1 Timoci 4 - AI VOLA TABU（FIJ1864）

Sa tukuna ko koya ni na so era na biuta na lotu dina, 1-5. A sa vakarota vei Timoci me dautukuna na ka dina, ka me gumatua sara e na wili vola, ka me dauvakatavuvuli, 6-16.

1IA sa tukuna vakamacala na Yalo ni na vuki tani e so mai na vakabauta e na gauna emuri, ni ra vakarogoca e so na yalo e dauveivakacalai kei na nodrai vakavuvuli na tevoro;

2e na nodra dauveivakaisini era sa vosa lasu, me vaka sa tavuni na nodra lewa-eloma e na kaukamea katakata;

3era sa dautarova na ia na vakawati, a ra sa vakatabuya na kakana e so, sa cakava ko na Kalou me ra kania ka vakavinavinaka kina ko ira sa vakabauta ka kila nai vakavuvuli dina.

4Ni sa vinaka na ka kecega sa cakava ko na Kalou, a sa sega na ka me beci, kevaka sa ia na vakavinavinaka ni sa tauri;

5ni sa vakasavasavataki e na vosa ni Kalou kei na masu.

6Kevaka ko sa talaucaka na veika o qo vei ira na veiwekani, o na qai talatala vinaka nei Jisu Karisito, ni ko sa vakatuburi cake e na vakabauta kei nai vakavuvuli vinaka ko ya ko sa yaco kina.

7Ia mo biuta sara na vosa sa tabu ka lialia, ia mo dauvakaogai iko ki na lotu.

8Ni sa yaga vakalailai ga na ogaoga vakayago: ia na lotu sa yaga e na ka kecega, ni sa yalataki kina na ka ni bula o qo, kei na ka ni bula talega ena muri mai.

9Sa dina na vosa, a sa yaga me vakabauti vakalevu.

10Ni sai koya ga o qo keitou sa daucakacaka kina ka vakalialiai, ni keitou sa vakararavi e na Kalou bula, nai Vakabula ni tamata kecega, a sa nodra dina sara era sa vakabauta.

11A veika o qo mo vakarota ka vakatavulica.

12Me kakua ni beci iko e dua ni ko sa cauravou; ia mo yaco mo nodrai vakarau era sa vakabauta, e na vosa, e nai valavala, e na loloma, e na vakayalo, e na lomadina, e na yalosavasava.

13Mo gumatua e na wili vola, e na dauveivakaroti, e nai vakavuvuli, ka yacova na noqu lako yani.

14Kakua ni biuta wale nai solisoli sa tu vei iko, o koya ka soli vei iko e na vosa vakayalo, kei na virikotora na ligadra nai talatala qase.

15Mo dauvakananuma na veika o qo; me ra rawai iko sara; me rairai kina ni ko sa vuku cake mai e na ka kecega.

16Vakaraici iko vinaka, kei nai vakavuvuli; tu dei kina: ni ko sa kitaka vakaoqo ko na vakabulai iko, kei ira talega era sa rogoci iko.