuvuli vakailasu, kei na lotu dina, kei ira era dauvinakata nai yau, 3-10. Sa vakarota tale vei Timoci, a sa tinia na nonai vola, 11-21.

1KO ira kecega na tamata era sa savenaki tu, me ra vakasami ira na nodra turaga me ra vakarokorokotaki ira vakalevu, me kakua ni vosavakacacataki kina na yaca ni Kalou kei nai vakavuvuli.

2Ia ko ira sa nodra na turaga era sa vakabauta, me ra kakua ni beci ira, e na vuku ni ra sa veiwekani; ia me ra qaravi ira ga vakalevu cake, e na vuku ni sa vakabauta ka lomani ko ira sa nodra na ka yaga. A veika o qo mo vakatavulica ka vakarota.

3Kevaka e dua sa vakavuvuli vakatani, ka sega ni vinakata na vosa vinaka, io, na nona na noda Turaga ko Jisu Karisito, kei nai vakavuvuli sa vaka na lotu;

4sa qaciqacia ko koya, ia ka sa sega na ka e kila, a sa daugarova na veileti kei na veibataka na vosa walega, sa tubu kina na vuvu, na veivala, na veivosavakacacataki, na dauvakananuma ca,

5a nodra veileti tawa-yaga na tamata lomaca, sa takali kina nai vakavuvuli dina, era sa vakasama ni sa ka eda vakaiyau kina na lotu: mo lako tani vei ira sa vakaoqo.

6Ia sai yau levu na lotu kei na lomavinaka.

7Ni sa sega e dua na ka eda sa kauta mai ki vuravura, a sa dina sara ni sa sega e dua na ka eda na kauta tani rawa.

8Ia kevaka sa tu vei keda na kakana kei nai sulu, me da lomavinaka kina.

9Ia ko ira era sa gadreva me ra vutuniyau, era sa bale ki na dauvere kei nai cori, kei na gadreva ca e vakavuqa, e lialia, ka dauveivakacacani, o qori sa luluvuraki ira na tamata e na mate kei na rusa.

10Ni sa vu ni ka ca kecega na daulomana nai lavo: era sa daukocova e so, a ra sa vakacalai kina e na vakabauta, a ra sa cokai ira sara kina vakai ira talega e na yaluma vakavuqa.

11Ia ko iko, na tamata ni Kalou, mo dro tani mai na veika o qo; mo muria na yalododonu, na lotu, na vakabauta, na loloma, na vosota, na yalomalua.

12Vakaogai iko e na ogaoga vinaka ni vakabauta, taura na bula tawa mudu, o koya ko sa kacivi kina, o sa vakatusa talega kina na vakatusa vinaka e na matadra na dauvakadinadina era sa lewe vuqa.

13Au sa vakarota vei iko e na mata ni Kalou, o koya sa vu ni bula kecega, kei Karisito Jisu, o koya ka vakatusa na vakatusa vinaka e na mata i Ponitio Pilato;

14mo taura matua nai vakaro, me kakua ni tauvi-duka, me tawa cala, ka malua mada me rairai mai na noda Turaga ko Jisu Karisito:

15o koya ena vakatakila e na nona gauna ko na Turaga levu ka mamarau duaduaga, na nodra Tui na tui, kei na nodra Turaga na turaga;

16o koya sa tu vei koya duaduaga na bula tawa mudu, sa tiko e na rarama sa tawa torovi rawa: sa sega na tamata sa raioa, se raica rawa: me nona ga na vakarokoroko kei na kaukauwa e tawa mudu. Emeni.

17Vakarota vei ira era sa vutuniyau e na gauna o qo, me ra kakua ni yalolevu se vakararavi e nai yau sa tawa tu dei, vua ga na Kalou bula, o koya sa solia vakayauyau vei keda na ka kecega eda marau kina;

18me ra caka vinaka, me ra vutu ni cakacaka e yaga, me ra lomasoli, me ra via veivuke;

19me ra binia tu me nodra na yavu ena yaga e na gauna e muri mai, me ra taura kina na bula tawa mudu.

20I Timoci, taura matua na ka sa tauri, ka lesu tani mai na dautalanoa ca ka tawa yaga, kei nai vakavuvuli tani sa vakatokai vakailasu me vuku:

21ni ra sa kaya e so era sa rawata, a ra sa cala e na vakabauta. Me nomu na loloma. Emeni.