1KAKUA ni vunauca vakaukauwa na qase, ia mo vakarota vakamalua ga me vaka vua na tamamu; vei ira na cauravou me vaka vei ira na tacimu;
2vei ira na yalewa qase, me vaka vua na tinamu; vei ira na gonealewa, me vaka vei ira ua ganemu, e na yalosavasava sara.
3Vakaraici ira na yada era sa yada dina.
4Ia kevaka sa dua na yada ka so na luvena se na makubuna, me ra vakatavulici mada ko ira o qo me ra kitaka nai valavala dodonu mai nodratou, me ra sauma vinaka na nodra loloma na nodra qase: ni sa dodonu o qo ka vinaka vua na Kalou.
5Ia na yada dina, o koya sa sega na wekana, sa vakararavi tiko ki na Kalou, a sa dauia tiko na veimasulaki kei na kerekere e na bogi kei na siga.
6Ia ko koya sa dauguta na marau, sa mate ga ni sa bula lako.
7Ia mo dauvakarota na veika o qo, me ra tawa cala kina.
8Ia kevaka e dua sa sega ni vakaraici ira na kai nona, ka ia vakalevu vei ira na nona lewe-ni-vale, sa cakitaka na vakabauta, ka sa uasivi sobu e na ca vei koya sa tawa lotu.
9Me kakua e dua na yada me digitaki sa tawa onosagavulu na nona yabaki, ka sa dua bauga na watina eliu,
10me rogo e na vuku ni valavala vinaka; kevaka sa qaravi ira na gone, kevaka sa dauvakacegui ira na vulagi, kevaka sa vuya na yavadra era sa lotu, kevaka sa vukei ira era sa vakararawataki, kevaka sa gumatua ni daucakava na cakacaka vinaka kecega.
11Ia ko ira ga na yada vakavoki mo vakasuka: ni ra sa dau via vakawati, ni ra sa mai daugarova na marau, ka sega ko Karisito:
12a ra sa cudruvi, ni ra sa biuta na ka era sa vakabauta eliu.
13A ra sa yaco talega me ra vucesa, a ra sa veilakoyaki ki na veivale; a ra sa sega ni vucesa walega, era sa dautalanoa wale talega, ka makutu vakatani, a ra sa daukaya na ka e tawa kili.
14O koya o qo kaʼu sa vinakata kina me ra vakawati ko ira o qori sa vakavoki, me ra vakasucu gone, me ra lewa na vale, me ra kakua ni kitaka e dua na ka me vosa vakasewasewani kina ko na meca.
15Ni sa lesu tani e so me ra muri Satani.
16Kevaka sa dua na tagane se na yalewa sa vakabauta a sa nona e so na yada, me vukei ira ko koya, ka me kakua ni vakabibi nai vavakoso lewe ni soro: me vukei ira kina era sa yada dina ko ira o qori.
17O ira na qase era sa lewa vinaka me ra vakarokorokotaki vakalevu, ia ka levu sara ko ira sa daucakacaka e na vosa kei nai vakavuvuli:
18ni sa kaya nai Vola, Mo kakua ni vauca na gusu ni karavau, ni sa buturaki sila. Ia, Sa dodonu me soli vua na tamata daucakacaka na kenai voli.
19Mo kakua ni vakabauta e dua sa beitaka na qase, kevaka e sega ni lewe rua se lewe tolu era sa vakadinadina.
20O ira sa valavala ca, vunauca ena matadra na tamata kecega, me rere kina ko ira na tani.
21Au sa vakarota e na mata ni Kalou kei na mata ni Turaga ko Jisu Karisito, kei na matadra na agilose digitaki, mo muria na veika o qo ka kakua ni vinakata e dua ka cata e dua, ka kakua sara ni cakacaka e na digitaka walega e dua.
22Kakua ni tabaka vakasauri e dua e na ligamu; mo kakua ni cudruvi e na vuku ni nodrai valavala ca na tamata tani: maroroi iko mo savasava tiko.
23Kakua ni gunu wai dranu tikoga, ia mo gunuva vakalailai na waini e na vuku ni ketemu, kei na malumalumu sa dautauvi iko.
24Na nodrai valavala ca na tamata e so sa votu ga eliu, a ra sa lako eliu me cudruvi; ia na nodra na tamata e so sa muri mai.
25Sa vaka talega kina nai valavala vinaka sa votu ga eliu; ia ko ira e sega sa tawa tabonaki rawa.
Who We AreWhat We EelieveWhat We Do
2025 by iamachristian.org,Inc All rights reserved.
