II. Vei Ira Na Kai Cesalonika 2 - AI VOLA TABU（FIJ1864）

Sa vakarota vei ira ko koya me ra tu dei e na vakabauta, 1-12. Sa qai vakacegui ira tale, ka vakaro vei ira, ka masulaki ira, 13-17.

1IA keitou sa qai vakamasuti kemudou, na veiwekani, e na vuku ni nona lako tale mai na noda Turaga ko Jisu Karisito, kei na noda soqoni vata vei koya,

2mo dou kakua ni veitosoyaki vakasauri mai na lomadei, se vakararawataki, me kakua e na vuku ni vosa ni yalo, se nai tukutuku sei vola, e vaka sa maivei keitou, me vaka ni sa voleka mai na siga i Karisito.

3Me kakua sara e dua na ka me vakaisini kemudou kina e dua; ni na yaco mada eliu na vuki tani, ka na vakaraitaki mada na tamata ni valavala ca, a luve ni veivakarusai;

4o koya sa dauvorata, a sa vakalevui koya me uasivi cake e na ka kecega sa vakatokai me Kalou, se dausorovi; a sa tiko kina ko koya e na vale ni Kalou me vaka sa Kalou, a sa vakaraitaki koya me Kalou.

5Dou sa tawa nanuma beka, niʼu a tukuna vei kemudou na veika o qo, niʼu a tiko vata kei kemudou?

6Ta dou sa qai kila na ka sa tarova, me vakaraitaki mai kina ko koya e na kena gauna.

7Ni sa cakacaka vakavuni edaidai na ca: ia sa dua e tarova tikoga, ka malua me kau tani mada yani ko koya.

8Ena qai vakaraitaki na Vu-ni-ca ko ya, o koya ena vakarusa ko na Turaga e na cegu ni gusuna, ka vakaotia e na nona lako mai vakarairai:

9sa vaka na cakacaka i Satani na nona lako mai, sa ia e na kaukauwa levu kei na veivakatakilakila kei na veika vakailasu e veivakidacalataki,

10kei na ka e tawa dodonu sa veivakacalai vei ira era sa rusa; ni ra sa bese ni lomana na ka dina, me ra bula kina.

11Ia e na vuku ni ka o qo, sa tala tiko na veivakacalai kaukauwa vei ira ko na Kalou, me ra vakadinata kina na ka lasu:

12me cudruvi kina ko ira kecega era sa tawa vakabauta na ka dina, a ra sa vinakata ga na ka e tawa dodonu.

13Ia ka sa kilikili kei keitou me keitou ia tikoga na vakavinavinaka vua na Kalou e na vukumudou, na veiwekani, oi kemudou sa lomana ko na Turaga, ni ka digitaki kemudou ko na Kalou mai nai vakatekivu mo dou bula ni dou sa vakasavasavataki e na Yalo, ka dou sa vakabauta na ka dina:

14a ka sa kacivi kemudou kina ko koya e na neitoui tukutuku-vinaka, mo dou rawata kina na kena kalougata na noda Turaga ko Jisu Karisito.

15O kaya mo dou tu dei, na veiwekani, ka taura tiko nai tukutuku dou sa vakatavulici kina maivei keitou, e na vosa, se e nai vola.

16Ia na noda Turaga ko Jisu Karisito, kei na Kalou ko Tamada, o koya ka lomani keda, ka solia vei keda e na loloma na vakacegu tawa mudu kei nai nuinui vinaka,

17me vakaceguya mada na yalomudou, ka vakataudeitaki kemudou e na vosa kei na cakacaka vinaka kecega.